ଦୁବାଇ: ବିସିସିଆଇ ସଚିବ ଜୟ ଶାହ ଆଇସିସିର ପରବର୍ତ୍ତୀ ଅଧ୍ୟକ୍ଷ ଭାବେ ନିର୍ଦ୍ଵନ୍ଦ୍ବରେ ନିର୍ବାଚିତ ହୋଇଛନ୍ତି । ବିଶ୍ୱ କ୍ରିକେଟ୍ ଶାସନର ଏହି ଶୀର୍ଷ ପଦବୀ ଅଳଙ୍କୃତ କରିବାରେ ୩୫ ବର୍ଷ ବୟସ୍କ ଶାହା ହେଉଛନ୍ତି ସର୍ବକନିଷ୍ଠ ପ୍ରଶାସକ। ଡିସେମ୍ବର ୧ରେ ଜୟ ଶାହ ନ୍ୟୁଜିଲ୍ୟାଣ୍ଡର ବିଦାୟୀ ଅଧ୍ୟକ୍ଷ ୬୨ ବର୍ଷୀୟ ଗ୍ରେଗ ବାରକ୍ଲେଙ୍କ ସ୍ଥାନ ନେବେ। ବାରକ୍ଲେ କ୍ରମାଗତ ତୃତୀୟ ଥର ଏହି ଦାୟିତ୍ଵ ସମ୍ଭାଳିବାକୁ ଇଚ୍ଛା ପ୍ରକାଶ କରିନଥିଲେ।
କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ପୁଅ ଜୟ ଶାହଙ୍କୁ ବର୍ତ୍ତମାନ ବିସିସିଆଇ ସଚିବ ପଦ ଛାଡିବାକୁ ପଡିବ, ଯେଉଁ ପଦରେ ସେ ୨୦୧୯ ଠାରୁ ଅଛନ୍ତି। ଭାରତୀୟ ବୋର୍ଡର ବାର୍ଷିକ ସାଧାରଣ ସଭା ଆସନ୍ତା ମାସ କିମ୍ବା ଅକ୍ଟୋବରରେ ଅନୁଷ୍ଠିତ ହେବ।
ଶାହଙ୍କ ପୂର୍ବରୁ ଭାରତରୁ ସ୍ୱର୍ଗତ ଜଗମୋହନ ଡାଲମିଆ, ଶରଦ ପାୱାର, ଏନ୍ ଶ୍ରୀନିବାସନ ଏବଂ ଶଶାଙ୍କ ମନୋହର ଆଇସିସି ଅଧ୍ୟକ୍ଷ ହୋଇଥିଲେ।
ଅଧ୍ୟକ୍ଷ ପଦ ପାଇଁ ଅହମ୍ମଦାବାଦର କ୍ରିକେଟ୍ ପ୍ରଶାସକ ଶାହା ହିଁ ଏକମାତ୍ର ଦାବିଦାର ଥିଲେ। ବିଶ୍ୱ କ୍ରିକେଟ୍ ର ଧନୀ ବୋର୍ଡର ସବୁଠାରୁ କ୍ଷମତାଶାଳୀ ବ୍ୟକ୍ତି ଶାହଙ୍କ ଚୟନ ତାଙ୍କ ପ୍ରାର୍ଥୀପତ୍ର ଉପସ୍ଥାପନ କରିବା କ୍ଷଣି ସ୍ଥିର ହୋଇଥିଲା। ଆଇସିସିର ରାଜସ୍ବ ଆୟରେ ଭାରତୀୟ ବୋର୍ଡର ୭୫ ପ୍ରତିଶତରୁ ଅଧିକ ଅବଦାନ ରହିଛି। ଅଧ୍ୟକ୍ଷ ପଦ ପାଇଁ ‘ସେନା’ (ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲ୍ୟାଣ୍ଡ ଏବଂ ଅଷ୍ଟ୍ରେଲିଆ) କ୍ରିକେଟ୍ ବୋର୍ଡ ମାନଙ୍କ ମଧ୍ୟରୁ ଗୋଟିଏ ଶାହଙ୍କ ନାମ ପ୍ରସ୍ତାବ ଦେଇଥିଲା ବେଳେ ଅନ୍ୟ ଏକ ବୋର୍ଡ ଏହାକୁ ଅନୁମୋଦନ କରିଥିଲା ବୋଲି ଜଣାପଡ଼ିଛି।
ଶାହା ବର୍ତ୍ତମାନ ଆଇସିସିର ସବୁଠାରୁ କ୍ଷମତାଶାଳୀ ଅର୍ଥ ଏବଂ ବ୍ୟବସାୟ ବ୍ୟାପାର ଉପ କମିଟିର ମୁଖ୍ୟ ଅଛନ୍ତି। ସେ ୨୦୨୨ରେ ଏହି ଉପ କମିଟିର ସଭାପତି ହୋଇଥିଲେ।
ଶାହାଙ୍କ ପାଇଁ ଆଇସିସି ଅଧ୍ୟକ୍ଷ ହେବା ଏହାଠାରୁ ଆଉ ଭଲ ସମୟ ହୋଇନପାରେ । କାରଣ ବିସିସିଆଇ ସଚିବ ପଦରେ ରହିବା ପରେ ତାଙ୍କୁ ୨୦୨୫ ରୁ ୨୦୨୮ ପର୍ଯ୍ୟନ୍ତ ବାଧ୍ୟତାମୂଳକ ‘କୁଲିଂ ଅଫ୍’ରେ ଯିବାକୁ ପଡ଼ିବ ।
