ହାଥରସ: ଉତ୍ତର ପ୍ରଦେଶର ହାଥରସ ଜିଲ୍ଲାର ସିକନ୍ଦରାଉ ନିକଟରେ ମଙ୍ଗଳବାର ଏକ ସତସଙ୍ଗ କାର୍ଯ୍ୟକ୍ରମରେ ଘଟିଥିବା ଦଳାଚକଟାରେ ମୃତ୍ୟୁ ସଂଖ୍ୟା ୧୨୨କୁ ବୃଦ୍ଧି ପାଇଛି। ଏବେ ବି ଅନେକ ଲୋକ ନିଖୋଜ ଅଛନ୍ତି।
ମୃତକଙ୍କ ମଧ୍ୟରେ ଅଧିକାଂଶ ମହିଳା ଓ ପିଲା ଅଛନ୍ତି । ଆତ୍ମଘୋଷିତ ଧର୍ମଗୁରୁ ଭୋଲେ ବାବା ଓରଫ୍ ନାରାୟଣ ସାକାର ହରିଙ୍କ ସତସଙ୍ଗ କାର୍ଯ୍ୟକ୍ରମରେ ଏହି ଅଘଟଣ ଘଟିଥିଲା। ଏହି ସତସଙ୍ଗ କାର୍ଯ୍ୟକ୍ରମ ଆଲିଗଡରୁ ଏଟାକୁ ସଂଯୋଗ କରୁଥିବା ଜାତୀୟ ରାଜପଥ ୩୪ ସନ୍ନିକଟ ସିକନ୍ଦରାଉ ସହରଠାରୁ ପ୍ରାୟ ୪ କିଲୋମିଟର ଦୂରରେ ଥିବା ଫୁଲରାଇ ଗ୍ରାମରେ ଅନୁଷ୍ଠିତ ହୋଇଥିଲା ।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ ସତସଙ୍ଗ ଶେଷ ହେବା ପରେ ବାବା ନାରାୟଣ ସାକାର ହରିଙ୍କ ପାଦ ଧୂଳି ପାଇବାକୁ ଲୋକଙ୍କ ଧାଁ ଦୌଡ଼ରୁ ଦଳାଚକଟା ହୋଇଥିଲା।
ବାବା ନାରାୟଣ ସାକାର ଉତ୍ତର ପ୍ରଦେଶ ପୋଲିସର ଜଣେ ପୂର୍ବତନ କର୍ମଚାରୀ । ତାଙ୍କ ପ୍ରକୃତ ନାମ ହେଉଛି ସୂରଜ ପାଲ। ୧୯୯୦ରେ ସେ ଚାକିରରୁ ସ୍ବେଚ୍ଛାକୃତ ଅବସର ନେଇଥିଲେ । ଏହାପରେ ସେ ନିଜ ନାଁ ଭୋଲେ ବାବା ଓରଫ୍ ନାରାୟଣ ସାକାର ହରି ରଖି ପ୍ରବଚନ ଓ ସତସଙ୍ଗ କାର୍ଯ୍ୟରେ ମନୋନିବେଶ କରିଥିଲେ।
ଦଳାଚକଟା ଘଟଣା ପାଇଁ ସତସଙ୍ଗ କାର୍ଯ୍ୟକ୍ରମର ଆୟୋଜକଙ୍କ ବିରୋଧରେ ପୋଲିସ ମାମଲା ରୁଜୁ କରିଛି । ହେଲେ ପୋଲିସ ଭୋଲେ ବାବାଙ୍କ ବିରୋଧରେ ମାମଲା ରୁଜୁ କରିନାହିଁ। ୨୦ ହଜାର ଲୋକଙ୍କ ପାଇଁ ପ୍ରଶାସନର ଅନୁମତି ଅଣାଯାଇଥିଲା। ତେବେ ସତସଙ୍ଗ ସ୍ଥଳରେ ପ୍ରାୟ ଲକ୍ଷେ ଲୋକଙ୍କ ସମାଗମ ହୋଇଥିଲା ବୋଲି କୁହାଯାଉଛି।