ବିଜେପିରେ ମିଶିଲେ ଅଶୋକ ଚହ୍ବାନ

ମୁମ୍ବାଇ: ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଚହ୍ବାନ ମଙ୍ଗଳବାର ଶାସକ ଦଳ ବିଜେପିରେ ଯୋଗ ଦେଇଛନ୍ତି। ସୋମବାର ସେ କଂଗ୍ରେସର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଥିଲେ।

ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ୍, ରାଜ୍ୟ ବିଜେପି ସଭାପତି ଚନ୍ଦ୍ରଶେଖର ବାୱନକୁଲେ, ଦଳର ମୁମ୍ବାଇ ମୁଖ୍ୟ ଆଶିଷ ଶେଲାର ଓ କ୍ୟାବିନେଟ୍ ମନ୍ତ୍ରୀ ଗିରିଶ ମହାଜନଙ୍କ ଉପସ୍ଥିତିରେ ମୁମ୍ବାଇର ପାର୍ଟି କାର୍ଯ୍ୟାଳୟରେ ବିଜେପିରେ ସାମିଲ ହୋଇଛନ୍ତି ୬୫ ବର୍ଷୀୟ ଚହ୍ବାନ ।

ବିଜେପିରେ ଯୋଗଦେବା ପୂର୍ବରୁ ଚହ୍ବାନ କହିଥିଲେ, ଆଜି ମୋ ଜୀବନର ଏକ ନୂଆ ରାଜନୈତିକ କ୍ୟାରିୟର ଆରମ୍ଭ ହେବ। କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କଠାରୁ କଲ୍ ଆସିଥିଲା କି ବୋଲି ଯେତେବେଳେ ଚହ୍ବାନଙ୍କୁ ପଚରାଯାଇଥିଲା, ସେ କୌଣସି ଉତ୍ତର ଦେଇନଥିଲେ ।

ପୂର୍ବତନ କଂଗ୍ରେସ ଏମଏଲସି ଅମରନାଥ ରାଜୁରକର ଏବଂ ମରାଠୱାଡାର ନାନ୍ଦେଡରୁ ତାଙ୍କ ଘରୋଇ ଜିଲ୍ଲାର ଚହ୍ବାନଙ୍କ ଅନେକ ସମର୍ଥକ ମୁମ୍ବାଇ ଆସି ଦକ୍ଷିଣ ମୁମ୍ବାଇର ବିଜେପି କାର୍ଯ୍ୟାଳୟରେ ଏକାଠି ହୋଇଥିଲେ।

ପୂର୍ବତନ ମୁଖ୍ୟମନ୍ତ୍ରୀ ଏସ.ବି ଚହ୍ବାନଙ୍କ ପୁଅ ଅଶୋକ ଚହ୍ବାନ ସୋମବାର କହିଥିଲେ ଯେ କଂଗ୍ରେସ ଛାଡ଼ିବା ତାଙ୍କ ବ୍ୟକ୍ତିଗତ ନିଷ୍ପତ୍ତି । ତେବେ ଦଳ ଛାଡ଼ିବାର କୌଣସି ନିର୍ଦ୍ଦିଷ୍ଟ କାରଣ ଦେଇନଥିଲେ ।

ଚହ୍ବାନଙ୍କ ପୂର୍ବରୁ ମହାରାଷ୍ଟ୍ରର ବରିଷ୍ଠ କଂଗ୍ରେସ ନେତା ବାବା ସିଦ୍ଦିକି ଏବଂ ମିଲିନ୍ଦ ଦେଓରା ମଧ୍ୟ କିଛି ଦିନ ପୂର୍ବରୁ ଦଳ ଛାଡିଥିଲେ।

ଚହ୍ବାନ ମରାଠୱାଡା ଅଞ୍ଚଳର ନାନ୍ଦେଡ୍ ଜିଲ୍ଲାର ବାସିନ୍ଦା । ସେ ୨୦୧୪-୧୯ ମଧ୍ୟରେ ପ୍ରଦେଶ କଂଗ୍ରେସ ସଭାପତି ମଧ୍ୟ ଥିଲେ। ସେ ଭୋକର ବିଧାନସଭା ଆସନରୁ ପ୍ରତିନିଧିତ୍ୱ କରିଥିଲେ ଏବଂ ନାନ୍ଦେଡ୍ ଲୋକସଭା ନିର୍ବାଚନମଣ୍ଡଳୀରୁ ମଧ୍ୟ ସାଂସଦ ଭାବେ ନିର୍ବାଚିତ ହୋଇଥିଲେ ।