ସୁନ୍ଦରଗଡ଼ ଜିଲ୍ଲାରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପ କାର୍ଯ୍ୟର ସମୀକ୍ଷା କଲେ ୫-ଟି ଅଧ୍ୟକ୍ଷ

ଭୁବନେଶ୍ୱର – ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ସୁନ୍ଦରଗଡ଼ ଜିଲ୍ଲାକୁ ଦୁଇଦିନିଆ ଗସ୍ତରେ ଯାଇଥିବା ୫-ଟି ତଥା ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଆଜି ସୁନ୍ଦରଗଡ଼ର ସମଲେଶ୍ବରୀ ମନ୍ଦିରର ଉନ୍ନତିକରଣ କାର୍ଯ୍ୟର ଅଗ୍ରଗତି ସମୀକ୍ଷା କରିଥିଲେ। ଶେଷଥର ପାଇଁ ପାଣ୍ଡିଆନ ସୁନ୍ଦରଗଡ଼ ଯାଇଥିବା ବେଳେ ମନ୍ଦିରର ଉନ୍ନତି ପାଇଁ ସ୍ଥାନୀୟ ଲୋକେ ଅନୁରୋଧ କରିଥିଲେ। ଏହାଛଡା ୫-ଟି ଅଧ୍ୟକ୍ଷ ରାଉରକେଲାରେ ବେଦବ୍ୟାସ ମନ୍ଦିର, ଘୋଗରର ଶିବ ମନ୍ଦିର ଓ ବେଲସରା ଶିବ ମନ୍ଦିରର ଉନ୍ନତିକରଣ କାର୍ଯ୍ୟର ସମୀକ୍ଷା କରିଥିଲେ । ଗତ ୧୦ ବର୍ଷ ଧରି ନିର୍ମାଣ ହେଉଥିବା ରାଜଗାଙ୍ଗପୁର ରେଲୱେ ଓଭର ବ୍ରିଜର ଅଗ୍ରଗତିର ବି ସମୀକ୍ଷା କରିଛନ୍ତି ୫-ଟି ଅଧ୍ୟକ୍ଷ । ଜିଲ୍ଲାକୁ ନିଜର ପୂର୍ବ ଗସ୍ତ ବେଳେ ସ୍ଥାନୀୟ ଲୋକେ ରେଲୱେ ଓଭରବ୍ରିଜ ନିର୍ମାଣ କାର୍ଯ୍ୟ ତ୍ବରାନ୍ବିତ କରିବାକୁ ୫-ଟି ଅଧ୍ୟକ୍ଷଙ୍କୁ ଅନୁରୋଧ କରିଥିଲେ। ଏହାପରେ ଦୀର୍ଘଦିନ ଧରି ପଡିରହିଥିବା ଜମିଜମା ସମସ୍ୟାର ସମାଧାନ ହୋଇଥିଲା ଓ ପ୍ରକଳ୍ପ କାର୍ଯ୍ୟ ପୁଣି ଆରମ୍ଭ ହୋଇଥିଲା ।

ଆଜି ମଧ୍ୟ ୫-ଟି ସଚିବ ସୁନ୍ଦରଗଡ ଜିଲ୍ଲାର ଅନ୍ୟ ଉନ୍ନୟନମୂଳକ ପ୍ରକଳ୍ପର ସମୀକ୍ଷା କରିଥିଲେ । କୁତ୍ରା, ରାଜଗାଙ୍ଗପୁର, ଗୁରୁଣ୍ଡିଆ, ଲହୁଣୀପଡ଼ା, କୋଏଡା, ନୂଆଗାଁ ଓ କୁଆଁରମୁଣ୍ଡା ବ୍ଲକକୁ ପାନୀୟ ଜଳ ଯୋଗାଣ ପାଇଁ ମେଗା ପ୍ରକଳ୍ପ କାର୍ଯ୍ୟ, ଗୁରୁତ୍ୱପୂର୍ଣ୍ଣ ପୋଲ ସହ କୁଆଁରମୁଣ୍ଡା, ନୂଆଗାଁ ଓ ବିଶ୍ରାମ ବ୍ଳକରେ ସିନ୍ଥେଟିକ ଟର୍ଫ ହକି ଟ୍ରେନିଂ ସେଣ୍ଟର ଆଦିର ନିର୍ମାଣ କାର୍ଯ୍ୟର ସମୀକ୍ଷା କରିଛନ୍ତି ୫-ଟି ଅଧ୍ୟକ୍ଷ। ସୁନ୍ଦରଗଡ଼ ଜିଲ୍ଲାକୁ ଗତବର୍ଷ ମାର୍ଚ୍ଚରେ ଯାଇଥିବା ବେଳେ ସେ ବିଭିନ୍ନ ଜାଗାରେ ଜନଶୁଣାଣିରେ ପାଇଥିବା ଦରଖାସ୍ତ ଓ ପବ୍ଲିକ ଫିଡବ୍ୟାକ ଆଧାରରେ ଜିଲ୍ଲାର କିଛି ପ୍ରମୁଖ ପ୍ରକଳ୍ପ ହାତକୁ ନିଆଯାଇଥିଲା ।

