କରୋନା ସଂକ୍ରମିତ ହେଲେ ସୋନୁ ସୁଦ୍

ମୁମ୍ବାଇ – ବଲିଉଡ ଅଭିନେତା ସୋନୁ ସୁଦ୍ କରୋନା ସଂକ୍ରମିତ ହୋଇଛନ୍ତି । ସୋନୁ ସୋସିଆଲ ମିଡିଆ ମାଧ୍ୟମରେ ପ୍ରଶଂସକମାନଙ୍କୁ ଏହି ସୂଚନା ଦେଇଛନ୍ତି। ସୋନୁ ସୁଦ କହିଛନ୍ତି ଯେ ତାଙ୍କ କରୋନା ରିପୋର୍ଟ ପଜିଟିଭ୍ ଆସିଛି କିନ୍ତୁ ତାଙ୍କ ମନୋବଳ ସୁପର ପଜିଟିଭ୍ ଅଛି। ସୋନୁ ସୁଦ୍ ନିକଟରେ କରୋନା ଟିକାର ପ୍ରଥମ ଡୋଜ ନେଇଥିଲେ।

ସୋନୁ ନିଜ ସୋସିଆଲ ମିଡିଆ ପୋଷ୍ଟରେ କହିଛନ୍ତି, “ନମସ୍କାର ବନ୍ଧୁଗଣ, ମୁଁ ଆପଣଙ୍କୁ ଜଣାଇବାକୁ ଚାହୁଁଛି ଯେ ମୋର କୋଭିଡ-୧୯ର ଟେଷ୍ଟ ରିପୋର୍ଟ ପଜିଟିଭ୍ ଆସିଛି । ସେଥିପାଇଁ ମୁଁ ନିଜକୁ କ୍ବାରେଣ୍ଟାଇନ କରିଛି । ଚିନ୍ତା କରିବାର କିଛି ନାହିଁ। ବରଂ ବର୍ତ୍ତମାନ ତୁମର ସମସ୍ୟାର ସମାଧାନ ପାଇଁ ପୂର୍ବାପେକ୍ଷା ମୋ ପାଖରେ ଅଧିକ ସମୟ ରହିବ ମନେରଖ, ଯେକୌଣସି ଅସୁବିଧା‌ ହେଲେ .. ମୁଁ ସବୁବେଳେ ତୁମ ସହିତ ଅଛି ।”

ଯେବେଠୁ ଭାରତରେ କରୋନ ମହାମାରୀ ବ୍ୟାପିଛି, ସୋନୁ ସୁଦ ଦେଶର ନିଃସହାୟ, ଗରିବ ତଥା ଅସୁବିଧାରେ ପଡ଼ିଥିବା ଲୋକଙ୍କ ସାହାଯ୍ୟ କରିଆସୁଛନ୍ତି। ଯେତେବେଳେ କରୋନା ମାମଲା କମିବା ଆରମ୍ଭ ହେଲା, ସୋନୁ ସେହି ପ୍ରବାସୀ ଶ୍ରମିକଙ୍କୁ ବି ସାହାଯ୍ୟର ହାତ ବଢ଼ାଇଥିଲେ ଯେଉଁମାନେ ନିଜ ଘରେ ପହଞ୍ଚିଥିଲେ ବି ସେମାନଙ୍କ ପାଖରେ ରୋଜଗାର ନଥିଲା |

ବିଗତ ଏକ ବର୍ଷ ଧରି, ସେ କରୋନାର ଏହି କଠିନ ସମୟରେ ଲୋକଙ୍କୁ ନିରନ୍ତର ସାହାଯ୍ୟ କରିଆସୁଛନ୍ତି । କିନ୍ତୁ ବର୍ତ୍ତମାନ ଯେଉଁ ବେଗରେ ସଂକ୍ରମିତ ଲୋକଙ୍କ ସଂଖ୍ୟାରେ ରେକର୍ଡ ବୃଦ୍ଧି ଘଟିଛି, ସେ ମଧ୍ୟ ଅସହାୟ ମନେ କରିଛନ୍ତି | ସୋନୁ ସୁଦ ଏକ ଟୁଇଟ୍‌ରେ କହିଛନ୍ତି ଯେ ତାଙ୍କ ପାଖକୁ ହଜାର ହଜାର ଲୋକଙ୍କଠାରୁ କଲ ଆସୁଛି, କିନ୍ତୁ ସମସ୍ତଙ୍କୁ ସାହାଯ୍ୟ କରିପାରୁ ନୁହଁନ୍ତି। ସେ ନିଜକୁ ଅସହାୟ ମନେ କରୁଛନ୍ତି।