ଶ୍ରୀକ୍ଷେତ୍ର ପୁରୀରେ ଭକ୍ତି ଓ ନିଷ୍ଠାର ସହିତ ପାଳିତ ହୋଇଯାଇଛି ଯମ ଦ୍ଵିତୀୟା

ପବିତ୍ର ଯମ ଦ୍ଵିତୀୟା।ଏହି ଦିବସ ଧର୍ମରାଜ ଯମ ଙ୍କୁ ସମର୍ପିତ। ଶ୍ରୀକ୍ଷେତ୍ରରେ ବିଶେଷ କରି ପାଳିତ ହୋଇଯାଇଛି ଯମ ଦ୍ଵିତୀୟା ଉତ୍ସବ। କାର୍ତ୍ତିକ ଶୁକ୍ଳ ଦ୍ଵିତୀୟା ଦିନ ଏହି ପବିତ୍ର ତିଥି ସମଗ୍ର ଭାରତ ବର୍ଷରେ ଲୋକେ ଶ୍ରଦ୍ଧା ଓ ବିଶ୍ୱାସ ର ସହିତ ପାଳନ କରିଥାନ୍ତି। ଶ୍ରୀକ୍ଷେତ୍ର ରେ ରହିଛି ପ୍ରସିଦ୍ଧ ଯମନିକ ତୀର୍ଥ। ଯାହା ଲୋକ ମୁଖରେ ଜମେଶ୍ୱର ମନ୍ଦିର। ଭଗବାନ ଜମେଶ୍ୱର ହେଉଛନ୍ତି ହରିହର ବିଗ୍ରହ। ମହାପ୍ରଭୁ ଶ୍ରୀଜଗନ୍ନାଥଙ୍କ ଚନ୍ଦନ ଯାତ୍ରା ତଥା ଶୀତଳ ଷଷ୍ଠୀ ରେ ପଞ୍ଚ ପାଣ୍ଡଵ ଭାବରେ ପ୍ରଭୁ ଜମେଶ୍ୱର ଭାଗ ନେଇଥାନ୍ତି। ଏହିପରି ଶ୍ରୀ ମନ୍ଦିର ଅନେକ ନୀତି ସହ ଏହି ମନ୍ଦିରର ରହିଛି ନୀତିଗତ ସମ୍ପର୍କ। ଏହି ପ୍ରସିଦ୍ଧ ମନ୍ଦିର ପରିସର ରେ ରହିଛି ଧର୍ମରାଜ ଯମ ଙ୍କ ମନ୍ଦିର।

ଏହିଦିନ ମନ୍ଦିର ପରିସରରେ ବିରାଜିତ ଶ୍ରୀ ଯମ ଦେବତା ଙ୍କ ପାଖେ ବିଶେଷ ଭାବରେ ପୂଜାର୍ଚ୍ଚନା ସହ ବେଣ୍ଟ ମୁଆଁ ଭୋଗ ଅର୍ପଣ କରାଯାଇଥାଏ। ଏଥି ସହ ଶ୍ରୀ ଯମେଶ୍ୱର ଓ ଶ୍ରୀ ହରିହର ଙ୍କ ସ୍ଵତନ୍ତ୍ର ବେଶ ଅନୁଷ୍ଠିତ ହେବା ସହ ମା ପାର୍ବତୀଙ୍କ ମହିଷାମର୍ଦ୍ଦିନୀ ବେଶ ଅନୁଷ୍ଠିତ ହୋଇଥାଏ।

ବିଶ୍ୱାସ ରହିଛି ଯେ,ଏହି ଦିନ ଶ୍ରୀଯମ୍ବେଶ୍ୱରଙ୍କୁ ଦର୍ଶନ କଲେ ଯମଦଣ୍ଡ ରୁ ମୁକ୍ତି ମିଳେ।

ଏହି ଦିନ ମନ୍ଦିରରେ ଦିନ ଓ ରାତି ଉଭୟ ସମୟରେ ଗହଳି ଲାଗି ରହୁଥିବା ବେଳେ ବିଶେଷ ଭାବେ ରାତ୍ରରେ ମନ୍ଦିର ନିକଟରେ ମେଳା ର ଆୟୋଜନ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ମାନ ଅନୁଷ୍ଠିତ ହୋଇଥାଏ। ଏହିଦିନ ମଧ୍ୟ ଅନେକଙ୍କ ଘରେ ଭାତୃ ଦ୍ଵିତୀୟା ପର୍ବ ପାଳିତ ହୋଇଥାଏ। ଭଉଣୀ ମାନେ ଭାଇର ଦୀର୍ଘ ଜୀବନ କାମନା କରି ଯମ ଙ୍କୁ ପ୍ରାର୍ଥନା କରିଥାନ୍ତି। ଭାଇ ମଥାରେ ଟୀକା ଦେବା ସହ ମଙ୍ଗଳ କାମନା କରିଥାନ୍ତି। ଶ୍ରୀକ୍ଷେତ୍ରରେ ଯମ ଙ୍କ ପ୍ରବେଶ ବାରଣ ରହି ଥିବାରୁ ଯମନିକ ତୀର୍ଥ ଦର୍ଶନ କରି ଯମ ଙ୍କ ଆଶିଷ ନେବା ପାଇଁ ଏହି ପବିତ୍ର ଦିବସ ପାଳିତ ହୋଇଥାଏ। ଏଥିପାଇଁ ଶ୍ରୀମନ୍ଦିର ସମେତ ପ୍ରଭୁ ଜମେଶ୍ୱର ମନ୍ଦିରରେ ବିଶେଷ ଭକ୍ତ ସମାଗମ ଦେଖିବାକୁ ମିଳିଥିଲା।