୨୦୧୯ରେ ଯେତେବେଳେ ଆନ୍ତର୍ଜାତିକ ହକି ମହାସଂଘ ଓଡ଼ିଶାରେ ୨୦୨୩ ବିଶ୍ୱକପ୍ ହକି ଆୟୋଜନ ପାଇଁ ଘୋଷଣା କରିଥିଲା । ରାଉରକେଲାକୁ ହକି ବିଶ୍ୱକପର ଦ୍ୱିତୀୟ ଆୟୋଜକ ଭେନ୍ୟୁ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦାବି କରିଥିଲେ ବୋଲି ଜନସାଧାରଣଙ୍କ ସହ ଆଲୋଚନାରେ ପ୍ରକାଶ କରିଛନ୍ତି ୫-ଟି ଅଧ୍ୟକ୍ଷ । ଭୁବନେଶ୍ୱର ଓଡ଼ିଶାର ରାଜଧାନୀ ହେଲେ ମଧ୍ୟ ରାଉରକେଲା ଓଡ଼ିଶାର ହକି ରାଜଧାନୀ ବୋଲି ମୁଖ୍ୟମନ୍ତ୍ରୀ ଆନ୍ତର୍ଜାତିକ ହକି ମହାସଂଘକୁ କହିଥିଲେ ବୋଲି ପାଣ୍ଡିଆନ ଲୋକଙ୍କ ସହ ଆଲୋଚନା ବେଳେ ଉଲ୍ଲେଖ କରିଥିଲେ। ତେବେ, ରାଉରକେଲାରେ ହକି ଷ୍ଟାଡିୟମ, ଏୟାରପୋର୍ଟ ଓ ହୋଟେଲ୍ ନଥିବାରୁ ଆନ୍ତର୍ଜାତିକ ହକି ମହାସଂଘ ଆପତ୍ତି ପ୍ରକାଶ କରିଥିଲା । ତେବେ ସବୁ ବ୍ୟବସ୍ଥା କରିବାକୁ ମୁଖ୍ୟମନ୍ତ୍ରୀ ଏଫଆଇଏଚକୁ ନିର୍ଭର ପ୍ରତିଶ୍ରୁତି ଦେଇଥିଲେ। କୋଭିଡ୍ ମହାମାରୀ ଓ ବିଳମ୍ବ ସତ୍ତ୍ଵେ ହକି ଷ୍ଟାଡିୟମ୍, ୨୨୫ ରୁମ୍ ବିଶିଷ୍ଟ ରହଣୀସ୍ଥଳ ଓ ଏୟାରପୋର୍ଟ ରେକର୍ଡ ସମୟରେ ନିର୍ମାଣ କରାଗଲା ବୋଲି ୫-ଟି ଅଧ୍ୟକ୍ଷ କହିଥିଲେ । ହକି ଷ୍ଟାଡିୟମକୁ ବିଶିଷ୍ଟ ସ୍ବାଧୀନତା ସଂଗ୍ରାମୀ ବିର୍ସା ମୁଣ୍ଡାଙ୍କ ନାମରେ ନାମିତ କରାଗଲା । ରେକର୍ଡ ୧୫ ମାସ ମଧ୍ୟରେ ବିର୍ସା ମୁଣ୍ଡା ହକି ଷ୍ଟାଡିୟମର ନିର୍ମାଣ କରାଗଲା । ସର୍ବାଧିକ ଦର୍ଶକ ବସିପାରୁଥିବା ଏହି ଷ୍ଟାଡିୟମ ବିଶ୍ୱର ବୃହତ୍ତମ ହକି ଷ୍ଟାଡିୟମ ଭାବେ ଗିନିଜ ବୁକ୍ ଅଫ୍ ରେକର୍ଡସରେ ସ୍ଥାନ ପାଇଛି। ଭାରତୀୟ ହକିକୁ ସୁନ୍ଦରଗଡ଼ ଅବଦାନ ପାଇଁ ଏହା ଏକ ସମ୍ମାନ ବୋଲି ମୁଖ୍ୟମନ୍ତ୍ରୀ କହିଥିବା ନେଇ ପାଣ୍ଡିଆନ ପ୍ରକାଶ କରିଥିଲେ।

ରାଜଗାଙ୍ଗପୁର, ନୂଆଗାଁ ଓ ବଣାଇ ବ୍ଲକରେ ଜନସାଧାରଣଙ୍କ ସହ ଆଲୋଚନା କରି ଆପତ୍ତି ଅଭିଯୋଗ ଗ୍ରହଣ କରିଥିଲେ ୫-ଟି ଅଧ୍ୟକ୍ଷ। ଖୁବ୍ ଶୀଘ୍ର ସମସ୍ୟାର ସମାଧାନ ପାଇଁ ସେ ପ୍ରତିଶ୍ରୁତି ଦେଇଛନ୍ତି।