ଲାଉଡରହିଲ୍ (ଆମେରିକା): ଭାରତ ଏବଂ କାନାଡା ମଧ୍ୟରେ ଟି-୨୦ ବିଶ୍ୱକପର ଗ୍ରୁପ୍ ଏ’ ମ୍ୟାଚ୍ ଶନିବାର ଓଦା ଆଉଟଫିଲ୍ଡ କାରଣରୁ ଗୋଟିଏ ବି ବଲ୍ ପଡ଼ିବା ବିନା ବାତିଲ ହୋଇଯାଇଛି ।
ଏହା ଭାରତର ଶେଷ ଗ୍ରୁପ୍ ମ୍ୟାଚ୍ ଥିଲା । ପ୍ରଥମ ତିନୋଟି ମ୍ୟାଚ୍ ଜିତିଥିବା ଟିମ୍ ଇଣ୍ଡିଆ ପୂର୍ବରୁ ସୁପର ୮ ପାଇଁ ଯୋଗ୍ୟତା ଅର୍ଜନ କରିସାରିଥିଲା | ଭାରତ ବ୍ୟତୀତ ଗ୍ରୁପ୍ ଏ’ରୁ ଆମେରିକା ସୁପର ୮ରେ ପହଞ୍ଚିଛି । ଭାରତୀୟ ଦଳ ଜୁନ୍ ୨୦ରେ ସୁପର ୮ରେ ଆଫଗାନିସ୍ତାନକୁ ଭେଟିବ। ଅନ୍ୟପକ୍ଷରେ କାନାଡ଼ା ଦଳ ଟୁର୍ଣ୍ଣାମେଣ୍ଟରୁ ବାହାର ହୋଇଯାଇଛି ।
ଭାରତ ଓ କାନାଡ଼ା ମଧ୍ୟରେ ମ୍ୟାଚ୍ ପାଇଁ ସ୍ଥାନୀୟ ସମୟ ସକାଳ ୧୦ ଟାରେ (ଭାରତୀୟ ସମୟ ସନ୍ଧ୍ୟା ୭:୩୦)ରେ ଟସ୍ ପଡ଼ିବାର ଥିଲା । କିନ୍ତୁ ଗତକାଲି ରାତିରେ ବର୍ଷା ଓ ମେଘୁଆ ପାଗ ଯୋଗୁଁ ଆଉଟ୍ ଫିଲ୍ମ ଓଦା ହୋଇଯାଇଥିଲା। ତେବେ ଦ୍ୱିତୀୟ ଥର ପାଇଁ ରାତି ୯ଟାରେ (ଭାରତୀୟ ସମୟ) ପିଚ୍ ଯାଞ୍ଚ କରିବା ପରେ ଅମ୍ପାୟାରମାନେ ମ୍ୟାଚକୁ ବାତିଲ କରିବାକୁ ନିଷ୍ପତ୍ତି ନେଇଥିଲେ।