ଓମିକ୍ରନ୍ ଯୋଗୁଁ ଦେଶର ଅନେକ ରାଜ୍ୟରେ ଗୋଷ୍ଠୀ ସଂକ୍ରମଣ, ହାଲୁକା ଭାବେ ନ ନେବାକୁ ବିଶ୍ଵ ସ୍ୱାସ୍ଥ୍ୟ ସଂଗଠନର ଚେତାବନୀ

ନୂଆଦିଲ୍ଲୀ: ଦେଶରେ କରୋନାର ତୃତୀୟ ଲହରରେ ସଂକ୍ରମିତଙ୍କ ସଂଖ୍ୟା ପ୍ରତିଦିନ ୩ ଲକ୍ଷ ଅତିକ୍ରମ କରୁଛି | ଅନ୍ୟପକ୍ଷେ ବିଶେଷଜ୍ଞମାନେ ମତ ଦେଇଛନ୍ତି ଯେ ଆଗାମୀ ଦିନରେ ଓମିକ୍ରନ୍ ମାମଲା ଆହୁରି ଦ୍ରୁତ ଗତିରେ ବଢିପାରେ | ଏଭଳି ସ୍ଥିତିରେ ଅନେକ ବିଶେଷଜ୍ଞ କରୋନା ପ୍ରତି ଯତ୍ନବାନ ହେବାକୁ ଲୋକଙ୍କୁ ପରାମର୍ଶ ଦେଇଛନ୍ତି | ଦେଶରେ କରୋନା ସଂକ୍ରମଣ ବୃଦ୍ଧି ପାଉଥିବା ବେଳେ ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) ମଧ୍ୟ ଲୋକଙ୍କୁ ସତର୍କ ରହିବାକୁ କହିଛି |

ଓମିକ୍ରନ୍ ନେଇ ଭାରତର ସବୁଠାରୁ ବଡ ଚିନ୍ତା ହେଉଛି ଏହି ଷ୍ଟ୍ରେନ୍ ଦେଶର ଅନେକ ରାଜ୍ୟରେ ଗୋଷ୍ଠୀ ସଂକ୍ରମଣ ସ୍ତରରେ ପହଞ୍ଚିଛି | ଦିଲ୍ଲୀ ଏବଂ ମୁମ୍ବାଇରେ ଏହିପରି ଅନେକ ଲୋକ ସଂକ୍ରମିତ ହୋଇଥିଲେ ଯାହାଙ୍କର କୌଣସି ଭ୍ରମଣ ଇତିହାସ ନାହିଁ | ଅନ୍ୟାନ୍ୟ ରାଜ୍ୟରେ ମଧ୍ୟ ମାମଲା ଦ୍ରୁତ ଗତିରେ ବୃଦ୍ଧି ପାଉଛି। ଦେଶର ଜେନୋମିକ ବିଶେଷଜ୍ଞଙ୍କ ଗୋଷ୍ଠୀ ( INSACOG) ଏହାର ରିପୋର୍ଟରେ ମଧ୍ୟ କହିଛି ଯେ ଓମିକ୍ରନ୍ ଭାରତରେ ଗୋଷ୍ଠୀ ସଂକ୍ରମଣ ସ୍ତରରେ ପହଞ୍ଚିଛି।

କରୋନାକୁ ହାଲୁକା ଭାବେ ନେବା ଠିକ୍ ନୁହେଁ ବୋଲି ‘ହୁ’ ଚେତାବନୀ ଦେଇଛି | ଯଦିଓ ଓମିକ୍ରନ୍ ସେଭଳି ଘାତକ ନୁହେଁ, ଭବିଷ୍ୟତରେ ଡେଲଟା ପରି ଷ୍ଟ୍ରେନ୍ ଉତ୍ପନ୍ନ ହୋଇପାରେ | ଏଭଳି ସ୍ଥିତି ସୃଷ୍ଟି ହେଲେ ପୁଣି ଥରେ ବିଶ୍ବ ପୁଣି ଥରେ କରୋନାର ଭୟଙ୍କର ଲହରର ସାମ୍ନା କରିବ | ଏହି କାରଣରୁ ବିଶ୍ୱ ସ୍ୱାସ୍ଥ୍ୟ ସଂଗଠନ କରୋନା ସମ୍ବନ୍ଧରେ ସମ୍ପୂର୍ଣ୍ଣ ସତର୍କ ଅବଲମ୍ବନ କରିବାକୁ ପରାମର୍ଶ ଦେଉଛି |

ବିଶ୍ୱ ସ୍ୱାସ୍ଥ୍ୟ ସଂଗଠନ ସ୍ପଷ୍ଟ କହିଛି ଯେ ଓମିକ୍ରନ୍ କରୋନାର ଶେଷ ଭାରିଆଣ୍ଟ ନୁହେଁ। ଆଗାମୀ ସମୟରେ କରୋନାର ଏକ ନୂଆ ଏବଂ ଶକ୍ତିଶାଳୀ ଭାରିଆଣ୍ଟ ମଧ୍ୟ ଆସିବାର ସମ୍ଭାବନା ଅଛି | ଏପରି ସ୍ଥିତିରେ ଓମିକ୍ରନକୁ କରୋନାର ଅନ୍ତ ବୋଲି ଭାବିବା ଚିନ୍ତାଧାରା ବିପଜ୍ଜନକ |

ଭାରତରେ ଦ୍ରୁତ ଗତିରେ ବଢୁଥିବା କରୋନା ସଂକ୍ରମଣକୁ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ ଚିନ୍ତା ପ୍ରକଟ କରିଛି। ହୁ କହିଛି ଯେ କରୋନାର ବାରମ୍ବାର ପରିବର୍ତ୍ତନ ଯୋଗୁଁ ଏହି ଭାରିଆଣ୍କଟି ମଧ୍ୟ ବିପଜ୍ଜନକ ହୋଇପାରେ | ଚିନ୍ତା ପ୍ରକଟ କରି ହୁ କହିଛି ଯେ ଏକ ସପ୍ତାହ ମଧ୍ୟରେ ଦେଶରେ କରୋନା ବହୁତ ଦ୍ରୁତ ଗତିରେ ବୃଦ୍ଧି ପାଇଛି।