ରାଜକୋଟ:ଅନିଲ କୁମ୍ବଲେଙ୍କ ପରେ ଦ୍ୱିତୀୟ ଭାରତୀୟ ବୋଲର ଭାବେ ୫୦୦ ଟେଷ୍ଟ ୱିକେଟ୍ ହାସଲ କରିଛନ୍ତିି ଅଫ୍ ସ୍ପିନର ରବିଚନ୍ଦ୍ରନ୍ ଅଶ୍ୱିନ୍ । ଏଠାରେ ଇଂଲଣ୍ଡ ବିପକ୍ଷ ତୃତୀୟ କ୍ରିକେଟ୍ ଟେଷ୍ଟରେ ଶୁକ୍ରବାର ଦ୍ବିତୀୟ ଦିନରେ ଏହି ମାଇଲଖୁଣ୍ଟ ଛୁଇଁଛନ୍ତି ।
ଟେଷ୍ଟରେ ୫୦୦ ୱିକେଟ୍ ହାସଲ କରିବାରେ ଅଶ୍ୱିନ୍ ତୃତୀୟ ଅଫ୍ ସ୍ପିନର | ସେ କୁମ୍ବଲେଙ୍କ ପରେ ଭାରତର ଦ୍ୱିତୀୟ ସଫଳ ଟେଷ୍ଟ ବୋଲର ହୋଇଛନ୍ତି। କୁମ୍ବଲେଙ୍କ ନାମରେ ୬୧୯ ଟେଷ୍ଟ ୱିକେଟ୍ ରହିଛି।
୩୭ ବର୍ଷୀୟ ଅଶ୍ୱିନଙ୍କୁ ୫୦୦ ଓ୍ବିକେଟ୍ ମାଇଲଖୁଣ୍ଟ ପାଇଁ ଆଉ ମାତ୍ର ଗୋଟିଏ ପାଦ ଦୂରରେ ଥିଲେ । ତୃତୀୟ ଟେଷ୍ଟର ଦ୍ୱିତୀୟ ଦିନରେ ସେ ଏହି ସଫଳତା ହାସଲ କରିଥିଲେ | ଇଂଲଣ୍ଡ ଓପନର୍ ଜ୍ୟାକ୍ କ୍ରଲିଙ୍କୁ ଆଉଟ୍ କରି ଅଶ୍ବିନ ଏହି ମାଇଲଖୁଣ୍ଟ ଛୁଇଁଥିଲେ ।
ଅଶ୍ୱିନଙ୍କ ପୂର୍ବରୁ ଅବସର ନେଇଥିବା ଶ୍ରୀଲଙ୍କାର ମହାନ ଅଫ୍ ସ୍ପିନର ମୁଥୟା ମୁରଲିଧରନ୍ (୮୦୦) ଓ ଅଷ୍ଟ୍ରେଲିଆର ଅଫ୍ ସ୍ପିନର ନାଥାନ୍ ଲିଅନ୍ (517 ୱିକେଟ୍) ଏପରି ସଫଳତା ହାସଲ କରିଛନ୍ତି।
ଟେଷ୍ଟ କ୍ରିକେଟରେ ୫୦୦ ୱିକେଟ୍ ଛୁଇଁବାରେ ଅଶ୍ୱିନ୍ ବିଶ୍ୱର ନବମ ବୋଲର | ୨୦୧୧ରେ ଡେବ୍ୟୁ କରିଥିବା ଅଶ୍ୱିନ୍ ତାଙ୍କର ୯୮ ତମ ଟେଷ୍ଟରେ ଏହି ସଫଳତା ହାସଲ କରିଛନ୍ତିି।
ଚେନ୍ନାଇର ଇଞ୍ଜିନିୟରିଂ ସ୍ନାତକ ଅଶ୍ୱିନ୍ ଜଣେ ଟପ୍ ଅର୍ଡର ବ୍ୟାଟ୍ସମ୍ୟାନ୍ ଭାବେ କ୍ରିକେଟ୍ କ୍ୟାରିୟର ଆରମ୍ଭ କରିଥିଲେ। ଅଫ୍ ସ୍ପିନର ବୋଲର ହେବା ପୂର୍ବରୁ ସେ ମିଡିୟମ ପେସ୍ ବୋଲିଂ କରୁଥିଲେ। କିଶୋର ଅବସ୍ଥାରେ ପିଠିରେ ଆଘାତ ଅଶ୍ବିନଙ୍କୁ ସ୍ପିନ୍ ବୋଲିଂ ବିକଳ୍ପ ବାଛିବାକୁ ବାଧ୍ୟ କରିଥିଲା |
କୁମ୍ବଲେ ଏବଂ ହରଭଜନ ସିଂଙ୍କ ଯୁଗ ପରେ ଅଶ୍ୱିନ ଭାରତୀୟ କ୍ରିକେଟରେ ଉଭା ହୋଇଥିଲେ । ତାଙ୍କ ଠାରୁ ଦଳ ଓ ପ୍ରଶଂସକ ବହୁତ ଆଶା ରଖିଥିଲେ ଏବଂ ସେ ନିରାଶ କରିନଥିଲେ।
ସେ ତାଙ୍କର ପ୍ରଥମ ୧୬ ଟେଷ୍ଟ ମ୍ୟାଚରେ ୯ ଥର ଏକ ଇନିଂସରେ ପାଞ୍ଚ କିମ୍ବା ତଦୁର୍ଦ୍ଧ୍ବ ୱିକେଟ୍ ନେଇଥିଲେ । ଏହାଛଡ଼ା ସେ ୩୦୦ ୱିକେଟ୍ ନେବାରେ ଦ୍ରୁତତମ ବୋଲର ହୋଇଥିଲେ।
ଅଶ୍ୱିନ ମଧ୍ୟ କ୍ଷୁଦ୍ର ଫର୍ମାଟରେ ନିଜର ଉପଯୋଗିତା ସାବ୍ୟସ୍ତ କରିଛନ୍ତି । ସେ ୧୧୬ଟି ଦିନିକିଆ ମ୍ୟାଚରେ ୧୫୬ ୱିକେଟ୍ ଏବଂ ୬୫ ଟି-୨୦ ଅନ୍ତର୍ଜାତୀୟ ମ୍ୟାଚରେ ୭୨ ୱିକେଟ୍ ନେଇଛନ୍ତି।