ଜାମ୍ମୁ: ସୀମା ଆରପାରିରୁ ପାକିସ୍ତାନ ପ୍ରାୟୋଜିତ ଅନୁପ୍ରବେଶ କାର୍ଯ୍ୟ ଜାରି ରହିଛି। ଜାମ୍ମୁ କାଶ୍ମୀରର ଜାମ୍ମୁ ଜିଲ୍ଲାରେ ଆଜି ସକାଳେ ପୁଣି ଦୁଇଟି ଡ୍ରୋନ୍ ଦେଖାଯାଇଥିବା ଦାବି କରାଯାଇଛି। ସେନା ସୂତ୍ରରୁ ପ୍ରକାଶ ଯେ ଭୋର୍ ୪:୪୦ ସମୟରେ କାଲୁଚକ ଅଞ୍ଚଳରେ ଗୋଟିଏ ଡ୍ରୋନ୍ ଦେଖାଯାଇଥିବା ବେଳେ ଅନ୍ୟ ଡ୍ରୋନ୍ କୁଞ୍ଜୱାନୀରେ ଭୋର୍ ପ୍ରାୟ ୪:୫୨ ରେ ଦେଖାଯାଇଥିଲା। ବଡ କଥା ହେଉଛି ଏହି ଦୁଇଟି କ୍ଷେତ୍ର ବାୟୁସେନା ଷ୍ଟେସନର ୭ ରୁ ୧୦ କିଲୋମିଟର ଦୂରତା ମଧ୍ୟରେ ଆସିଥାଏ | ସୂତ୍ରରୁ ପ୍ରକାଶ ଯେ ଉଭୟ ଡ୍ରୋନ୍ ୮୦୦ ମିଟର ଉଚ୍ଚରେ ଉଡୁଥିଲେ।
କୁହାଯାଉଛି ଯେ ଜାମ୍ମୁ ବାୟୁସେନା ଷ୍ଟେସନ ଉପରେ ଆକ୍ରମଣ ପରଠାରୁ ଡ୍ରୋନ୍ କ୍ରମାଗତ ଭାବେ ଦେଖାଯାଉଛି, ଯାହା ସୁରକ୍ଷା ବାହିନୀ ପାଇଁ ଚିନ୍ତାର ବିଷୟ ହୋଇଛି। ଯାହା ବି ଡ୍ରୋନ୍ ଦେଖାଯାଉଛି, ସେଗୁଡ଼ିକ ଏଠାରେ ସାମରିକ ବେସ୍ ଏବଂ ସାମରିକ ଷ୍ଟେସନ ନିକଟରେ ଉଡୁଛି।
ସୂଚନାଯୋଗ୍ୟଯେ ଗତ ତିନି ଦିନ ମଧ୍ୟରେ ଜାମ୍ମୁ କାଶ୍ମୀରର ସାମରିକ ଷ୍ଟେସନ ଚାରିପାଖରେ ଡ୍ରୋନ୍ ଦେଖିବାର ଏହା ହେଉଛି ତୃତୀୟ ଘଟଣା। ଜୁନ୍ ୨୯ ରେ ଏହି ଡ୍ରୋନ୍ ସଞ୍ଜଓ୍ବାନ ମିଲିଟାରୀ ବେସ୍ ରେ ୩:୦୦ ରୁ ୩.୩୦ ମଧ୍ୟରେ ଦେଖିବାକୁ ମିଳିଥିଲା | ଏହାପୂର୍ବରୁ ସୋମବାର ଦିନ କାଲୁଚାକ୍ ମିଲିଟାରୀ ଷ୍ଟେସନରେ ମଧ୍ୟ ଡ୍ରୋନ୍ ଦେଖିବାକୁ ମିଳିଥିଲା। ସୁରକ୍ଷା ବାହିନୀ ପକ୍ଷରୁ ଗୁଳି ଚଳା ଯିବା ପରେ ଡ୍ରୋନ୍ ଅନ୍ଧାରରେ ଅଦୃଶ୍ୟ ହୋଇଯାଇଥିଲା ।