ବାହାନଗା ଟ୍ରେନ୍ ଦୁର୍ଘଟଣା ପରେ ଚେତିଲା ରେଳବାଇ, ସବୁ ସିଗ୍ନାଲିଂ ରୁମର ହେବ ‘ଡବଲ୍ ଲକିଂ’ ବ୍ୟବସ୍ଥା

ନୂଆଦିଲ୍ଲୀ: ବାହାନଗା ଟ୍ରେନ୍ ଟ୍ରାଜେଡି ପରେ ରେଳବାଇ ବୋର୍ଡ ଏହାର ସମସ୍ତ ସିଗ୍ନାଲିଂ ସମ୍ପତ୍ତି ପାଇଁ ‘ଡବଲ୍ ଲକ୍’ ବ୍ୟବସ୍ଥା କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଛି । ଏହାଛଡ଼ା ରକ୍ଷଣାବେକ୍ଷଣ କାର୍ଯ୍ୟ ପରେ ଟ୍ରେନ୍ ଚଳାଚଳ ଆରମ୍ଭ କରିବା ପାଇଁ ପ୍ରୋଟୋକଲ୍ କଡ଼ାକଡ଼ି କରିବାକୁ ମଧ୍ୟ ନିର୍ଦ୍ଦେଶ ହୋଇଛି ।

ଜୁନ୍ ୨ରେ ଓଡିଶାର ବାହାନଗା ବଜାର ଷ୍ଟେସନରେ ଘଟିଥିବା ତିନି ଟ୍ରେନ୍ ଦୁର୍ଘଟଣାରେ ୨୮୦ରୁ ଅଧିକ ଯାତ୍ରୀଙ୍କ ମୃତ୍ୟୁ ପରେ ରେଳବାଇ ବୋର୍ଡ ସୁରକ୍ଷା ସମ୍ବନ୍ଧୀୟ ଏପରି ଅନେକ ନିର୍ଦ୍ଦେଶାବଳୀ ଜାରି କରିଛି।

ଟ୍ରେନ୍ ଅପରେସନ୍ ସିଷ୍ଟମ୍, ରିଲେ ହଟ୍ ହାଉସିଂ ସିଗନାଲ୍ ଏବଂ ଲେଭଲ୍ କ୍ରସିଂ ଟେଲିକମ୍ ଯୋଗାଯୋଗ ଉପକରଣ, ପଏଣ୍ଟ ଏବଂ ଟ୍ରାକ୍ ସର୍କିଟ ସିଗନାଲ୍ ସହିତ ରିଲେ ରୁମ୍ ପାଇଁ “ଡବଲ୍-ଲକ୍” ବ୍ୟବସ୍ଥା କରିବାକୁ ନିର୍ଦ୍ଦେଶ ଦେଇଛି ରେଳବାଇ ବୋର୍ଡ । ନିର୍ଦ୍ଦେଶରେ କୁହାଯାଇଛି ଯେ “ରିଲେ ରୁମରେ ଅବାଧ ପ୍ରବେଶ” ସହ ସିଗନାଲିଂ ସିଷ୍ଟମରେ ଟାମ୍ପରିଂ ଯୋଗୁଁ ବାହାନଗା ଷ୍ଟେସନରେ କରମଣ୍ଡଳ ଏକ୍ସପ୍ରେସ ଲୁପ୍ ଲାଇନରେ ପଶି ଠିଆ ହୋଇଥିବା ଏକ ମାଲବାହୀ ଟ୍ରେନକୁ ଧକ୍କା ଦେଇଥିଲା।

ବରିଷ୍ଠ ଅଧିକାରୀମାନେ କହିଛନ୍ତି ଯେ ଇଣ୍ଟରଲକିଂ ସିଷ୍ଟମ ଟାମ୍ପରିଂ ହୋଇଥିବା ନେଇ ଯଥେଷ୍ଟ ପ୍ରମାଣ ଅଛି, ତେଣୁ ବର୍ତ୍ତମାନ ଏହାକୁ ‘ଟ୍ୟାମ୍ପରିଂ-ନିରୋଧୀ’ କରିବାକୁ ପଡିବ। ଡବଲ୍ ଲକିଂ ନିଶ୍ଚିତ କରିବ ଯେ ବିନା ଅନୁମତିରେ ଏହି ସ୍ଥାନକୁ ଯେପରି କେହି ପ୍ରବେଶ ନ କରେ।

ଏହି ଆଦେଶରେ କୁହାଯାଇଛି ଯେ ଷ୍ଟେସନ୍ ୟାର୍ଡରେ ଲେଭଲ୍ କ୍ରସିଂ ଗେଟ୍, ସିଗନାଲ୍ ରୁମ୍ ଏବଂ ଟେଲିକମ୍ ଯୋଗାଯୋଗ ଉପକରଣକୁ ରିଲେ ହଟ୍ ଭାବରେ ବ୍ୟବହାର କରାଯିବା ଉଚିତ ଏବଂ ଯଦି “ଡବଲ୍ ଲକ୍” ବ୍ୟବସ୍ଥା ନହୁଏ, ତେବେ “ସିଙ୍ଗଲ ଲକ୍”ର ଚାବି ଷ୍ଟେସନ ମାଷ୍ଟରଙ୍କ ପାଖରେ ରହିବ ।