ନୂଆଦିଲ୍ଲୀ: ଦେଶରେ ପୁଣି ମୁଣ୍ଡ ଟେକିବାରେ ଲାଗିଛି କରୋନା । ଗତ ଦୁଇ ଦିନ ଧରି ଦୈନିକ ସଂକ୍ରମଣ ୧୦୦୦ ଛୁଇଁବା ପରେ ସ୍ୱାସ୍ଥ୍ୟ ମନ୍ତ୍ରଣାଳୟ ଆଲର୍ଟ ହୋଇଛି ।
ଗତ ୨୪ ଘଣ୍ଟାରେ ଦେଶରେ ଆଉ ୯୧୮ଟି ନୂଆ ମାମଲା ସାମ୍ନାକୁ ଆସିଛି। ସେହିପରି ଗତକାଲି ୧୦୭୨ ନୂଆ ମାମଲା ଚିହ୍ନଟ ହୋଇଥିଲା। ଏଚ୍୩ଏନ୍୨ ଇନଫ୍ଲୁଏଞ୍ଜା ଚିନ୍ତା ମଧ୍ୟରେ କୋଭିଡ୍-୧୯ ମାମଲା ବଢୁଥିବାରୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସଂଶୋଧିତ ଗାଇଡଲାଇନ୍ ଜାରି କରିଛି।
ସଂକ୍ରମଣର ନୂଆ ଲହରକୁ ନିୟନ୍ତ୍ରଣ କରିବା ପାଇଁ କେନ୍ଦ୍ର ଜାରି କରିଥିବା ନୂଆ ଗାଇଡଲାଇନ୍ ଅନୁଯାୟୀ ଭାଇରାଲ୍ ସଂକ୍ରମଣ ନିଶ୍ଚିତ ନ ନହେବା ପର୍ଯ୍ୟନ୍ତ ଆଣ୍ଟିବାୟୋଟିକ୍ ବ୍ୟବହାର ମନା କରାଯାଇଛି । ଅନ୍ୟ ସଂକ୍ରମଣ ସହିତ କୋଭିଡ୍-୧୯ ର ସହସଂକ୍ରମଣର ସମ୍ଭାବନାକୁ ବିଚାର କରାଯିବା ଉଚିତ୍ | କୋଭିଡ୍-୧୯ ଜାତୀୟ ଟାସ୍କ ଫୋର୍ସ ଦ୍ବାରା ଜାରି ସଂଶୋଧିତ ଗାଇଡଲାଇନରେ କୁହାଯାଇଛି ଯେ ସାମାନ୍ୟ ଲକ୍ଷଣ ଥିଲେ କର୍ଟିକୋ ଷ୍ଟେରଏଡ ସୁପାରିସ କରାଯିବା ଠିକ୍ ନୁହେଁ।
ସଂଶୋଧିତ ଗାଇଡଲାଇନରେ କୋଭିଡ୍-୧୯ ପାଇଁ ହାଇଡ୍ରୋକ୍ସିକ୍ଲୋରୋକାଇନ୍, ଆଇଭର୍ମେକ୍ଟିନ୍, ମୋଲାନୁପାଭିର ଏବଂ ଫାଭିପିରାଭିର ଭଳି ଔଷଧ ସେବନ କରିବାକୁ ମନା କରାଯାଇଛି । ମଧ୍ୟମ କିମ୍ବା ଗୁରୁତର ଲକ୍ଷଣ ଥିଲେ ରୋଗୀମାନେ ‘ପାଞ୍ଚ ଦିନ ପର୍ଯ୍ୟନ୍ତ ରେମେଡେସିଭର୍ ନେବାକୁ ପରାମର୍ଶ ଦିଆଯାଇଛି ।
ଗୁରୁତର କିମ୍ବା ଆଇସିୟୁରେ ଭର୍ତ୍ତି ହେବାର ୨୪ ରୁ ୪୮ ଘଣ୍ଟା ମଧ୍ୟରେ ଟୋସିଲିଜୁମାବ ନିଆଯାଇପାରେ | ସାମାନ୍ୟ ଲକ୍ଷଣ ଥିବା ରୋଗୀଙ୍କ କ୍ଷେତ୍ରରେ ଶାରୀରିକ ଦୂରତା, ଘର ଭିତରେ ମାସ୍କର ବ୍ୟବହାର, ହାତ ଧୋଇବା, ରୋଗ ପ୍ରତିଷେଧକ ପରିଚାଳନା, ଶରୀର ତାପମାତ୍ରା ଏବଂ ଅମ୍ଲଜାନ ଯାଞ୍ଚ୍ କରିବାକୁ ପରାମର୍ଶ ଦିଆଯାଇଛି ।