ଜମ୍ମୁ: ଖରାପ ପାଗ ଯୋଗୁଁ ଜମ୍ମୁରୁ ଅମରନାଥ ଯାତ୍ରାକୁ ସ୍ଥଗିତ ରଖାଯାଇଛି । ଏଠାରୁ ଦକ୍ଷିଣ କାଶ୍ମୀରର ଗୁମ୍ଫା ମନ୍ଦିର ବେସ କ୍ୟାମ୍ପକୁ ଯିବାକୁ କୌଣସି ନୂଆ ବ୍ୟାଚକୁ ଅନୁମତି ଦିଆଯାଇ ନାହିଁ। ଅଧିକାରୀମାନେ ଏହି ସୂଚନା ଦେଇଛନ୍ତି । ଶୁକ୍ରବାର ଅମରନାଥ ଗୁମ୍ଫା ନିକଟରେ ବାଦଲ ଫାଟିବା ଯୋଗୁଁ ପ୍ରାୟ ୪୦ ଜଣ ନିଖୋଜ ହୋଇଯାଇଥିବା ବେଳେ ୧୬ ଜଣଙ୍କର ମୃତ୍ୟୁ ହୋଇଥିଲା ।
ଜଣେ ଅଧିକାରୀ ଗଣମାଧ୍ୟମକୁ କହିଛନ୍ତି, ପାଗ ଅନୁକୂଳ ନ ଥିବାରୁ ଜାମ୍ମୁରୁ କାଶ୍ମୀରକୁ ଦୁଇଟି ବେସ୍ କ୍ୟାମ୍ପ ପର୍ଯ୍ୟନ୍ତ ଅମରନାଥ ଯାତ୍ରାକୁ ସ୍ଥଗିତ ରଖାଯାଇଛି। ଅମରନାଥ ଆଡକୁ ଯିବାକୁ କୌଣସି ନୂଆ ବ୍ୟାଚକୁ ଅନୁମତି ଦିଆଯାଉ ନାହିଁ। ଏହି ୪୩ ଦିନିଆ ବାର୍ଷିକ ତୀର୍ଥଯାତ୍ରା ଜୁନ୍ ୩୦ରୁ ଦୁଇଟି ମାର୍ଗ ଦେଇ ଆରମ୍ଭ ହୋଇଥିଲା। ଗୋଟିଏ ହେଉଛି ଦକ୍ଷିଣ କାଶ୍ମୀରର ଅନନ୍ତନାଗର ପହଲଗାମର ନୁନବାନ ଠାରୁ ୪୮ କିଲୋମିଟର ବିଶିଷ୍ଟ ପାରମ୍ପରିକ ମାର୍ଗ ଏବଂ ଅନ୍ୟଟି ହେଉଛି କେନ୍ଦ୍ର କାଶ୍ମୀରର ଗନ୍ଦରବାଲ ଜିଲ୍ଲାର ବାଲଟା ଠାରୁ ୧୪ କିଲୋମିଟର ଅପେକ୍ଷାକୃତ ଛୋଟ ମାର୍ଗ।
ଏପର୍ଯ୍ୟନ୍ତ ଗୁମ୍ଫା ମନ୍ଦିରରେ ଏକ ଲକ୍ଷରୁ ଅଧିକ ଭକ୍ତ ବାବା ଅମରନାଥଙ୍କ ଦର୍ଶନ କରିଛନ୍ତି। ଏହି ଯାତ୍ରା ଅଗଷ୍ଟ ୧୧ରେ ରାଧା ବୃନ୍ଦାବନ ଅବସରରେ ଶେଷ ହେବାର କାର୍ଯ୍ୟକ୍ରମ ରହିଛି। ଜୁନ୍ ୨୯ ତାରିଖରୁ ଜମ୍ମୁରେ ଭାଗବତ ନଗର ବେସ୍ କ୍ୟାମ୍ପରୁ ସମୁଦାୟ ୬୯,୫୩୫ ତୀର୍ଥଯାତ୍ରୀ ୧୦ଟି ବ୍ୟାଚରେ ଉପତ୍ୟକା ଅଭିମୁଖେ ଯାତ୍ରା କରିଥିଲେ |
ଉଲ୍ଲେଖଯୋଗ୍ୟ ଯେ ଦକ୍ଷିଣ କାଶ୍ମୀରରେ ଅବସ୍ଥିତ ପବିତ୍ର ଅମରନାଥ ଗୁମ୍ଫା ନିକଟରେ ଶୁକ୍ରବାର ସନ୍ଧ୍ୟାରେ ହୋଇଥିବା ବାଦଲ ଫଟା ବର୍ଷା ଯୋଗୁଁ ପ୍ରବଳ ଜଳ ସ୍ରୋତରେ ଅନେକ ଲୋକ ଭାସିଯାଇଥିଲେ। ଏପର୍ଯ୍ୟନ୍ତ ୧୬ ଜଣଙ୍କର ମୃତଦେହ ଉଦ୍ଧାର ହୋଇଥିବାବେଳେ ଆହୁରି ୪୦ ଜଣ ଯାତ୍ରୀ ନିଖୋଜ ଅଛନ୍ତି। ଏହି ଘଟଣାରେ ୬୫ ଜଣ ଆହତ ହୋଇଥିଲେ ।
Comments are closed.