ପିଏନବି ଆକାଉଣ୍ଟ ଠାରୁ ଡ୍ରାଇଭିଂ ଲାଇସେନ୍ସ ପର୍ଯ୍ୟନ୍ତ, ଆଜିଠାରୁ ବଦଳିବ ଏହି ୫ ନିୟମ

ନୂଆଦିଲ୍ଲୀ: ଆଜିଠାରୁ ନୂଆ ମାସ (ଜୁନ୍) ଆରମ୍ଭ ହୋଇଛି । ନୂଆ ମାସର ପ୍ରଥମ ଦିନରେ ୧୯ କେଜି କମର୍ସିଆଲ ଗ୍ୟାସ ସିଲିଣ୍ଡର ୭୨ ଟଙ୍କା ଶସ୍ତା ହୋଇଛି। ଏଥି ସହିତ ବିମାନରେ ବ୍ୟବହାର ଟର୍ବାଇନ ଇନ୍ଧନ (ଏଟିଏଫ) ଦର ହ୍ରାସ ପାଇବା ଯୋଗୁଁ ବିମାନ ଯାତ୍ରା ଶସ୍ତା ହେବା ସମ୍ଭାବନା ରହିଛି।

ଆଜିଠୁ ଡ୍ରାଇଭିଂ ଲାଇସେନ୍ସ ପାଇଁ ସରକାରୀ ଟ୍ରେନିଂ କେନ୍ଦ୍ରକୁ ଯିବାକୁ ପଡ଼ିବ ନାହିଁ। ଡ୍ରାଇଭିଂ ଲାଇସେନ୍ସ ପାଇଁ ଏଣିକି ଆପଣ ଘରୋଇ ତାଲିମ କେନ୍ଦ୍ର କିମ୍ବା ଡ୍ରାଇଭିଂ ସ୍କୁଲକୁ ଯାଇ ଡ୍ରାଇଭିଂ ଟେଷ୍ଟ ଦେଇପାରିବେ । ତିନି ବର୍ଷରୁ ଅଧିକ ସମୟ ଧରି ଅଚଳ ଥିବା ପଞ୍ଜାବ ନ୍ୟାସନାଲ ବ୍ୟାଙ୍କର ଆକାଉଣ୍ଟ ଗୁଡ଼ିକ ଆଜିଠାରୁ ବନ୍ଦ କରି ଦିଆଯିବ।

ଆସନ୍ତୁ ଜାଣିବା ୫ଟି ପରିବର୍ତ୍ତନ ଯାହା ଆଜିଠାରୁ କାର୍ଯ୍ୟକାରୀ ହେବ..

୧. କମର୍ସିଆଲ ଗ୍ୟାସ ସିଲିଣ୍ଡର ଦର ୭୨ ଟଙ୍କା ହ୍ରାସ

ତୈଳ ମାର୍କେଟିଂ କମ୍ପାନୀଗୁଡିକ ଆଜିଠାରୁ ୧୯ କେଜି କମର୍ସିଆଲ ସିଲିଣ୍ଡରର ମୂଲ୍ୟ ୭୨ ଟଙ୍କା ହ୍ରାସ କରିଛନ୍ତି। ଦିଲ୍ଲୀରେ କମର୍ସିଆଲ ଗ୍ୟାସ ସିଲିଣ୍ଡର ୬୯.୫୦ ଟଙ୍କା ହ୍ରାସ ପାଇ ୧୬୭୬ ଟଙ୍କା ହୋଇଛି। ଏହା ପୂର୍ବରୁ ଏହା ୧୭୪୫.୫୦ ଟଙ୍କା ଥିଲା । କୋଲକାତାରେ କମର୍ସିଆଲ ସିଲିଣ୍ଡର ବର୍ତ୍ତମାନ ୧୭୮୭ ଟଙ୍କାରେ ଉପଲବ୍ଧ। ମୁମ୍ବାଇରେ ଏହା ୧୬୯୮.୫୦ ରୁ ୧୬୨୯ ଟଙ୍କାକୁ ହ୍ରାସ ପାଇଛି। ଚେନ୍ନାଇରେ ଏବେ ୧୮୪୦.୫୦ ଟଙ୍କାରେ ଉପଲବ୍ଧ ହେବ କମର୍ସିଆଲ ଏଲପିଜି ସିଲିଣ୍ଡର । ତେବେ ୧୪.୨ କେଜି ଘରୋଇ ଗ୍ୟାସ ସିଲିଣ୍ଡରର ଦରରେ କୌଣସି ପରିବର୍ତ୍ତନ ହୋଇନାହିଁ |

