ମୁମ୍ବାଇ: କଂଗ୍ରେସ ଛାଡ଼ିବା ପରେ ପୂର୍ବତନ କେନ୍ଦ୍ର ମନ୍ତ୍ରୀ ମିଲିନ୍ଦ ଦେଓରା ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଉପସ୍ଥିତିରେ ଶିବସେନାରେ ଯୋଗ ଦେଇଛନ୍ତି ।
ଦକ୍ଷିଣ ମୁମ୍ବାଇ ଲୋକସଭା ଆସନର ପୂର୍ବତନ ସାଂସଦ ଦେଓରା ରବିବାର ଅପରାହ୍ନରେ ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନରେ ଏକ କାର୍ଯ୍ୟକ୍ରମରେ ଶାସକ ଦଳରେ ଯୋଗ ଦେଇଥିଲେ।
ଏହା ପୂର୍ବରୁ ଦେଓରା ‘ଏକ୍ସ’ ପୋଷ୍ଟରେ କଂଗ୍ରେସରୁ ଇସ୍ତଫା ଘୋଷଣା କରିଥିଲେ।
ସେ କହିଥିଲେ, “ମୋର ରାଜନୈତିକ ଯାତ୍ରାର ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟ ଆଜି ଶେଷ ହୋଇଛି। ଦଳ ସହିତ ମୋର ପରିବାରର ୫୫ ବର୍ଷ ସମ୍ପର୍କକୁ ଶେଷ କରି ମୁଁ କଂଗ୍ରେସର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଛି। ବର୍ଷ ବର୍ଷ ଧରି ସେମାନଙ୍କ ନିରନ୍ତର ସମର୍ଥନ ପାଇଁ ମୁଁ ସମସ୍ତ ନେତା, ସହକର୍ମୀ ଏବଂ କର୍ମୀଙ୍କ ନିକଟରେ କୃତଜ୍ଞ। ”
ଶିବସେନା (ୟୁବିଟି) ଦକ୍ଷିଣ ମୁମ୍ବାଇ ଲୋକସଭା ଆସନ ଦାବି କରିବା ପରେ ଦେଓରା ଅସନ୍ତୁଷ୍ଟ ଥିଲେ। ସେ ଅତୀତରେ ଏହି ଆସନରୁ ପ୍ରତିନିଧିତ୍ୱ କରିଛନ୍ତି।
ତେବେ ୨୦୧୪ ଏବଂ ୨୦୧୯ ଲୋକସଭା ନିର୍ବାଚନରେ ସେ ଏହି ଆସନରେ ଶିବସେନାର ଅରବିନ୍ଦ ସାୱନ୍ତଙ୍କ ଠାରୁ ପରାସ୍ତ ହୋଇଥିଲେ। ସାୱନ୍ତ ଠାକରେ ଗୋଷ୍ଠୀରେ ଅଛନ୍ତି | କଂଗ୍ରେସ ଏବଂ ଏନସିପି ସହିତ ଠାକରେଙ୍କ ଦଳ ହେଉଛି ବିରୋଧୀ ମହା ବିକାଶ ଆଘାଡି (ଏମଭିଏ) ମେଣ୍ଟର ଅଂଶ ।
ଏହାପୂର୍ବରୁ କଂଗ୍ରେସର ବରିଷ୍ଠ ନେତା ଅଶୋକ ଚୌହାନ କହିଥିଲେ ଯେ ଏବେ ଯେଉଁ ସାଂସଦ ଅଛନ୍ତି ତାଙ୍କୁ ଏହି ଆସନରୁ ବଞ୍ଚିତ କରାଯିବା ଉଚିତ ନୁହେଁ । ଅର୍ଥାତ ଦକ୍ଷିଣ ମୁମ୍ବାଇ ଲୋକସଭା ଆସନ କଂଗ୍ରେସ ପରିବର୍ତ୍ତେ ଠାକେର ନେତୃତ୍ୱାଧୀନ ଶିବସେନାକୁ ଯିବ।