ବିସିସିଆଇ ସମ୍ବିଧାନ ଅନୁଯାୟୀ, ବୋର୍ଡର ପଦାଧିକାରୀମାନେ କ୍ରମାଗତ ୧୮ ବର୍ଷ ପଦରେ ରହିପାରିବେ, ସେଥିମଧ୍ୟରୁ ଜାତୀୟ ବୋର୍ଡରେ ୯ ଏବଂ ରାଜ୍ୟ ସଂଘରେ ୯ ବର୍ଷ ରହିବେ। କିନ୍ତୁ ଜଣେ ବ୍ୟକ୍ତି କେବଳ କ୍ରମାଗତ ୬ ବର୍ଷ ଧରି କୌଣସି ବିସିସିଆଇ ପଦରେ ରହିପାରିବେ, ଯାହା ପରେ ତାଙ୍କୁ ତିନି ବର୍ଷର କୁଲିଂ ଅଫ୍ ବା ଅବ୍ୟାହତି ନେବାକୁ ପଡ଼ିବ।
ଶାହା ଆଇସିସି ଅଧ୍ୟକ୍ଷ ଭାବେ କ୍ରମାଗତ ଦୁଇ କାର୍ଯ୍ୟକାଳ ପଦ ସମ୍ଭାଳି ପାରିବେ। ଏହା ପରେ ସେ ୨୦୨୮ରେ ବିସିସିଆଇର ସଭାପତି ମଧ୍ୟ ହୋଇପାରିବେ।
ଆଇସିସିରେ ଶାହଙ୍କ ସମ୍ମୁଖରେ କିଛି ଜରୁରୀ ଆହ୍ବାନ ମଧ୍ୟରୁ ଗୋଟିଏ ହେଉଛି ପାକିସ୍ତାନରେ ଚାମ୍ପିୟନ୍ସ ଟ୍ରଫି ଆୟୋଜନ କରିବା।
ଏସୀୟ କ୍ରିକେଟ୍ ପରିଷଦର ଅଧ୍ୟକ୍ଷ ଭାବେ ଜୟ ଶାହ ପାକିସ୍ତାନ ଏବଂ ଶ୍ରୀଲଙ୍କା ଦ୍ୱାରା ଆୟୋଜିତ ୨୦୨୩ ଏସିଆ କପ୍ ଦିନିକିଆ ଟୁର୍ନାମେଣ୍ଟ ପାଇଁ ହାଇବ୍ରିଡ୍ ମଡେଲର ଜଣେ ଦୃଢ଼ ସମର୍ଥକ ଥିଲେ | ଏବେ ଦେଖିବାକୁ ବାକି ରହିଲା ଯେ ସେ ଆଇସିସି ଅଧ୍ୟକ୍ଷ ଭାବେ ଏହି ପରିସ୍ଥିତିକୁ କିପରି ପରିଚାଳନା କରୁଛନ୍ତି, କାରଣ ଭାରତ ସରକାର ଦଳକୁ ପାକିସ୍ତାନ ଯିବାକୁ ଅନୁମତି ଦେଇ ନ ପାରନ୍ତି।
ଏଥିରୁ ଯାହା ବୁଝା ପଡ଼ୁଛି, ଚାମ୍ପିୟନ୍ସ ଟ୍ରଫିରେ ମଧ୍ୟ ହାଇବ୍ରିଡ୍ ମଡେଲ୍ କାର୍ଯ୍ୟକାରୀ କରାଯାଇପାରେ, ଯାହା ଅନୁସାରେ ପାକିସ୍ତାନ ନିଜର ଅନ୍ୟ ସବୁ ମ୍ୟାଚ୍ ଘରୋଇ ମାଟିରେ ଏବଂ ଭାରତ ବିପକ୍ଷ ମ୍ୟାଚ୍ ଦୁବାଇରେ ଖେଳିବ।
ଏହାଛଡ଼ା ଟେଷ୍ଟ କ୍ରିକେଟର ଭବିଷ୍ୟତକୁ ସୁରକ୍ଷିତ ରଖିବା, ଦିନିକିଆ କ୍ରିକେଟର ଲୋକପ୍ରିୟ ବଜାୟ ରଖିବା ଏବଂ ‘କ୍ଲବ୍ ବନାମ ଦେଶ’ ବିବାଦ ମଧ୍ୟରେ ପ୍ରତିଭାଙ୍କୁ ଅନ୍ତର୍ଜାତୀୟ କ୍ରିକେଟ୍ ଠାରୁ ଦୂରେଇ ଯିବାକୁ ରୋକିବା ଭଳି ଦୀର୍ଘକାଳୀନ ଚ୍ୟାଲେଞ୍ଜ ମଧ୍ୟ ଜୟ ଶାହଙ୍କ ଆଗରେ ରହିଛି।
ଏହା ସହିତ ଅଲିମ୍ପିକ୍ସରେ କ୍ରିକେଟର ପ୍ରସାର ମଧ୍ୟ ଏକ ଗୁରୁତ୍ୱପୂର୍ଣ୍ଣ ଚ୍ୟାଲେଞ୍ଜ ହେବ, କାରଣ କ୍ରିକେଟ୍ ୨୦୨୮ ଲସ୍ ଆଞ୍ଜେଲସ୍ ଅଲିମ୍ପିକ୍ସରେ ଡେବ୍ୟୁ କରିବ ।