ଆଜି ମୁଖ୍ୟମନ୍ତ୍ରୀଙ୍କ ଗଞ୍ଜାମ ଗସ୍ତ: ଭେଟି ଦେବେ ବହୁ ପ୍ରକଳ୍ପ, ସୁପର୍ ସ୍ପେଶିଆଲିଟି ହସ୍ପିଟାଲ୍ ଲୋକାର୍ପଣ

ବ୍ରହ୍ମପୁର: ଗଞ୍ଜାମ ଜିଲ୍ଲାକୁ ଆଜି ଦିନିକିଆ ଗସ୍ତରେ ଆସୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ତାଙ୍କ ସହ ଆସୁଛନ୍ତି ୫-ଟି ତଥା ନବୀନ ଓଡ଼ିଶା ଅଧ୍ୟକ୍ଷ ଭି.କାର୍ତ୍ତିକ ପାଣ୍ଡିଆନ। ମୁଖ୍ୟମନ୍ତ୍ରୀ ପ୍ରଥମେ ନିଜ ବିଧାନସଭା ନିର୍ବାଚନମଣ୍ଡଳୀ ଅନ୍ତର୍ଗତ ଶେରଗଡ଼ ବ୍ଲକ୍ ଯିବେ। ଶେରଗଡ଼ ବସଷ୍ଟାଣ୍ଡ ଠାରେ ଆୟୋଜିତ କାର୍ଯ୍ୟକ୍ରମରେ ବହୁ ପ୍ରକଳ୍ପ ଅଞ୍ଚଳବାସୀଙ୍କ ସକାଶେ ଉଦଘାଟନ କରିବା ସହ ଆଉ କିଛି ପ୍ରକଳ୍ପ ନିମନ୍ତେ ଶୁଭ ଦେବେ। ଶେରଗଡ଼ ବ୍ଲକର ସବୁ ପଞ୍ଚାୟତକୁ ପାଇପ୍ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଣ, ନୂଆ ଆଧୁନିକ ବସଷ୍ଟାଣ୍ଡ ଲୋକାର୍ପଣ କରି ଶେରଗଡ଼ବାସୀଙ୍କୁ ଭେଟି ଦେବେ ସେମାନଙ୍କୁ ପ୍ରିୟ ବିଧାୟକ ତଥା ମୁଖ୍ୟମନ୍ତ୍ରୀ। ଏହାପରେ ସେଠାରେ ସାଧାରଣ ସମାବେଶରେ ଉଦବୋଧନ ଦେବେ। ଗ୍ରାମାଞ୍ଚଳର ବିକାଶ ନିମନ୍ତେ ସମସ୍ତଙ୍କ ସହଯୋଗ ପାଇଁ ଆହ୍ବାନ ଦେବେ ମୁଖ୍ୟମନ୍ତ୍ରୀ।

ଏହାପରେ ସେ ହେଲିକ୍ୟାପ୍ଟର୍ ଯୋଗେ ଆସି ଶୀତଳାପଲ୍ଲୀ ଠାରେ ଓହ୍ଲାଇବେ। ପ୍ରଥମେ ୨୦୦ ଶଯ୍ୟା ବିଶିଷ୍ଟ ସମ୍ ସୁପର୍ ସ୍ପେଶିଆଲିଟି ହସ୍ପିଟାଲ୍ ଲୋକାର୍ପଣ କରିବେ। ଏଠାରେ ସାଧାରଣ ଲୋକ ସୁଲଭ ମୂଲ୍ୟରେ ଉନ୍ନତ ସ୍ବାସ୍ଥ୍ୟସେବା ପାଇପାରିବେ। ଗରିବ ଲୋକ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ଉତ୍ତମ ଚିକିତ୍ସା ସୁବିଧା ପାଇପାରିବେ। ସେଠାରୁ ବାହାରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିକଟସ୍ଥ ପାରଳା ମହାରାଜା ଇଞ୍ଜିନିୟରିଂ କଲେଜ ପଡ଼ିଆରେ ଅନୁଷ୍ଠିତ ସାଧାରଣ ସଭାରେ ଗଞ୍ଜାମ ଜିଲ୍ଲାବାସୀଙ୍କ ପାଇଁ ବହୁ ପ୍ରକଳ୍ପର ଲୋକାର୍ପଣ ତଥା ଶିଳାନ୍ୟାସ କରାଯିବ। ଘଟକେଶ୍ବର ବହୁମୁଖୀ ଜଳ ପ୍ରକଳ୍ପ ଉଦଘାଟନ, ହରଭଙ୍ଗି ସମ୍ପ୍ରସାରିତ ପ୍ରକଳ୍ପ, ଛେଳିଗଡ ଟନେଲ୍ ଓ ଡ୍ୟାମ୍, ଜାନିବିଲି ବ୍ୟାରେଜ ସମେତ ବହୁ ପ୍ରକଳ୍ପ ଜିଲ୍ଲାବାସୀଙ୍କୁ ଭେଟି ଦେବେ ମୁଖ୍ୟମନ୍ତ୍ରୀ। ଅନେକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ। ଏହାପରେ ସେଠାରେ ଆୟୋଜିତ ସାଧାରଣ ସଭାରେ ସମବେତ ହଜାର ହଜାର ପୁରୁଷ ଓ ମହିଳାଙ୍କ ସମେତ ବିଜେଡି ନେତା ଓ କର୍ମୀ ଏବଂ ନିର୍ବାଚିତ ଜନ ପ୍ରତିନିଧିଙ୍କୁ ଉଦବୋଧନ ଦେବା କାର୍ଯ୍ୟକ୍ରମ ରହିଛି। ତତ୍ ପରେ ନିଜ ଗସ୍ତ ସାରି ସେ ଓ ୫-ଟି ଅଧ୍ୟକ୍ଷ ଭୁବନେଶ୍ବର ଫେରିଯିବେ। ଏହି ଗସ୍ତ ନେଇ ପ୍ରସ୍ତୁତି ଚୂଡ଼ାନ୍ତ ହୋଇସାରିଥିଲା ବେଳେ ପ୍ରଶାସନ ତତ୍ପର ରହିଛି ଓ ଦଳୀୟ ନେତା, କର୍ମୀ ମହଲରେ ଭରପୁର ଉତ୍ସାହ ଦେଖିବାକୁ ମିଳିଛି।