କୋଲକାତା: କଂଗ୍ରେସ ଓ ବିଜେପି ଠାରୁ ସମଦୂରତା ରକ୍ଷା କରିବାକୁ ନିଷ୍ପତ୍ତି ନେଇଛନ୍ତି ତୃଣମୂଳ କଂଗ୍ରେସ ଓ ସମାଜବାଦୀ ପାର୍ଟି । ଆସନ୍ତା ବର୍ଷ ହେବାକୁ ଥିବା ଲୋକସଭା ନିର୍ବାଚନ ପୂର୍ବରୁ ଆଞ୍ଚଳିକ ଦଳମାନଙ୍କୁ ଏକାଠି କରି ବିଜେପି ସହ ଲଢିବା ପାଇଁ ମମତା ବାନାର୍ଜୀ ଓ ଅଖିଳେଶ ଯାଦବ ସଙ୍କେତ ଦେଇଛନ୍ତି । କାଳିଘାଟ ସ୍ଥିତ ମମତାଙ୍କ ବାସଭବନରେ ଶୁକ୍ରବାର ଟିଏମସି ସୁପ୍ରିମୋ ଓ ଅଖିଳେଶଙ୍କ ସାକ୍ଷାତ ପରେ ଦୁଇ ଦଳର ଏପରି ଘୋଷଣା ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି । କାରଣ କଂଗ୍ରେସ, ଡିଏମକେ, ଆରଜେଡି, ଜେଡିୟୁ ଏବଂ ବାମପନ୍ଥୀ ଦଳ ମଧ୍ୟ ବିଜେପି ବିରୋଧରେ ଏକ ମେଣ୍ଟ ଗଠନ କରିବାକୁ ଏକଜୁଟ ହେବାରେ ଲାଗିଛନ୍ତି ।
୨୦୨୪ ନିର୍ବାଚନରେ ବିଜେପିର ମୁକାବିଲା ପାଇଁ ଆଞ୍ଚଳିକ ଦଳ ସହ ଆଲୋଚନା କରାଯିବ ବୋଲି ତୃଣମୂଳ କଂଗ୍ରେସ କହିଛି । କିନ୍ତୁ କଂଗ୍ରେସ ଏବଂ ବାମପନ୍ଥୀଠାରୁ ଅଲଗା ଏକ ‘ତୃତୀୟ ସାମ୍ମୁଖ୍ୟ’ ଗଠନ ଯୋଜନାକୁ ଅସ୍ବୀକାର କରିଛି ଦଳ।
ସମାଜବାଦୀ ପାର୍ଟି (ଏସପି) ସଭାପତି ଅଖିଳେଶ ଯାଦବ କେନ୍ଦ୍ରରେ ଶାସକ ବିଜେପି ଓ କଂଗ୍ରେସଠାରୁ ସମ ଦୂରତା ରଖିବାକୁ ଘୋଷଣା କରିଥିଲେ। ପାର୍ଟି ବୈଠକ ପରେ ସେ ଗଣମାଧ୍ୟମକୁ କହିଛନ୍ତି, “ଆମେ ପଶ୍ଚିମବଙ୍ଗର ମମତା ଦିଦିଙ୍କ ସହ ଅଛୁ। ବର୍ତ୍ତମାନ ଆମର ସ୍ଥିତି ହେଉଛି ଉଭୟ ବିଜେପି ଏବଂ କଂଗ୍ରେସ ଠାରୁ ସମାନ ଦୂରତା ବଜାୟ ରଖିବା। ଉତ୍ତର ପ୍ରଦେଶରେ କଂଗ୍ରେସର ଆଉ କିଛି ବାକି ନାହିଁ। ଆମର ଲଢ଼େଇ କେବଳ ବିଜେପି ବିରୋଧରେ ।
ମମତାଙ୍କ ପକ୍ଷରୁ କୌଣସି ବୟାନ ଜାରି କରାଯାଇ ନାହିଁ। କିନ୍ତୁ ତାଙ୍କ ଦଳର ମୁଖପାତ୍ର ସୁଦୀପ ବାନ୍ଦୋପାଧ୍ୟାୟ କହିଛନ୍ତି ଯେ ୨୦୨୪ ଲୋକସଭା ନିର୍ବାଚନରେ ବିଜେପିର ମୁକାବିଲା ପାଇଁ ରଣନୀତି ପ୍ରସ୍ତୁତ କରିବାକୁ ଟିଏମସି “ଶକ୍ତିଶାଳୀ ଆଞ୍ଚଳିକ ଦଳମାନଙ୍କ” ସହ ଆଲୋଚନା କରିବ। ଆମେ କଂଗ୍ରେସ ଓ ବିଜେପି ଠାରୁ ସମଦୂରତା ରକ୍ଷା କରିବୁ । ମମତା ମଧ୍ୟ ବିଜେଡି ସୁପ୍ରିମୋ ତଥା ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଆସନ୍ତା ୨୩ରେ ଭେଟିବେ ବୋଲି ସେ କହିଛନ୍ତି । କିନ୍ତୁ ତୃତୀୟ ସାମ୍ମୁଖ୍ୟ ଯୋଜନା ଚର୍ଚ୍ଚାକୁ ବାନ୍ଦୋପାଧ୍ୟାୟ ହାଲୁକାରେ ନେଇଥିଲେ ।
Comments are closed.