ପ୍ରଶାସନରେ କୁତ୍ରିମ ବୁଦ୍ଧିମତାର ଉପଯୋଗ ସମ୍ବନ୍ଧିତ କର୍ମଶାଳା ଅନୁଷ୍ଠିତ

ଭୁବନେଶ୍ୱର: ରାଜ୍ୟର ସରକାରୀ ଅଫିସରମାନଙ୍କୁ ‘କୁତ୍ରିମ ବୁଦ୍ଧିମତା (ଏ.ଆଇ.)’ ର ପ୍ରୟୋଗ ଉପରେ ବ୍ୟବହାରିକ ତାଲିମ ନିମନ୍ତେ ବୁଧବାର ଦିନ ଲୋକସେବା ଭବନ ସ୍ଥିତ ରାଜ୍ୟ କନଭେନସନ୍ ସେଣ୍ଟରରେ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ବିଭାଗ ଏବଂ ଓ୍ୱାଧ୍‍ଓ୍ୱାନି ଫାଉଣ୍ଡେସନ ର ମିଳିତ ଆନୁକୁଲ୍ୟରେ ଏକ କର୍ମଶାଳାର ଆୟୋଜନ କରାଯାଇଛି। ମୁଖ୍ୟ ଶାସନ ସଚିବ ମନୋଜ ଆହୁଜା ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ରାଜ୍ୟର ସରକାରୀ ଅଫିସରମାନଙ୍କୁ ‘କୁତ୍ରିମ ବୁଦ୍ଧିମତା (ଏ.ଆଇ.)’ ର ପ୍ରୟୋଗ ଉପରେ ତାଲିମ ସମ୍ବନ୍ଧିତ ଏହା ଥିଲା ପ୍ରଥମ କର୍ମଶାଳା । ପର୍ଯ୍ୟାୟ କ୍ରମେ ରାଜ୍ୟର ସମସ୍ତ ଅଫିସରମାନଙ୍କୁ ଏ.ଆଇ. ରେ ତାଲିମ ପ୍ରଦାନ ପାଇଁ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ବିଭାଗ ଏବଂ ଓ୍ୱାଧ୍‍ଓ୍ୱାନି ଫାଉଣ୍ଡେସନ ଲକ୍ଷ୍ୟ ରଖିଛନ୍ତି ।

‘କୁତ୍ରିମ ବୁଦ୍ଧିମତା (ଏ.ଆଇ.)’କୁ ଡାଟା ସମର୍ଥିତ ଦୃଷ୍ଟିଭଙ୍ଗୀ ଆପଣାଇ ବିଭିନ୍ନ ସରକାରୀ ବିଭାଗ ଜନସେବା ବିତରଣ ବ୍ୟବସ୍ଥାକୁ କିଭଳି ପ୍ରଭାବୀ ଢଙ୍ଗରେ ପରିଚାଳିତ କରିପାରିବେ ତାହା ଥିଲା ଏହି କର୍ମଶାଳା ର ମୌଳିକ ଲକ୍ଷ୍ୟ । ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ବିଭାଗର ପ୍ରମୁଖ ଶାସନ ସଚିବ ବିଶାଲ୍ ଦେବ, ବିଭାଗୀୟ ସ୍ୱତନ୍ତ୍ର ଶାସନ ସଚିବ ମାନସ ପଣ୍ଡା, ଓ୍ୱାଧ୍‍ଓ୍ୱାନି ଫାଉଣ୍ଡେସନ ର କାର୍ଯ୍ୟନିର୍ବାହୀ ଅଧିକାରୀ ପ୍ରକାଶ କୁମାର ଏବଂ ଓଡ଼ିଶା ଡିଜିଟାଲ ଗଭର୍ଣ୍ଣାନ୍ସ ଇକୋସିଷ୍ଟମ୍‍ର ପ୍ରମୁଖ ହିତାଧିକାରିଗଣ ଏହି କର୍ମଶାଳାରେ ଅଂଶଗ୍ରହଣ କରିଥିଲେ ।

