ନ୍ୟୁଜ୍ ଏଜେନ୍ସି ‘ଆଇଏଏନ୍ଏସ୍’ ଉପରେ ଆଦାନୀ ଗ୍ରୁପର ପୂର୍ଣ୍ଣ ନିୟନ୍ତ୍ରଣ, ଅଂଶଧନ ୯୯ ପ୍ରତିଶତକୁ ବୃଦ୍ଧି

ନୂଆଦିଲ୍ଲୀ: ଶିଳ୍ପପତି ଗୌତମ ଆଦାନୀଙ୍କ ଗ୍ରୁପ୍ ନ୍ୟୁଜ୍ ଏଜେନ୍ସି ଆଇଏଏନ୍ଏସ୍ ଇଣ୍ଡିଆ ପ୍ରାଇଭେଟ୍ ଲିମିଟେଡର ପୂର୍ଣ୍ଣ ନିୟନ୍ତ୍ରଣ ହାସଲ କରିଛି। ଆଦାନୀ ଗ୍ରୁପର ସହାୟକ କମ୍ପାନୀ ଏମଜି ମିଡିଆ ନେଟୱାର୍କ ଲିମିଟେଡ୍ ଆଇଏଏନ୍ଏସ୍ ଇଣ୍ଡିଆ ପ୍ରାଇଭେଟ ଲିମିଟେଡରେ ଏହାର ଅଂଶଧନ ବୃଦ୍ଧି କରିଛି। ଏଥିସହ ମିଡିଆ କ୍ଷେତ୍ରରେ ନିଜ ଉପସ୍ଥିତି ଆହୁରି ସୁଦୃଢ଼ କରିଛି ଆଦାନୀ ଗ୍ରୁପ୍ ।

ଗ୍ରୁପ୍ ତରଫରୁ ଷ୍ଟକ୍ ଏକ୍ସଚେଞ୍ଜରେ ଦାଖଲ ସୂଚନା ଅନୁଯାୟୀ, ଆଦାନୀ ଗ୍ରୁପ୍ ଗତ ମାସରେ ଆଇଏଏନ୍ଏସ୍ ରେ ୫୦.୫୦ ପ୍ରତିଶତ ଅଂଶଧନ କିଣିଥିଲେ | ବର୍ତ୍ତମାନ ଏହି ନ୍ୟୁଜ୍ ଏଜେନ୍ସିରେ ଭୋଟ୍ ଅଧିକାର ସହ ଆଦାନୀ ଗ୍ରୁପର ଅଂଶଧନ ୭୬ ପ୍ରତିଶତକୁ ବୃଦ୍ଧି ପାଇଛି। ଏହାଛଡ଼ା ବିନା ଭୋଟିଂ ଅଧିକାର ସହ ଏଥିରେ ଆଦାନୀ ଗ୍ରୁପର ଅଂଶଧନ ୯୯.୨୬ ପ୍ରତିଶତକୁ ବୃଦ୍ଧି ପାଇଛି |

ଏହି ଡିଲ୍ ପାଇଁ ଗ୍ରୁପ୍ ୫ କୋଟି ଟଙ୍କା ଖର୍ଚ୍ଚ କରିଛି । ୧୬ ଜାନୁୟାରୀ ୨୦୨୪ରେ ଅନୁଷ୍ଠିତ ବୈଠକରେ ଆଇଏଏନ୍ଏସ୍ ବୋର୍ଡ ଦ୍ବାରା ଆଦାନୀ ଗ୍ରୁପକୁ ସେୟାର ଆବଣ୍ଟନକୁ ଅନୁମୋଦନ କରାଯାଇଥିଲା ।

ଆଦାନୀ ଗ୍ରୁପ୍ ଗତ ବର୍ଷ ଡିସେମ୍ବର ୧୫ରେ ଆଦାନୀ ଗ୍ରୁପ୍ ଆଇଏଏନ୍ଏସ୍ ରେ ୫୦.୫୦ ପ୍ରତିଶତ ଅଂଶଧନ ହାସଲ କରିଥିଲା ​​| ଏହି ଡିଲର ମୂଲ୍ୟ ପ୍ରକାଶ କରାଯାଇ ନଥିଲା।

ଆଇଏଏନ୍ଏସ୍ ର ପ୍ରାଧିକୃତ ସେୟାର ପୁଞ୍ଜି ହେଉଛି ୧୧ କୋଟି | ୨୦୨୨-୨୩ ଆର୍ଥିକ ବର୍ଷରେ ଏହାର ଆୟ ୧୧.୮୬ କୋଟି ଥିଲା |

ଗତ ବର୍ଷ ମାର୍ଚ୍ଚ ମାସରେ କ୍ୱିଣ୍ଟିଲିୟନ୍ ବିଜନେସ୍ ମିଡିଆ ଅଧିଗ୍ରହଣ ସହିତ ଆଦାନୀ ଗ୍ରୁପ୍ ମିଡିଆ ବ୍ୟବସାୟରେ ପ୍ରବେଶ କରିଥିଲା । କ୍ୱିଣ୍ଟିଲିୟନ୍ ବିଜନେସ୍ ମିଡିଆ ବିକ୍ୟୁ ପ୍ରାଇମ୍ ନାମକ ଆର୍ଥିକ ସମ୍ବାଦ ଡିଜିଟାଲ୍ ମିଡିଆ ପ୍ଲାଟଫର୍ମ ପରିଚାଳନା କରେ | ଏହା ପରେ ଡିସେମ୍ବରରେ ଏହା ନ୍ୟୁଜ୍ ଚ୍ୟାନେଲ ଏନଡିଟିଭିର ପ୍ରାୟ ୬୫ ପ୍ରତିଶତ ଅଂଶଧନ କିଣିଥିଲା ​​|