କଲମ୍ବୋ: ଶ୍ରୀଲଙ୍କାର ରାଷ୍ଟ୍ରପତି ଗୋଟାବାୟା ରାଜପକ୍ଷେ ଜୁଲାଇ ୧୩ରେ ଇସ୍ତଫା ଦେବେ। ଶନିବାର ରାତିରେ ଶ୍ରୀଲଙ୍କା ସଂସଦର ବାଚସ୍ପତି ମହିନ୍ଦା ୟାପ ଅଭୟବର୍ଦ୍ଧନେ ଏହି ସୂଚନା ଦେଇଛନ୍ତି। ଶନିବାର ସନ୍ଧ୍ୟାରେ ସର୍ବଦଳୀୟ ନେତାଙ୍କ ବୈଠକ ପରେ ଅଭୟବର୍ଦ୍ଧନେ ତାଙ୍କୁ ଇସ୍ତଫା ଦେବାକୁ କହି ଚିଠି ଲେଖିଥିଲେ । ଏହା ପରେ ରାଷ୍ଟ୍ରପତି ରାଜପକ୍ଷେ ସଂସଦର ବାଚସ୍ପତିଙ୍କୁ ନିଜ ଇସ୍ତଫା ସମ୍ପର୍କରେ ସୂଚନା ଦେଇଛନ୍ତି।
ସର୍ବାଦଳୀୟ ନେତାମାନେ ରାଜପକ୍ଷେ ଏବଂ ପ୍ରଧାନମନ୍ତ୍ରୀ ରାନିଲ ବିକ୍ରମାସିଂଘେଙ୍କୁ ତୁରନ୍ତ ଇସ୍ତଫା ଦେବାକୁ କହିଥିଲେ ଯାହାଦ୍ୱାରା ସଂସଦର ଉତ୍ତରାଧିକାରୀ ନିଯୁକ୍ତ ନହେବା ପର୍ଯ୍ୟନ୍ତ ଅଭୟବର୍ଦ୍ଧନେଙ୍କୁ କାମଚଳା ରାଷ୍ଟ୍ରପତି କରିବା ପାଇଁ ବାଟ ଖୋଲିବ। ବିକ୍ରମାସିଂଘେ ଗତକାଲି ଇସ୍ତଫା ଦେଇଥିଲେ। ରାଜପକ୍ଷେ ଜୁଲାଇ ୧୩ ରେ ଇସ୍ତଫା ଦେବେ ବୋଲି ଅଭୟବର୍ଦ୍ଧନେଙ୍କ ଚିଠିର ଉତ୍ତର ଦେଇଛନ୍ତି।
ଶନିବାରର ବିଶାଳ ବିକ୍ଷୋଭ ପୂର୍ବରୁ ଶୁକ୍ରବାର ଦିନ ହିଁ ରାଷ୍ଟ୍ରପତି ରାଜପକ୍ଷେ ତାଙ୍କ ବାସଭବନ ଛାଡ଼ି ପଳାୟନ କରିଥିଲେ । ରାଜପକ୍ଷେ କେଉଁଠାରେ ଅଛନ୍ତି ତାହା ଜଣା ପଡିନାହିଁ। ଗତକାଲି ହଜାର ହଜାର ସରକାରୀ ବିରୋଧୀ ପ୍ରଦର୍ଶନକାରୀ କଲମ୍ବୋରେ ରାଜପକ୍ଷେଙ୍କ ସରକାରୀ ବାସଭବନକୁ କବଜା କରିଥିଲେ। ମାର୍ଚ୍ଚରୁ ରାଜପକ୍ଷେ ଇସ୍ତଫା ଦେବାକୁ ଚାପରେ ଥିଲେ। ଏପ୍ରିଲ୍ ପ୍ରାରମ୍ଭରେ ବିରୋଧୀମାନେ ତାଙ୍କ କାର୍ଯ୍ୟାଳୟର ପ୍ରବେଶ ଦ୍ୱାର ଦଖଲ କରିବାକୁ ଯାଉଥିବା ବେଳେ ସେ ରାଷ୍ଟ୍ରପତି ଭବନକୁ ତାଙ୍କ ବାସଭବନ ଏବଂ କାର୍ଯ୍ୟାଳୟ ଭାବରେ ବ୍ୟବହାର କରୁଥିଲେ।
ଶ୍ରୀଲଙ୍କା ଏକ ଅପ୍ରତ୍ୟାଶିତ ଆର୍ଥିକ ଅସ୍ଥିରତାର ସମ୍ମୁଖୀନ ହୋଇଛି। ୨୨ ନିୟୁତ ଜନସଂଖ୍ୟା ବିଶିଷ୍ଟ ଏହି ଦେଶ ସାତ ଦଶନ୍ଧି ମଧ୍ୟରେ ସବୁଠାରୁ ଖରାପ ପର୍ଯ୍ୟାୟ ଦେଇ ଗତି କରୁଛି | ଶ୍ରୀଲଙ୍କା ବୈଦେଶିକ ମୁଦ୍ରା ଅଭାବରୁ ଦେଶକୁ ଇନ୍ଧନ ତଥା ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ଆମଦାନୀ ପାଇଁ ଦେୟ ଦେବାକୁ ଅସମର୍ଥ ହୋଇଛି।