ଶାସନ ବ୍ୟବସ୍ଥାରେ ମୌଳିକ ପରିବର୍ତ୍ତନ ଆଣିବା ସଙ୍ଗେସଙ୍ଗେ ରାଜ୍ୟ ସରକାରଙ୍କ ସହ ସାଧାରଣ ଜନତାଙ୍କ ଯୋଗାଯୋଗ ଦୃଷ୍ଟିଭଙ୍ଗୀରେ ପରିବର୍ତ୍ତନ ଆଣିବା ପାଇଁ ଏ.ଆଇ. ସକ୍ଷମ ବୋଲି ଉଲ୍ଲେଖ କରି ମୁଖ୍ୟ ଶାସନ ସଚିବ ମନୋଜ ଆହୁଜା କହିଥିଲେ ଯେ, ଆଜି ଯାହା କଷ୍ଟକର ମନେହେଉଛି, ଆସନ୍ତାକାଲି ତାହା ‘କୁତ୍ରିମ ବୁଦ୍ଧିମତା (ଏ.ଆଇ.)’ ର ପ୍ରୟୋଗ ମାଧ୍ୟମରେ ସହଜସାଧ୍ୟ ବୋଲି ପ୍ରମାଣିତ ହେବ । ଏହା ସହିତ, ପ୍ରଯୁକ୍ତିବିଦ୍ୟା କ୍ଷେତ୍ରରେ ଘଟୁଥିବା ଦ୍ରୁତ ନବସୃଜନ ଯୋଗୁଁ କୁତ୍ରିମ ବୁଦ୍ଧିମତା (ଏ.ଆଇ.) ସମ୍ପର୍କରେ ସରକାରୀ ଅଧିକାରୀମାନେ ଜାଣିବା ଓ ବୁଝିବା ଜରୁରୀ ହୋଇପଡ଼ିଛି । ଏ.ଆଇ. ସହଯୋଗରେ ସେବା ବିତରଣ ବ୍ୟବସ୍ଥାକୁ ଅଧିକ ଉନ୍ନତ, ଦ୍ରୁତ ଓ ଅଧିକ ପାରଦର୍ଶୀ କରାଇ ଜାତୀୟ ସ୍ଥରରେ ଓଡ଼ିଶା କିଭଳି ନେତୃତ୍ୱ ପ୍ରତିଷ୍ଠା କରିପାରିବ, ସେଥିପାଇଁ ଏକ ସୁବର୍ଣ୍ଣ ସୁଯୋଗ ଆସିଛି ବୋଲି ମୁଖ୍ୟ ଶାସନ ସଚିବ ଦୃଢୋକ୍ତି ପ୍ରକାଶ କରିଥିଲେ ।

କୁତ୍ରିମ ବୁଦ୍ଧିମତା (ଏ.ଆଇ.) ର ଅବଲମ୍ବନ କ୍ଷେତ୍ରରେ ଓଡ଼ିଶାକୁ ଜାତୀୟ ସ୍ଥରରେ ପ୍ରତିଷ୍ଠିତ କରିବା ପାଇଁ ରାଜ୍ୟ ସରକାରଙ୍କ ରଣକୌଶଳ ସମ୍ପର୍କରେ ଉଲ୍ଲେଖ କରି ବିଭାଗୀୟ ପ୍ରମୁଖ ଶାସନ ସଚିବ ବିଶାଲ୍ ଦେବ କହିଥିଲେ ଯେ ଏ.ଆଇ. କୁ ଆପଣାଇ ଏହି କ୍ଷେତ୍ରରେ ଓଡ଼ିଶାକୁ ଜାତୀୟ ସ୍ଥରରେ ଏକ ନେତୃସ୍ଥାନୀୟ ସ୍ଥିତିକୁ ଆଣିବା ପାଇଁ ରାଜ୍ୟ ସରକାର ବହୁ ସିଦ୍ଧାନ୍ତମୂଳକ ପଦକ୍ଷେପ ଗ୍ରହଣ କରୁଛନ୍ତି ଏବଂ ଖୁବଶୀଘ୍ର ରାଜ୍ୟର ସ୍ବତନ୍ତ୍ର ଏ.ଆଇ. ପଲିସି ନିମନ୍ତେ ବିଜ୍ଞପ୍ତି ପ୍ରକାଶ ପାଇବାକୁ ଯାଉଛି । ଏହା ସହିତ, ବିଭିନ୍ନ କ୍ଷେତ୍ର ମଧ୍ୟରେ ସମନ୍ୱୟ ସ୍ଥାପନ ପାଇଁ ‘ଓଡ଼ିଶା ଏ.ଆଇ. ମିଶନ’ ମଧ୍ୟ ଆରମ୍ଭ କରାଯିବାପାଇଁ ପଦକ୍ଷେପ ନିଆଯାଉଛି । ଏହି ପରିପ୍ରେକ୍ଷୀରେ ନାସ୍‍କମ୍ ଓ ଓ୍ୱାଧ୍‍ଓ୍ୱାନି ଫାଉଣ୍ଡେସନ ସହ ବୁଝାମଣାପତ୍ର ସ୍ୱାକ୍ଷର ମଧ୍ୟ କରାଯାଇଛି । ଓଡ଼ିଶାର ରାଜଧାନୀ ଭୁବନେଶ୍ୱର ଠାରେ ଏକ ଏ.ଆଇ. ଉତ୍କର୍ଷ କେନ୍ଦ୍ର ମଧ୍ୟ ପ୍ରତିଷ୍ଠା କରାଯିବା ନିମନ୍ତେ ପଦକ୍ଷେପ ନିଆଯିବା ସହ ଇଣ୍ଡିଆ ଏ.ଆଇ. ମିସନ୍ ସହଯୋଗରେ ବିଭିନ୍ନ ବିଭାଗରେ ଏ.ଆଇ. ସମାଧାନର ବ୍ୟବସ୍ଥା କରାଯାଉଛି । ଏକ ଶକ୍ତିଶାଳୀ, ସମାବେଶୀ ଏବଂ ଅଗ୍ରମୁଖୀ ଏ.ଆଇ. ଇକୋସିଷ୍ଟମ ପାଇଁ ଏହି ସବୁ ପଦକ୍ଷେପ ଆମ ପ୍ରତିବଦ୍ଧତାର ପ୍ରତିଫଳନ ଏବଂ ଏହାଦ୍ୱାରା ଶାସନ ବ୍ୟବସ୍ଥା ସୁଦୃଢ଼ ହେବାସହ ନବସୂଜନ ପାଇଁ ବିପୁଳ ସୁଯୋଗ ଉପଲବ୍ଧ ହୋଇପାରିବ ବୋଲି ବିଶାଲ ଦେବ ମତପ୍ରକାଶ କରିଥିଲେ।