୨: ଏଟିଏଫ୍ ମୂଲ୍ୟ ୭,୦୪୪.୯୫ ଟଙ୍କା କମିଲା, ଶସ୍ତା ହୋଇପାରେ ବିମାନ ଯାତ୍ରା

ତୈଳ କମ୍ପାନୀ ଗୁଡ଼ିକ ଆଭିଏସନ ଟର୍ବାଇନ ଇନ୍ଧନ (ଏଟିଏଫ)ର ମୂଲ୍ୟ ହ୍ରାସ କରିଛନ୍ତି | ଏହା ଦ୍ବାରା ବିମାନ ଯାତ୍ରା ଶସ୍ତା ହୋଇପାରେ | ଇଣ୍ଡିଆନ୍ ଅଏଲ୍ ର ୱେବସାଇଟ୍ ଅନୁଯାୟୀ, ଦିଲ୍ଲୀରେ ଏଟିଏଫ୍ ୬୬୭୩.୮୭ ଟଙ୍କା ଶସ୍ତା ହୋଇ କିଲୋମିଟର ପିଛା ୯୪,୯୬୯.୦୧ ଟଙ୍କା (୧୦୦୦ ଲିଟର)ରେ ପହଞ୍ଚିଛି। ଚେନ୍ନାଇରେ, ଏଟିଏମ୍ ୭,୦୪୪.୯୫ ରୁ କିଲୋମିଟର ପିଛା ୯୮,୫୫୭.୧୪ ଟଙ୍କା ଶସ୍ତା ହୋଇଛି।

୩. ଆଧାର-ପାନ୍ ଲିଙ୍କ୍ ହୋଇନଥିଲେ, ଆଜିଠାରୁ ଅଧିକ ଟ୍ୟାକ୍ସ ଦେବାକୁ ପଡ଼ିବ

ଯଦି ଆପଣ ନିଜ ପାନ୍ ସହ ଆଧାର ଲିଙ୍କ୍ କରିନାହାଁନ୍ତି, ତେବେ ଆଜିଠାରୁ ଅଧିକ ଟିଡିଏସ୍ କଟିବ । ଆୟକର ବିଭାଗ ଟିକସ ଦାତାମାନଙ୍କୁ ମେ ୩୧ ପୂର୍ବରୁ ପାନ୍ କାର୍ଡକୁ ଆଧାର ସହିତ ଲିଙ୍କ କରିବାକୁ ସମୟ ଦେଇଥିଲା। ବର୍ତ୍ତମାନ ପାନକୁ ଆଧାର ସହିତ ଲିଙ୍କ୍ କରିବା ପାଇଁ ୧୦୦୦ ଟଙ୍କା ଶୁଳ୍କ ଆଦାୟ କରାଯାଉଛି। ଯଦି ପାନ୍- ଆଧାର ଲିଙ୍କ ହୋଇନାହିଁ, ତେବେ ପାନ୍ ମଧ୍ୟ ଅଚଳ ହୋଇଯିବ | ତେବେ ଯେଉଁ ବ୍ୟକ୍ତିମାନଙ୍କୁ ଛାଡ଼ ମିଳିଛି, ସେମାନେ ପ୍ରଭାବିତ ହେବେ ନାହିଁ ।

