ନୂଆଦିଲ୍ଲୀ: ଦେଶ ପାଇଁ ପୁଣିଥରେ ଟେଷ୍ଟ କ୍ରିକେଟ୍ ଖେଳିବା ଜୟଦେବ ଉନାଡକଟଙ୍କ ସ୍ୱପ୍ନ ସାକାର ହୋଇଛି। ଭାରତ ଓ ବାଂଲାଦେଶ ମଧ୍ୟରେ ଆଜିଠାରୁ ଆରମ୍ଭ ହୋଇଥିବା ଦ୍ୱିତୀୟ ଟେଷ୍ଟରେ ବାମହାତୀ ଦ୍ରୁତ ବୋଲର ଉନାଡକଟଙ୍କୁ ସୁଯୋଗ ମିଳିଛି | ପ୍ରଥମ ମ୍ୟାଚର ହିରୋ ଥିବା ବାମହାତୀ ସ୍ପିନର କୁଲଦୀପ ଯାଦବଙ୍କ ସ୍ଥାନରେ ଉନାଡକଟଙ୍କୁ ଭାରତୀୟ ଏକାଦଶରେ ସାମିଲ କରାଯାଇଛି । ସେ ୧୨ ବର୍ଷ ପରେ ଏକ ଟେଷ୍ଟ ଖେଳୁଛନ୍ତି, ଯାହାକି ଏକ ରେକର୍ଡ । ଉନାଡକଟ୍ ୨୦୧୦ରେ ଏକମାତ୍ର ଟେଷ୍ଟ ଖେଳିଥିଲେ।
୩୧ ବର୍ଷୀୟ ସୌରାଷ୍ଟ୍ରର ଦ୍ରୁତ ବୋଲର ଜୟଦେବ ଉନାଡକଟ ଡିସେମ୍ବର ୨୦୧୦ରେ ସେଞ୍ଚୁରିଅନରେ ଦକ୍ଷିଣ ଆଫ୍ରିକା ବିପକ୍ଷରେ କ୍ୟାରିୟରର ଏକମାତ୍ର ଟେଷ୍ଟ ଖେଳିଥିଲେ। ଅବଶ୍ୟ ତାଙ୍କୁ ସେହି ମ୍ୟାଚରେ ଗୋଟିଏ ବି ୱିକେଟ୍ ମିଳିନଥିଲା । ସେତେବେଳେ ଭାରତୀୟ ଦଳରେ ସଚିନ ତେନ୍ଦୁଲକର ଏବଂ ବୀରେନ୍ଦ୍ର ସେହୱାଗଙ୍କ ପରି ବଡ଼ ଖେଳାଳି ଥିଲେ । ଏହାଛଡ଼ା ଭାରତୀୟ ଦଳରେ ରାହୁଲ ଦ୍ରାବିଡ ମଧ୍ୟ ଖେଳୁଥିଲେ । ଉନାଡକଟ ଓ ଦ୍ରାବିଡ ସେହି ଟେଷ୍ଟ ମ୍ୟାଚରେ ଏକାଠି ଖେଳିଥିଲେ । କିନ୍ତୁ ଏବେ ଦୁହେଁ କୋଚ୍ ଓ ଖେଳାଳି ଭାବେ ଭାରତୀୟ ଦଳର ପ୍ରତିନିଧିତ୍ଵ କରୁଛନ୍ତି ।
୨୦୧୦ରେ ଦକ୍ଷିଣ ଆଫ୍ରିକା ବିପକ୍ଷ ସେହି ଟେଷ୍ଟ ମ୍ୟାଚରେ ଭାରତୀୟ ଦଳର ଇନିଂସ୍ ପରାଜୟ ହୋଇଥିଲା । ହୋଇଥିଲା। ପ୍ରଥମ ଇନିଂସରେ ଭାରତୀୟ ଦଳ ମାତ୍ର ୧୩୬ ରନରେ ଅଲ୍ଆଉଟ୍ ହୋଇଥିଲା। ରାହୁଲ ଦ୍ରାବିଡ ୧୪ ରନ ସଂଗ୍ରହ କରିଥିବାବେଳେ ଉନାଦକଟ୍ ଏକ ରନ୍ କରି ଅପରାଜିତ ରହିଥିଲେ। ଏହାର ଜବାବରେ ଦକ୍ଷିଣ ଆଫ୍ରିକା ୪ ୱିକେଟ୍ ହରାଇ ୬୨୦ କରିଥିଲା | ଭାରତ ଦ୍ୱିତୀୟ ଇନିଂସରେ ୪୫୯ ରନ୍ ଆଉଟ୍ ହୋଇ ଇନିଂସ୍ ପରାଜୟ ବରଣ କରିଥିଲା | ଦ୍ବିତୀୟ ଇନିଂସରେ ଦ୍ରାବିଡ ୪୩ ରନ୍ କରିଥିଲେ ଓ ଉନାଡକଟ୍ ୧ ରନ୍ ସଂଗ୍ରହ କରିଥିଲେ।
ଜୟଦେବଙ୍କ ପ୍ରଥମ ଶ୍ରେଣୀ ପ୍ରଦର୍ଶନ ଭଲ ରହିଛି | ସେ ଏପର୍ଯ୍ୟନ୍ତ ୯୬ଟି ମ୍ୟାଚରେ ୩୫୩ ୱିକେଟ୍ ନେଇଛନ୍ତି। ସେ ୨୦ ଥର ୫ ୱିକେଟ୍ ଓ ୫ ଥର ୧୦ ୱିକେଟ୍ ନେଇଛନ୍ତି। ତାଙ୍କ ସର୍ବଶ୍ରେଷ୍ଠ ପ୍ରଦର୍ଶନ ହେଉଛି ୪୧/୭ । ଏହାଛଡ଼ା ଉନାଡକଟ୍ ୭ଟି ଅର୍ଦ୍ଧଶତକ ସହାୟତାରେ ୧୭୩୨ ରନ୍ ମଧ୍ୟ କରିଛନ୍ତି। ତାଙ୍କର ସର୍ବଶ୍ରେଷ୍ଠ ସ୍କୋର ହେଉଛି ୯୨ ରନ୍ | ସେ ଭାରତ ପାଇଁ ୭ଟି ଦିନିକିଆରେ ୮ଟି ଏବଂ ୧୦ ଟି-୨୦ ଅନ୍ତର୍ଜାତୀୟ ମ୍ୟାଚରେ ୧୪ଟି ୱିକେଟ୍ ନେଇଛନ୍ତି।
Comments are closed.