ଏ.ଆଇ. ପରିଚାଳିତ ଶାସନ ବ୍ୟବସ୍ଥା ପାଇଁ ଓଡ଼ିଶା ବଳିଷ୍ଠ ପଦକ୍ଷେପ ଗ୍ରହଣ କରୁଥିବାରୁ ଆମେ ଖୁବ୍‍ ଉତ୍ସାହିତ ବୋଲି ଓ୍ୱାଧଓ୍ୱାନି ଫାଉଣ୍ଡେସନ୍ ସି.ଇ.ଓ. ପ୍ରକାଶ କୁମାର ଉଲ୍ଲେଖ କରିଥିଲେ । ସରକାରଙ୍କ ସହ ଘନିଷ୍ଠ ସହଯୋଗ ରକ୍ଷାକରି କେଉଁଠି କେଉଁଠି ସମସ୍ୟାମାନ ରହିଛି, ଆମେ ତାହା ଦେଖିବୁ ଓ ତା’ର ସମାଧାନର ପଥ ସୁଗମ କରିବାରେ ସହାୟକ ହେବୁ ବୋଲି ସେ ଉଲ୍ଲେଖ କରିଥିଲେ ।

ସରକାରୀ ଅଫିସରମାନଙ୍କୁ ‘କୁତ୍ରିମ ବୁଦ୍ଧିମତା’ ପ୍ରୟୋଗର ବ୍ୟବହାରିକ ଜ୍ଞାନ ଦେବାପାଇଁ ଆଜିର ଏହି କର୍ମଶଳା ଉଦ୍ଦିଷ୍ଟ ଥିଲା । କର୍ମଶାଳାର ବିଭିନ୍ନ ଅଧିବେଶନରେ ଜେନେରେଟିଭ ଏ.ଆଇ. ଟୁଲ୍ସ, ଜଟିଳ ବିଶ୍ଲେଷଣ ଓ କଣ୍ଟେଣ୍ଟ ଜେନେରେସନ ର ଉପଯୋଗିତା ଏବଂ କାର୍ଯ୍ୟାନ୍ୱୟନ ନମୁନା ସମ୍ପର୍କରେ ଗଭିର ଚିନ୍ତନ କରାଯାଇଥିଲା । ଅଂଶଗ୍ରହଣକାରୀ ଅଧିକାରୀମାନେ ବହୁ ଉପାଦେୟ ବାସ୍ତବ ପ୍ରକଳ୍ପ ସମ୍ପର୍କରେ ପ୍ରସ୍ତାବ ଦେଇଥିଲେ ଯାହା ମଧ୍ୟରେ ଶିକ୍ଷକମାନଙ୍କ ପାଇଁ ଜେନ୍-ଏ.ଆଇ. ଆସିଷ୍ଟାଣ୍ଟ, ନାଗରିକ ଅଭିଜ୍ଞତା ଓ ଯୋଗାଯୋଗ ମଞ୍ଚ, ଘରେ ଗର୍ଭବତୀ ମହିଳାମାନଙ୍କ ସ୍କ୍ରିନିଙ୍ଗ ଓ ମନିଟରିଙ୍ଗ ପାଇଁ ଏକ ଏ.ଆଇ. ଆପ୍ ଅନ୍ୟତମ ।

