ସିନେମା ହଲ୍ ଖୋଲିବା ନିଷ୍ପତ୍ତି ପରେ ଘୋଷଣା ହେଲା ବିଗ୍ ବ୍ୟାନର୍ ଫିଲ୍ମ ଗୁଡିକର ରିଲିଜ୍ ତାରିଖ, ଦୀପାବଳିରେ ଆସିବ ‘ସୂର୍ଯ୍ୟବଂଶୀ’

ମୁମ୍ବାଇ: ମହାରାଷ୍ଟ୍ର ସରକାର ୨୨ ଅକ୍ଟୋବରରୁ ସାରା ରାଜ୍ୟରେ ସିନେମା ହଲ୍ ଓ ମଲ୍ଟିପ୍ଲେକ୍ସ ଖୋଲିବାକୁ ଘୋଷଣା କରିଛନ୍ତି। ଏହି ଘୋଷଣା ସହିତ ଦୀର୍ଘ ଦିନ ଧରି ଅଟକି ରହିଥିବା ବିଗ୍ ବ୍ୟାନର୍ ଫିଲ୍ମ ଗୁଡିକର ରିଲିଜ୍ ତାରିଖ ମଧ୍ୟ ଘୋଷଣା କରାଯାଇଛି | ଏହି କ୍ରମରେ ଆଗରେ ରହିଛି ରୋହିତ ଶେଟ୍ଟୀଙ୍କ ନିର୍ଦ୍ଦେଶିତ ଓ ଅକ୍ଷୟ କୁମାର ଅଭିନୀତ ‘ସୂର୍ଯ୍ୟବଂଶୀ’ । ଏହି ବହୁ ପ୍ରତିକ୍ଷୀତ ଫିଲ୍ମ ଦୀପାବଳିରେ ମୁକ୍ତିଲାଭ କରିବ |

ରୋହିତ ଶେଟ୍ଟୀଙ୍କ ସହ ଅନେକ ବଡ଼ ବ୍ୟାନର ମଧ୍ୟ ସେମାନଙ୍କ ଫିଲ୍ମ ରିଲିଜ୍ ତାରିଖ ଘୋଷଣା କରିପାରନ୍ତି। ପ୍ରାୟ ୧୯ଟି ଫିଲ୍ମ ରିଲିଜ୍ ଅପେକ୍ଷା ଅଛନ୍ତି | ଏହି ଫିଲ୍ମ ଗୁଡିକର ମୋଟ ବଜେଟ୍ ପ୍ରାୟ ୧୫୦୦ କୋଟି ହେବ | ଗୋଟିଏ ଫିଲ୍ମର ମୋଟ ବ୍ୟବସାୟର ପ୍ରାୟ ୪୦% ରାଜସ୍ୱ ମହାରାଷ୍ଟ୍ରରୁ ଆସିଥାଏ | ମହାରାଷ୍ଟ୍ରରେ ସିନେମା ହଲ୍ ଖୋଲିବା ସହିତ ବକ୍ସ ଅଫିସରେ ଫିଲ୍ମ ଇଣ୍ଡଷ୍ଟ୍ରିର ପୁରୁଣା ଚମକ ମଧ୍ୟ ଫେରିବ ବୋଲି ଆଶା କରାଯାଉଛି |

ମହାରାଷ୍ଟ୍ର ସରକାରଙ୍କ ନିଷ୍ପତ୍ତି ପରେ ଖୁବ ଶୀଘ୍ର ନିର୍ମାତା-ନିର୍ଦ୍ଦେଶକ ରୋହିତ ଶେଟ୍ଟୀଙ୍କ ଫିଲ୍ମ ”ସୂର୍ଯ୍ୟବଂଶୀ” ଦୀପାବଳିରେ ରିଲିଜ୍ କରିବାକୁ ଘୋଷଣା କରିଛନ୍ତି। ଏହାଛଡ଼ା ୧୪ ଜାନୁଆରୀ ୨୦୨୨ରେ ‘ରାଧେଶ୍ୟାମ୍’ର ରିଲିଜ୍ ତାରିଖ ଘୋଷଣା କରାଯାଇଛି। ସେହିଭଳି ଡିସେମ୍ବର ୨୦୨୧ ରେ ‘ତଡପ୍’ର ରିଲିଜ୍ ହେବ ବୋଲି କୂହାଯାଇଛି।