ନୂଆଦିଲ୍ଲୀ: କୃଷକଙ୍କ ଆନ୍ଦୋଳନ ସମୟରେ ପ୍ରାଣ ହରାଇଥିବା ଚାଷୀଙ୍କ ସମ୍ପର୍କରେ ଏବଂ ସେମାନଙ୍କ ବିରୋଧରେ ପଞ୍ଜୀକୃତ ମାମଲା ସମ୍ପର୍କରେ କୌଣସି ସୂଚନା ନାହିଁ ବୋଲି କେନ୍ଦ୍ର ସରକାର କହିଛନ୍ତି। ଏପରି ପରିସ୍ଥିତିରେ ମୃତ ଆର୍ଥିକ ସହାୟତା ତଥା କ୍ଷତିପୂରଣ ଦେବାର ପ୍ରଶ୍ନ ଉଠୁନି ବୋଲି ଏକ ପ୍ରଶ୍ନର ଉତ୍ତରରେ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମର ଲୋକସଭାରେ ଏହି ଲିଖିତ ଉତ୍ତର ଦେଇଛନ୍ତି।
ସଂସଦରେ ପ୍ରଶ୍ନ ଉଠିଥିଲା ଯେ ଆନ୍ଦୋଳନ ସମୟରେ ମୃତ୍ୟୁବରଣ କରିଥିବା ଚାଷୀଙ୍କ ପାଖରେ ସରକାରଙ୍କର କୌଣସି ତଥ୍ୟ ଅଛି କି ନାହିଁ ଏବଂ ସରକାର ସେମାନଙ୍କ ପରିବାରକୁ ଆର୍ଥିକ ସହାୟତା ଦେବାକୁ ଚିନ୍ତା କରୁଛନ୍ତି କି? ଏହାର ଜବାବରେ କୃଷି ମନ୍ତ୍ରୀଙ୍କ ଏହି ଉତ୍ତର ଆସିଛି। ମନ୍ତ୍ରୀ ଏହି ଗୃହକୁ ମଧ୍ୟ କହିଛନ୍ତି ଯେ କେନ୍ଦ୍ର ସରକାର କୃଷକ ନେତାଙ୍କ ସହ ୧୧ ରାଉଣ୍ଡ ଆଲୋଚନା କରିଛନ୍ତି କିନ୍ତୁ ସମାଧାନ ବାହାରି ନଥିଲା।
ଅନ୍ୟପକ୍ଷରେ କୃଷକ ସଂଗଠନ ଦାବି କରିଛନ୍ତି ଯେ ଆନ୍ଦୋଳନ ସମୟରେ ୭୦୦ ରୁ ଅଧିକ ଚାଷୀଙ୍କ ମୃତ୍ୟୁ ଘଟିଛି। ସୂଚନାଯୋଗ୍ୟ ଯେ ୧୧ ଦିନ ତଳେ ରାଷ୍ଟ୍ରକୁ ସମ୍ବୋଧିତ କରି ପ୍ରଧାନମନ୍ତ୍ରୀ ତିନୋଟି କୃଷି ଆଇନ ପ୍ରତ୍ୟାହାର ଘୋଷଣା କରିଥିଲେ ଏବଂ ଏଥିପାଇଁ କୃଷକମାନଙ୍କୁ କ୍ଷମା ମାଗିଥିଲେ।