ଏହା ସହିତ ନୀତିଗତ ଯୋଜନା ଓ ତା’ର ମନିଟରିଙ୍ଗ ନିମନ୍ତେ ଡାଟା ପରିଚାଳିତ ନିଷ୍ପତ୍ତି ଗ୍ରହଣ, ଡିଜିଟାଲାଇଜେସନ୍ ଓ ଡିଜିଟାଲ ଟ୍ରାନ୍ସଫରମେସନ୍ ମଧ୍ୟରେ ଥିବା ପାର୍ଥକ୍ୟ, ବିଚାର ଅବସ୍ଥାରୁ ଅବଧାରଣା ଅବସ୍ଥାକୁ ଯିବାପାଇଁ ଢାଞ୍ଚା ପ୍ରସ୍ତୁତି, ଶାସନଗତ ଆହ୍ୱାନ ଏବଂ ଓ୍ୱାଧ୍‍ଓ୍ୱାନି ଫାଉଣ୍ଡେସନ୍ ସହ ମିଶି ସେଗୁଡ଼ିକର ବିଶ୍ଲେଷଣ ତଥା ବୈଷୟିକ ସମ୍ଭାବ୍ୟତା ଓ ବିଶେଷଜ୍ଞଙ୍କ ମତାମତ ସଂଗ୍ରହ ଉପରେ ଆଲେଚନା କରାଯାଇଥିଲା।

ଇଣ୍ଡିଆ ଏ.ଆଇ. ମିସନ ସହ ମିଶି ଓଡ଼ିଶା ସରକାର ଦକ୍ଷତା ବୃଦ୍ଧି, ନବସୃଜନ, ନୈତିକ ଏବଂ ନିୟନ୍ତ୍ରଣାତଙ୍କ ଢାଞ୍ଚା ପ୍ରସ୍ତୁତି, ଆପ୍ ବିକାଶ ଏବଂ ତଥ୍ୟାବଳୀର ସମ୍ପାଦନା ଆଦି ପ୍ରମୁଖ ବିଷୟଗୁଡ଼ିକ ଉପରେ ଗୁରୁତ୍ୱ ଦେଉଛନ୍ତି । ଆଇ.ଆଇ.ଟି. ଭୁବନେଶ୍ୱର, ଭାଶିନୀ ଓ ସି-ଡାକ୍ ସହ ମିଶି ଓଡ଼ିଶା ସରକାର ଏକ ଭାଷାଗତ ଏ.ଆଇ. ପ୍ରସ୍ତୁତ କରିବା ପାଇଁ ପଦକ୍ଷେପ ନେଉଥିବା ବିଷୟରେ ମଧ୍ୟ ଆଲୋଚନା କରାଯାଇଥିଲା, ଯାହା ଓଡ଼ିଆ ଭାଷା ର ସାଂସ୍କୃତିକ ସଂରକ୍ଷଣରେ ସହାୟକ ହେବ।

ବିଭିନ୍ନ ସରକାରୀ ବିଭାଗ ମଧ୍ୟରେ ସଚେତନତା ସୃଷ୍ଟିକରି ସରକାରୀ କାର୍ଯ୍ୟରେ ପାରଦର୍ଶିତା ବୃଦ୍ଧି କରିବା, ଏ.ଆଇ. ପାଇଲଟ୍ସ ଆରମ୍ଭ କରିବା ଏବଂ ପରିଶେଷରେ ବିଭିନ୍ନ କ୍ଷେତ୍ର ମଧ୍ୟରେ ଏ.ଆଇ. ପରିଚାଳିତ ଶାସନିକ ବ୍ୟବସ୍ଥାକୁ ଆନୁଷ୍ଠାନିକ କରିବା ଏହି କର୍ମଶାଳାର ଲକ୍ଷ୍ୟ ଥିଲା । ଏହିସବୁ ଉଦ୍ୟମ ଓଡ଼ିଶାକୁ ଏ.ଆଇ. ନବସୃଜନର ଏକ ଜାତୀୟ କେନ୍ଦ୍ରରେ ପରିଣତ କରିବ ବୋଲି ଆଶା କରାଯାଉଛି ।