ମୁମ୍ବାଇ – ହିନ୍ଦୀ ଓ ମରାଠୀ ଫିଲ୍ମର ପ୍ରସିଦ୍ଧ ଅଭିନେତ୍ରୀ ସୁଲୋଚନା ଆଉ ନାହାନ୍ତି। ୯୪ ବର୍ଷ ବୟସରେ ଆଖି ବୁଝିଛନ୍ତି ସୁଲୋଚନା। ୨୫୦ରୁ ଅଧିକ ହିନ୍ଦୀ ଓ ୫୦ରୁ ଅଧିକ ମରାଠୀ ଫିଲ୍ମରେ ଅଭିନୟ କରିଥିଲେ ସୁଲୋଚନା। ବୟସାଧିକ୍ୟ ସମସ୍ୟା ଯୋଗୁଁ ତାଙ୍କର ମୃତ୍ୟୁ ହୋଇଥିବା ଝିଅ କାଞ୍ଚନ ଘନେକର ସୂଚନା ଦେଇଛନ୍ତି।
୧୯୪୦ ଦଶକରେ ମରାଠୀ ଫିଲ୍ମରୁ ଅଭିନୟ କ୍ୟାରିୟର ଆରମ୍ଭ କରିଥିଲେ ସୁଲୋଚନା। ଏହାପରେ ସେ ହିନ୍ଦୀ ଫିଲ୍ମରେ ମଧ୍ୟ ଅଭିନୟ କରିବା ଆରମ୍ଭ କରିଥିଲେ। ଅନେକ ହିନ୍ଦୀ ଫିଲ୍ମରେ ସେ ମାଆ ଭୂମିକାରେ ଅଭିନୟ କରି ବେଶ୍ ଲୋକପ୍ରିୟ ହୋଇଥିଲେ । ଶମ୍ମୀ କପୁରଙ୍କ ଦିଲ୍ ଦେକେ ଦେଖୋ, ଦିଲୀପ କୁମାରଙ୍କ ଆଦମୀ, ଦେବାନନ୍ଦଙ୍କ ଜନି ମେରା ନାମ ଭଳି ଅନେକ ହିନ୍ଦୀ ଫିଲ୍ମରେ ସେ ମାଆ ଭୂମିକାରେ ଅଭିନୟ କରିଥିଲେ। କୋରା କାଗଜ, ମୁକଦ୍ଦର କା ସିକନ୍ଦର, ହିମ୍ମତୱଲା ଓ ଅନ୍ଦର ବାହାର ଭଳି ଫିଲ୍ମରେ ମଧ୍ୟ ଅଭିନୟ କରିଥିଲେ ସୁଲୋଚନା। ଦେବାନନ୍ଦ ଓ ରାଜେଶ ଖାନ୍ନା ଅଭିନୀତ ଅନେକ ଫିଲ୍ମରେ ସୁଲୋଚନା ନାୟକର ମାଆ କିମ୍ବା ସମ୍ପର୍କୀୟଙ୍କ ଭୂମିକାରେ ଅଭିନୟ କରିଥିଲେ। ୧୯୯୯ ମସିହାରେ ସୁଲୋଚନା ପଦ୍ମଶ୍ରୀ ସମ୍ମାନ ପାଇଥିଲେ ।
Comments are closed.