କେନ୍ଦୁଝର ଜିଲ୍ଲା ଗସ୍ତ କରି ବିଭିନ୍ନ ବିକାଶମୂଳକ କାର୍ଯ୍ୟର ସମୀକ୍ଷା କଲେ ୫-ଟି ଅଧ୍ୟକ୍ଷ

ଭୁବନେଶ୍ୱର- ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ୫-ଟି ଓ ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଆଜି କେନ୍ଦୁଝର ଜିଲ୍ଲା ଗସ୍ତ କରି ବିଭିନ୍ନ ବିକାଶମୂଳକ କାର୍ଯ୍ୟର ଅଗ୍ରଗତି ସମୀକ୍ଷା କରିଛନ୍ତି । ଗସ୍ତରେ ସେ ଛାତ୍ରଛାତ୍ରୀ ଓ ସାଧାରଣ ଲୋକଙ୍କ ସହ ଆଳାପ ଆଲୋଚନା କରିଥିଲେ। ୫-ଟି ଅଧ୍ୟକ୍ଷ ସ୍ଥାନୀୟ ଧରଣୀଧର ବିଶ୍ୱବିଦ୍ୟାଳୟ ଗ୍ରାଉଣ୍ଡରେ ଆୟୋଜିତ ନୂଆ – ଓ କାର୍ଯ୍ୟକ୍ରମରେ ସାମିଲ ହୋଇଥିଲେ । ଏହି ଅବସରରେ ସେ ଜିଲ୍ଲାର ସବୁ କଲେଜରୁ ଆସିଥିବା ଛାତ୍ରଛାତ୍ରୀମାନଙ୍କ ସହ ଆଲୋଚନା କରି ନୂଆ -ଓ କାର୍ଯ୍ୟକ୍ରମ କିପରି ସେମାନଙ୍କ ପାଇଁ ଉପାଦେୟ ହୋଇପାରୁଛି , ସେ ବିଷୟରେ ଆଲୋକପାତ କରିଥିଲେ। ଜୀବନରେ ସଫଳତା ପାଇଁ କଠୋର ପରିଶ୍ରମ ଓ ଆତ୍ମବିଶ୍ଵାସର ଆଗକୁ ବଢ଼ିବାକୁ ହେବ ବୋଲି କହିଥିଲେ ୫-ଟି ଅଧ୍ୟକ୍ଷ। ଫେବ୍ରୁଆରୀ ସୁଦ୍ଧା ଜିଲ୍ଲାରେ କଲେଜ ରୂପାନ୍ତରଣ ପ୍ରକଳ୍ପ ସବୁ ସମ୍ପୂର୍ଣ୍ଣ ହେବ ବୋଲି ୫-ଟି ଅଧ୍ୟକ୍ଷ କହିଥିଲେ। ଉଚ୍ଚାଭିଳାଷ ରଖି ଜୀବନରେ ଆଗକୁ ବଢ଼ିବା ପାଇଁ ଛାତ୍ରଛାତ୍ରୀମାନଙ୍କୁ ଆହ୍ୱାନ ଦେଇ ଜିଲ୍ଲାର ବହୁ ବିଶିଷ୍ଟ ବ୍ୟକ୍ତିଙ୍କ ଉଦାହରଣ ଦେଇଥିଲେ ପାଣ୍ଡିଆନ।

୫୦ କୋଟି ଟଙ୍କା ବ୍ୟୟରେ ହେଉଥିବା ଘଟଗାଁ ତାରିଣୀ ମନ୍ଦିରର ଉନ୍ନତିକରଣ କାର୍ଯ୍ୟର ଅଗ୍ରଗତିର ସମୀକ୍ଷା କରିଥିଲେ ୫-ଟି ଅଧ୍ୟକ୍ଷ। ୬୧୨୦ କୋଟି ଟଙ୍କା ବ୍ୟୟରେ ନିର୍ମିତ ହେଉଥିବା କାନପୁର ଜଳସେଚନ ପ୍ରକଳ୍ପ, ଆନନ୍ଦପୁର ବ୍ୟାରେଜ ପ୍ରକଳ୍ପ ଓ ମେଗା ଉଠା ଜଳସେଚନ ପ୍ରକଳ୍ପର ଅଗ୍ରଗତିର ସମୀକ୍ଷା କରିଥିଲେ ୫-ଟି ଓ ନବୀନ ଓଡ଼ିଶା ଅଧ୍ୟକ୍ଷ। ୯୬ କୋଟି ଟଙ୍କା ବ୍ୟୟରେ ସନ୍ତେଇଭଞ୍ଜ ଓ ତେଲକୋଇ ନଦୀରେ ନିର୍ମିତ ହେଉଥିବା ଦୁଇ ଆଇଏଏସ ପ୍ରକଳ୍ପର ମଧ୍ୟ ସମୀକ୍ଷା କରିଥିଲେ ପାଣ୍ଡିଆନ। ଗତବର୍ଷ ଜୁନରେ ୫-ଟି ଅଧ୍ୟକ୍ଷଙ୍କ ଜିଲ୍ଲା ଗସ୍ତ ବେଳେ ଏହି ଦୁଇ ପ୍ରକଳ୍ପ ପାଇଁ ଜନସାଧାରଣ ଦାବି କରିଥିଲେ। ଭୀମକୁଣ୍ଡ ପର୍ଯ୍ୟଟନ ସ୍ଥଳୀ ପ୍ରକଳ୍ପ, ବଳଦେବଜୀଉ ମନ୍ଦିର ଉନ୍ନତିକରଣ ପ୍ରକଳ୍ପ, ଗୁପ୍ତ ଗଙ୍ଗା, ଗୋନାଶିକା ବ୍ରହ୍ମେଶ୍ୱର ମନ୍ଦିର, ସୀତାବିଞ୍ଜି ମନ୍ଦିର ଓ ସିଦ୍ଧ ମଠର ଉନ୍ନତିକରଣ କାର୍ଯ୍ୟର ଅଗ୍ରଗତିର ସମୀକ୍ଷା କରିଥିଲେ ପାଣ୍ଡିଆନ। ସେ ମଧ୍ୟ ଆଜି ଜିଲ୍ଲାର ପ୍ରମୁଖ ପାନୀୟ ଜଳ ଯୋଗାଣ ପ୍ରକଳ୍ପ ଓ ସେତୁ ପ୍ରକଳ୍ପର ସମୀକ୍ଷା କରିଥିଲେ। ଗତବର୍ଷ ଜୁନରେ ପାଣ୍ଡିଆନଙ୍କ ଜିଲ୍ଲା ଗସ୍ତ ବେଳେ ଜନସାଧାରଣଙ୍କ ଦାବି ଆଧାରରେ କିଛି ପ୍ରକଳ୍ପ ହାତକୁ ନିଆଯାଇଥିଲା।

ଶିଳସୁଆଁରେ ୫-ଟି ଅଧ୍ୟକ୍ଷ ଜନସାଧାରଣଙ୍କ ସହ ଆଲୋଚନା କରି ସେମାନଙ୍କ ସମସ୍ୟା ବିଷୟରେ ଅବଗତ ହେବା ସହ ଶୀଘ୍ର ସମାଧାନ ପାଇଁ ଆଶ୍ୱାସନା ଦେଇଥିଲେ।