ଗଞ୍ଜାମ ଜିଲ୍ଲାର କ୍ଷତିଗ୍ରସ୍ତ ଚାଷୀଙ୍କୁ ଭେଟିଲେ ନବୀନ ପଟ୍ଟନାୟକ : ଭାବବିହ୍ବଳ ହେଲେ ଜନତା

ବ୍ରହ୍ମପୁର: ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ତାଙ୍କ ନିଜ ଅଞ୍ଚଳ ଗଞ୍ଜାମ ଜିଲ୍ଲାର କ୍ଷତିଗ୍ରସ୍ତ ଚାଷୀଙ୍କୁ ଭେଟିଛନ୍ତି l ପ୍ରତିକୂଳ ପାଗ ପାଇଁ ହୋଇଥିବା ଫସଲ ନଷ୍ଟ ସଂକ୍ରାନ୍ତରେ ସ୍ଥିତି ଅନୁଧ୍ୟାନ ପାଇଁ ଯାଇଥିବା ନବୀନଙ୍କୁ ହଜାର ହଜାର ଚାଷୀ ତଥା ସାଧାରଣ ଜନତା ଭାବବିହ୍ବଳ ହୋଇ ସେମାନଙ୍କ ଦୁଃଖ ଜଣାଇଛନ୍ତି। ତାଙ୍କର ଏହି ଗସ୍ତରେ କୌଣସି ସାଧାରଣ ସଭା ନଥିଲେ ବି ଜନସମୁଦ୍ର ଭଳି ସମଗ୍ର ଅଞ୍ଚଳ ଲୋକାରଣ୍ୟ ହୋଇଯାଇଥିଲା। ଗୁରୁତ୍ବପୂର୍ଣ କଥା ହେଉଛି ଯେ, ନବୀନଙ୍କ ଏହି ଗସ୍ତ ହିଁ ତାଙ୍କ ଲୋକପ୍ରିୟତାର ପରିଚୟ ଦେଇଛି।

ସାଧାରଣ ନିର୍ବାଚନ ପରେ ବି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ଅନେକ ଗୁଣରେ ବଢିଥିବା ପରିଲକ୍ଷିତ ହୋଇଛି l କ୍ଷମତାରୁ ଯିବା ପରେ ବି ଲୋକଙ୍କ ହୃଦୟରେ ନବୀନଙ୍କ ସ୍ଥାନ ଏବେ ବି ସର୍ବାଗ୍ରେ ରହିଥିବା ସ୍ପଷ୍ଟ ହୋଇଛି। ଗଞ୍ଜାମ ଜିଲ୍ଲାରେ ପ୍ରତିକୂଳ ପାଗ ପାଇଁ ଅମଳ ବେଳେ ବ୍ୟାପକ ମାତ୍ରାରେ ଧାନ ନଷ୍ଟ ହୋଇଛି। ଏଥିପାଇଁ ଅନେକ ଚାଷୀ ଆତ୍ମହତ୍ୟା ଘଟଣା ସାମ୍ନାକୁ ଆସିବାରେ ଲାଗିଛି।

ଏଭଳି ସ୍ଥିତିରେ ଉଜୁଡା କ୍ଷେତ ପରିଦର୍ଶନରେ ଯାଇଥିଲେ ନବୀନ ପଟ୍ଟନାୟକ, ରାସ୍ତାରେ ହଜାର ହଜାର ଜନତା ତାଙ୍କୁ ଭାବବିହ୍ବଳ ହୋଇ ଚାହିଁ ରହିଥିବା ଦେଖିବାକୁ ମିଳିଥିଲା। ଏପରିକି ହଜାର ହଜାର କ୍ଷତିଗ୍ରସ୍ତ ଚାଷୀ ନଷ୍ଟ ହୋଇଥିବା ଧାନ କେଣ୍ଡା ଧରି ନବୀନଙ୍କୁ ଦେଖାଇବାକୁ ରୁଣ୍ଡ ହୋଇଥିଲେ। ଲାଗୁଥିଲା ଯେମିତି ଆଜି ବି ନିଜ ପ୍ରିୟ ନେତାଙ୍କୁ ଗୁହାରୀ କରିବାକୁ ଆସିଛନ୍ତି।

ସେପଟେ, ନବୀନ ବି ଯେଭଳି ପରିବାର ସଦସ୍ୟଙ୍କ ଭଳି କ୍ଷତିଗ୍ରସ୍ତ ଚାଷୀଙ୍କ ସହ ଆଲୋଚନା କରି ସ୍ଥିତିର ଅନୁଧ୍ୟାନ କରିଥିଲେ ତାହା ସମସ୍ତଙ୍କୁ ଅଭିଭୂତ କରିଥିଲା। ରାଜ୍ୟ ସରକାର ତୁରନ୍ତ କ୍ଷତିପୂରଣ ଦେବାକୁ ନବୀନ ଦାବି କରିଛନ୍ତି।

ଅନ୍ୟ ପଟେ ନବୀନଙ୍କୁ ଦେଖିବାକୁ ରାସ୍ତା ସାରା ଯେଭଳି ଭିଡ ଲାଗିଥିଲା ତାହା ଜଣେ ବିରୋଧୀ ଦଳ ନେତା ପକ୍ଷରେ ବିରଳ ଘଟଣା ବୋଲି ଚର୍ଚ୍ଚା ଜୋର ଧରିଛି।

ଅପରପକ୍ଷେ, ନବୀନଙ୍କ ଏହି ଗସ୍ତ ପାଇଁ ସମଗ୍ର ଗଞ୍ଜାମ ଜିଲ୍ଲା ବିଜେଡି ଏକାଠି ହୋଇଥିବା ଦେଖିବାକୁ ମିଳିଛି। ଦଳର ସବୁ ନେତା ତଥା ପୂର୍ବତନ ବିଧାୟକ ଓ ପୂର୍ବତନ ସାଂସଦରୁ ଆରମ୍ଭ କରି ସବୁ ତ୍ରୁଣମୂଳ ସ୍ତରର ନେତା କାର୍ଯ୍ୟକ୍ରମକୁ ସଫଳ କରିବାକୁ ସକ୍ରିୟ ଭୂମିକା ନେଇଥିବା ପରିଲକ୍ଷିତ ହୋଇଛି। ପରୋକ୍ଷରେ ଏହା ଦଳର ସୁଦୃଢ ସଂଗଠନର ଆଭାସ ଦେଇଥିବା ଚର୍ଚ୍ଚା ଆରମ୍ଭ ହୋଇଛି। ଆଉ ଏହି ସମସ୍ତ କାର୍ଯ୍ୟକ୍ରମ ଆୟୋଜନରେ ପୂର୍ବତନ ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ପ୍ରମୁଖ ଭୂମିକା ନେଇ ନିଜର ଦକ୍ଷତାର ପ୍ରମାଣ ଦେଇଛନ୍ତି।