ୟେଦିୟୁରପ୍ପା ମୁଖ୍ୟମନ୍ତ୍ରୀ ପଦ ଛାଡ଼ିବା ପରେ ସମର୍ଥକଙ୍କ ଆତ୍ମହତ୍ୟା

ବେଙ୍ଗାଲୁରୁ: କର୍ଣ୍ଣାଟକର ରାଜନୀତି ପୁଣି ଥରେ ଚର୍ଚ୍ଚାର ବିଷୟ ପାଲଟିଛି। ମୁଖ୍ୟମନ୍ତ୍ରୀ ବି.ଏସ୍ ୟେଦିୟୁରପ୍ପା ସୋମବାର ତାଙ୍କ ପଦରୁ ଇସ୍ତଫା ଦେଇଛନ୍ତି। ୟେଦିୟୁରପ୍ପା ତାଙ୍କ ପଦ ଛାଡି ପାରନ୍ତି ବୋଲି ଦୀର୍ଘ ଦିନ ଧରି କଳ୍ପନାଜଳ୍ପନା ଲାଗି ରହିଥିଲା ​​। ରାଜ୍ୟରେ ସୋମବାର ବିଜେପି ସରକାରର ଦୁଇ ବର୍ଷ ପୂର୍ତ୍ତି ହୋଇଥିବା ବେଳେ ୟେଦିୟୁରପ୍ପା ହଠାତ୍ ଇସ୍ତଫା ଘୋଷଣା କରିଥିଲେ। ୟେଦିୟୁରପ୍ପାଙ୍କ ଇସ୍ତଫା ପରେ ତାଙ୍କ ସମର୍ଥକମାନେ ଅତ୍ୟନ୍ତ ଭାବପ୍ରବଣ ହୋଇ କାନ୍ଦୁଥିବାର ଦେଖିବାକୁ ମିଳିଥିଲା । ଏପରିକି ତାଙ୍କର ଜଣେ ସମର୍ଥକ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ଚାମରାଜନଗର ଜିଲ୍ଲାର ଗୁଣ୍ଡଲୁପେଟ ତାଲୁକାର ୩୦ ବର୍ଷୀୟ ରାଜପ୍ପା ​​(ରବି) ୟେଦୁରୁପ୍ପାଙ୍କ ଇସ୍ତଫା ଯୋଗୁଁ ଦୁଃଖରେ ନିଜ ଜୀବନ ହାରିଛନ୍ତି ।

ଏହି ଖବର ବିଷୟରେ ଜାଣିବା ପରେ ୟେଦିୟୁରପ୍ପା ଟ୍ୱିଟ୍ କରି ଦୁଃଖ ପ୍ରକାଶ କରିଛନ୍ତି । ସେ ଲେଖିଛନ୍ତି ଯେ – ରାଜନୀତିରେ ଉତ୍ଥାନ ଓ ପତନ ଲାଗିରହେ, କିନ୍ତୁ ଏହାର ଅର୍ଥ ନୁହେଁ ଯେ ଏହି କାରଣରୁ କେହି ନିଜ ଜୀବନ ହାରିବେ। କୌଣସି ପରିବାର ଏପରି କ୍ଷତି ସହ୍ୟ କରିପାରିବେ ନାହିଁ ।

ୟେଦିୟୁରପ୍ପା ଆଗକୁ ଲେଖିଛନ୍ତି, “ମୁଁ ହାତଯୋଡି ନିବେଦନ କରୁଛି ଯେ ସମ୍ମାନ ଦେବା ପାଇଁ ସୀମା ଅତିକ୍ରମ କରିବା ଉଚିତ୍ ନୁହେଁ। ମୁଁ ରବିଙ୍କ ପରିବାର ସହିତ ଅଛି।

ୟେଦିୟୁରପ୍ପା ସୋମବାର ରାଜ୍ୟପାଳ ଥାୱରଚାନ୍ଦ ଗେହଲୋଟଙ୍କୁ ନିଜ ଇସ୍ତଫା ପତ୍ର ପ୍ରଦାନ କରିଥିଲେ। ରାଜ୍ୟପାଳ ଏହାକୁ ଗ୍ରହଣ କରିଥିଲେ ଏବଂ ତାଙ୍କ ନେତୃତ୍ଵାଧୀନ ମନ୍ତ୍ରୀ ପରିଷଦକୁ ତୁରନ୍ତ ଭଙ୍ଗ କରିଥିଲେ। ରାଜ ଭବନ ବିଜ୍ଞପ୍ତିରେ କୁହାଯାଇଛି ଯେ ବିକଳ୍ପ ବ୍ୟବସ୍ଥା ନହେବା ପର୍ଯ୍ୟନ୍ତ ୟେଦିୟୁରୁପ୍ପା ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିବେ।