ସିମଲା: ହିମାଚଳ ପ୍ରଦେଶର କିନ୍ନୌର ଜିଲ୍ଲା ଟିକାକରଣରେ ଏକ ନୂଆ ରେକର୍ଡ ସୃଷ୍ଟି କରିଛି। ଦେଶର ପ୍ରଥମ ଜିଲ୍ଲା ଭାବରେ କିନ୍ନୌର ଶତ ପ୍ରତିଶତ ଟିକାକରଣ ସଫଳତା ହାସଲ କରିଛି । ଜିଲ୍ଲାରେ ସମସ୍ତ ଲୋକଙ୍କୁ କରୋନା ଟିକାର ଉଭୟ ଡୋଜ୍ ଦିଆଯାଇଛି। କିନ୍ନୌର ଜିଲ୍ଲା ପ୍ରଶାସନ ଏହି ସୂଚନା ଦେଇଛି। ଏ ସମ୍ପର୍କରେ ସୂଚନା ଦେଇ ଜିଲ୍ଲାର ଡେପୁଟି କମିଶନର ଆବିଦ୍ ହୁସେନ୍ ସାଦିକ କହିଛନ୍ତି ଯେ କରୋନା ଟିକା ର ଉଭୟ ଡୋଜ୍ ଏଠାରେ ଥିବା ସମସ୍ତ ଯୋଗ୍ୟ ବ୍ୟକ୍ତିଙ୍କୁ ପ୍ରଦାନ କରାଯାଇଛି। ସେ କହିଛନ୍ତି ଯେ ଜିଲ୍ଲାର ଏଭଳି ଲୋକଙ୍କ ସଂଖ୍ୟା ୬୦,୩୦୫ ଅଟେ। ଏହି ସମସ୍ତ ଲୋକଙ୍କୁ ଟିକା ଦିଆଯାଇଛି। ଡେପୁଟି କମିଶନର କହିଛନ୍ତି ଯେ ଜିଲ୍ଲାର କୌଣସି ବ୍ୟକ୍ତି ଯେପରି ଟିକାକରଣରୁ ବଞ୍ଚିତ ନହେବେ ସେଥିପାଇଁ ମେଡିକାଲ ଏବଂ ପାରା-ମେଡିକାଲ କର୍ମଚାରୀମାନେ ଦିନରାତି ପରିଶ୍ରମ କରିଥିଲେ।
ଏହି ଜିଲ୍ଲାର ଭୌଗୋଳିକ ସ୍ଥିତିକୁ ଦେଖିଲେ ଏହି ସଫଳତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ | କାରଣ, ପ୍ରବଳ ବର୍ଷା ଏବଂ ଭୂସ୍ଖଳନ ପରି ବିପର୍ଯ୍ୟୟ ଏହି ଅଞ୍ଚଳ ପାଇଁ ଏକ ସାଧାରଣ କଥା | ଏପରି ସ୍ଥିତିରେ ଏହି ଲକ୍ଷ୍ୟ ହାସଲ କରିବା ଏକ ଚ୍ୟାଲେଞ୍ଜିଂ କାର୍ଯ୍ୟ ଥିଲା | ଚଳିତ ବର୍ଷ ପ୍ରବଳ ବର୍ଷା ଯୋଗୁଁ ଜିଲ୍ଲାର ଲୋକଙ୍କୁ ଅନେକ ଥର ଏପରି ବିପର୍ଯ୍ୟୟର ସମ୍ମୁଖୀନ ହେବାକୁ ପଡୁଥିଲା ଯାହା ଟିକାକରଣ ପଥରେ ଏକ ଚ୍ୟାଲେଞ୍ଜ ପାଲଟିଥିଲା।
ସୂଚନାଯୋଗ୍ୟ ଯେ ହିମାଚଳ ପ୍ରଦେଶ ଏଯାବତ ୫୩.୭୭ ଲକ୍ଷ ଲୋକଙ୍କୁ ଟିକାର ପ୍ରଥମ ଡୋଜ୍ ଦେଇ ଏକ ରେକର୍ଡ କରିଛି। ଚଳିତ ବର୍ଷ ଅଗଷ୍ଟ ୩୦ରେ ହିମାଚଳ ପ୍ରଦେଶ ଏହି ସଫଳତା ହାସଲ କରିଥିଲା। ବର୍ତ୍ତମାନ ହିମାଚଳ ପ୍ରଦେଶର କିନ୍ନୌର ଜିଲ୍ଲା ଶତ ପ୍ରତିଶତ ଟିକାକରଣ ଜିଲ୍ଲା ହୋଇଛି।
Comments are closed.