ମାଉଣ୍ଟ ମାଉଙ୍ଗାନୁଇ: ପ୍ରଥମ ଟେଷ୍ଟରେ ନ୍ୟୁଜିଲ୍ୟାଣ୍ଡକୁ ୮ ୱିକେଟରେ ହରାଇ ବାଂଲାଦେଶ ଇତିହାସ ସୃଷ୍ଟି କରିଛି। ବେ ଓଭାଲରେ ଖେଳାଯାଇଥିବା ଏହି ମ୍ୟାଚରେ ନ୍ୟୁଜିଲ୍ୟାଣ୍ଡ ବାଂଲାଦେଶକୁ ୪୦ ରନ୍ର ଟାର୍ଗେଟ ଦେଇଥିଲା। ମୋମିନୁଲ ହକଙ୍କ ନେତୃତ୍ବାଧୀନ ବାଂଲାଦେଶ ୨ ୱିକେଟ୍ ହରାଇ ଏହି ଲକ୍ଷ୍ୟ ହାସଲ କରିଛି। କ୍ୟାପଟେନ ମୋମିନୁଲ ହକ ୧୩ ରନ ଏବଂ ମୁଶଫିକୁର ରହମାନ ୫ ରନରେ ଅପରାଜିତ ରହିଥିଲେ । ଯେକୌଣସି ଫର୍ମାଟରେ ନ୍ୟୁଜିଲ୍ୟାଣ୍ଡରେ ନ୍ୟୁଜିଲ୍ୟାଣ୍ଡ ଉପରେ ବାଂଲାଦେଶର ଏହା ପ୍ରଥମ ବିଜୟ | ଏହାଛଡ଼ା ବାଂଲାଦେଶ ପ୍ରଥମ ଥର ପାଇଁ ନ୍ୟୁଜିଲ୍ୟାଣ୍ଡରେ ଏକ ଟେଷ୍ଟ ମ୍ୟାଚରେ କିୱି ଦଳକୁ ହରାଇଛି | ଏହି ଐତିହାସିକ ବିଜୟ ସହିତ ବାଂଲାଦେଶ ବିଶ୍ୱ ଟେଷ୍ଟ ଚାମ୍ପିଅନସିପରେ ୧୨ ପଏଣ୍ଟ ହାସଲ କରିଛି | ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ବାଂଲାଦେଶ ୧-୦ରେ ଅଗ୍ରଣୀ ହାସଲ କରିଛି |
ପ୍ରଥମେ ବ୍ୟାଟିଂ କରି ନ୍ୟୁଜିଲ୍ୟାଣ୍ଡ ୩୨୮ ରନ୍ ସଂଗ୍ରହ କରିଥିଲା। ଏହାର ଉତ୍ତରରେ ବାଂଲାଦେଶ ୪୫୮ ରନ୍ କରି ନ୍ୟୁଜିଲ୍ୟାଣ୍ଡ ଉପରେ ୧୩୦ ରନ୍ ଅଗ୍ରଣୀ ହାସଲ କରିଥିଲା। ଦ୍ୱିତୀୟ ଇନିଂସରେ ବାଂଲାଦେଶ ବୋଲରମାନେ ନ୍ୟୁଜିଲ୍ୟାଣ୍ଡର ବ୍ୟାଟ୍ସମ୍ୟାନଙ୍କ ଉପରେ ପ୍ରାଧାନ୍ୟ ବିସ୍ତାର କରିଥିଲେ ଏବଂ ପୂରା ଦଳକୁ ୧୬୯ ରନରେ ଆଉଟ୍ କରିଦେଇଥିଲେ। ଫଳରେ ବାଂଲାଦେଶ ପାଇଁ ୪୦ ରନ୍ର ଟାର୍ଗେଟ ଧାର୍ଯ୍ୟ ହୋଇଥିଲା, ଯାହା ଦଳ ୨ ୱିକେଟ୍ ହରାଇ ହାସଲ କରିଥିଲା। ବାଂଲାଦେଶର ବିଜୟର ହିରୋ ଥିଲେ ଇବାଦତ ହୁସେନ୍ | ସେ କିୱି ଦଳର ଦ୍ୱିତୀୟ ଇନିଂସରେ ୪୬ ରନ୍ ଦେଇ ୬ଟି ୱିକେଟ୍ ନେଇଥିଲେ। ୨୦୧୩ ପରେ ବାଂଲାଦେଶର କୌଣସି ବୋଲର ବିଦେଶରେ ୫ ୱିକେଟ୍ ନେଇଛନ୍ତି । ୯ ବର୍ଷ ପୂର୍ବେ ଜିମ୍ବାୱେରେ ରବିଉଲ ଇସଲାମ ୫ ୱିକେଟ୍ ନେଇଥିଲେ।
ବାଂଲାଦେଶ ଏହି ଟେଷ୍ଟ ପୂର୍ବରୁ ନ୍ୟୁଜିଲ୍ୟାଣ୍ଡରେ ଗୋଟିଏ ବି ମ୍ୟାଚ୍ ଜିତିନଥିଲା। ୨୦୧୭ରେ ୫୯୫/୮ ବିଶାଳ ସ୍କୋର କରିବା ସତ୍ତ୍ୱେ ବାଂଲାଦେଶ ପରାସ୍ତ ହୋଇଥିଲା ।
ଏହି ମ୍ୟାଚ୍ ପୂର୍ବରୁ ବାଂଲାଦେଶ ସେନା (ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲ୍ୟାଣ୍ଡ ଏବଂ ଅଷ୍ଟ୍ରେଲିଆ) ଦେଶରେ ଗୋଟିଏ ବି ବିଜୟ ହାସଲ କରିନଥିଲା। ବେ ଓଭାଲରେ ଅନୁଷ୍ଠିତ ପ୍ରଥମ ଟେଷ୍ଟର ପ୍ରତ୍ୟେକ ସେସନରେ ବାଂଲାଦେଶ ନ୍ୟୁଜିଲ୍ୟାଣ୍ଡ ଉପରେ ପ୍ରାଧାନ୍ୟ ବିସ୍ତାର କରିଥିଲା |
Comments are closed.