୪. ଡ୍ରାଇଭିଂ ଲାଇସେନ୍ସ ପାଇଁ ଆରଟିଓରେ ଏଣିକି କୌଣସି ଟେଷ୍ଟ ଦରକାର ନାହିଁ

ବର୍ତ୍ତମାନ ଡ୍ରାଇଭିଂ ଲାଇସେନ୍ସ ପାଇବା ପାଇଁ ଆଞ୍ଚଳିକ ପରିବହନ କାର୍ଯ୍ୟାଳୟ (ଆରଟିଓ) ରେ ପରୀକ୍ଷା ଦେବାର କୌଣସି ଆବଶ୍ୟକତା ନାହିଁ | ଏକ ଘରୋଇ ତାଲିମ କେନ୍ଦ୍ର କିମ୍ବା ଡ୍ରାଇଭିଂ ସ୍କୁଲକୁ ଯାଇ ଆପଣ ଆପଣଙ୍କର ଡ୍ରାଇଭିଂ ଟେଷ୍ଟ ଦେଇପାରିବେ | ସଡ଼କ ପରିବହନ ଏବଂ ରାଜପଥ ମନ୍ତ୍ରଣାଳୟ ଡ୍ରାଇଭିଂ ଲାଇସେନ୍ସ ନିୟମରେ ପରିବର୍ତ୍ତନ ଆଣିଛି, ଯାହା ଆଜିଠାରୁ ଦେଶବ୍ୟାପୀ ଲାଗୁ ହୋଇଛି।

ବର୍ତ୍ତମାନ ଯଦି ଜଣେ ନାବାଳକ ଗାଡିଉ ଚଳାଇବା ବେଳେ ଧରାପଡ଼େ, ତେବେ ତାର ବାପାମାଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏହାଛଡ଼ା ୨୫,୦୦୦ ଟଙ୍କା ଜୋରିମାନା ଦେବାକୁ ହେବ। ଏହା ବ୍ୟତୀତ ଗାଡ଼ି ମାଲିକଙ୍କ ପଞ୍ଜୀକରଣ ରଦ୍ଦ କରାଯିବା ସହ ସମ୍ପୃକ୍ତ ନାବାଳକକୁ ୨୫ ବର୍ଷ ବୟସ ନ ହେବା ପର୍ଯ୍ୟନ୍ତ ଲାଇସେନ୍ସ ଦିଆଯିବ ନାହିଁ।

୫. ତିନି ବର୍ଷ ଯାଏଁ କୌଣସି କାରବାର ନଥିବା ଆକାଉଣ୍ଟ ବନ୍ଦ ହୋଇଯିବ

ଯଦି ଆପଣଙ୍କର ବ୍ୟାଙ୍କ ଆକାଉଣ୍ଟ ପଞ୍ଜାବ ନ୍ୟାସନାଲ ବ୍ୟାଙ୍କରେ ଅଛି ଏବଂ ଆପଣ ଏଥିରେ ୩ ବର୍ଷରୁ ଅଧିକ ସମୟ ଧରି କୌଣସି କାରବାର କରିନାହାଁନ୍ତି, ତେବେ ସେହି ଆକାଉଣ୍ଟ ଆଜିଠୁ ବନ୍ଦ ହୋଇଯିବ । ବ୍ୟାଙ୍କ କହିଛି ଯେ, ଏହିପରି ସମସ୍ତ ଆକାଉଣ୍ଟଧାରୀଙ୍କୁ ଏନେଇ ନୋଟିସ୍ ଦିଆଯାଇଛି । ନୋଟିସ୍ ଦିଆଯିବା ତାରିଖ ଠାରୁ ଏକ ମାସ ପରେ ଏହି ଆକାଉଣ୍ଟ ଗୁଡ଼ିକ ବନ୍ଦ ରହିବ।