ମୁମ୍ବାଇ: ସଞ୍ଜୟ ରାଉତଙ୍କ ବିରୋଧରେ ଇଡି କାର୍ଯ୍ୟାନୁଷ୍ଠାନ ଉପରେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ତଥା ଶିବସେନା ମୁଖ୍ୟ ଉଦ୍ଧବ ଠାକରେ ମୁହଁ ଖୋଲିଛନ୍ତି । ଏଥିପାଇଁ ସେ ବିଜେପିକୁ ଚେତାବନୀ ମଧ୍ୟ ଦେଇଛନ୍ତି।
ଏଠାରେ ଏକ ସାମ୍ବାଦିକ ସମ୍ମିଳନୀରେ ଠାକରେ କହିଛନ୍ତି- ମୁଁ ସଞ୍ଜୟ ରାଉତଙ୍କ ପାଇଁ ଗର୍ବିତ। ସଞ୍ଜୟ ରାଉତଙ୍କର ଅପରାଧ କ’ଣ? ସେ ଜଣେ ସାମ୍ବାଦିକ, ଶିବ ସୈନିକ ଏବଂ ନିର୍ଭୀକ ନେତା | ତାଙ୍କୁ ଗିରଫ କରାଯାଇଛି। ସେ ମରିଯିବେ ସିନା ଆତ୍ମସମର୍ପଣ କରିବେ ନାହିଁ।
ସମ୍ବିଧାନର ଉଲ୍ଲଂଘନ କାର୍ଯ୍ୟକୁ ବିରୋଧ କରୁଥିବା ଲୋକଙ୍କୁ ଜେଲ ପଠାଯାଉଛି। ଦେଶରେ ଏପରି ପରିସ୍ଥିତି ଉପୁଜିଛି ଯେ ଯଦି ସେ ଏହା ବିରୁଦ୍ଧରେ କେହି ପାଟି ଖୋଲନ୍ତି ତେବେ ସେ ଫସିଯିବ। କିନ୍ତୁ ନ୍ୟାୟପାଳିକା ଉପରେ ଆମର ବିଶ୍ୱାସ ଅଛି |
ଆକ୍ରୋଶମୂଳକ ରାଜନୀତି ନେଇ ଉଦ୍ଧବ ବିଜେପିକୁ ମଧ୍ୟ ଟାର୍ଗେଟ କରିଛନ୍ତି । ସେ କହିଛନ୍ତି, ଆଜିର ରାଜନୀତିରେ ବିରୋଧୀଙ୍କ ଉପରେ ବଳ ପ୍ରୟୋଗ କରାଯାଉଛି । ବିରୋଧୀଙ୍କୁ ଧ୍ବଂସ କରିବାକୁ ଚାହୁଁଛି ବିଜେପି । କିନ୍ତୁ ସମୟ ବଦଳିବାରେ ଲାଗିଛି। ଯେବେ ଆମର ସମୟ ଆସିବ, ସେତେବେଳେ ଆପଣଙ୍କର କ’ଣ ହେବ ଭାବନ୍ତୁ।
ଶିବସେନା ମୁଖ୍ୟ କହିଛନ୍ତି ଯେ ଯିଏ ନତମସ୍ତକ ହୁଏ ସେ କେବେବି ଶିବ ସୈନିକ ହୋଇପାରିବ ନାହିଁ। ଜଣେ ପ୍ରକୃତ ଶିବ ସୈନିକ କେବେ ବି ମୁଣ୍ଡ ନୁଆଇଁବ ନାହିଁ |
ଏହାପୂର୍ବରୁ ଠାକରେ ସଞ୍ଜୟ ରାଉତଙ୍କ ଘରେ ପହଞ୍ଚି ତାଙ୍କ ପରିବାର ସଦସ୍ୟଙ୍କୁ ଭେଟିଥିଲେ।
ସଞ୍ଜୟ ରାଉତଙ୍କୁ ରବିବାର ବିଳମ୍ବିତ ରାତିରେ ଇଡି ଗିରଫ କରିଥିଲା। ରବିବାର ଦିନସାରା ପଚରାଉଚରା ପରେ ଇଡି ତାଙ୍କୁ ରାତିରେ ଗିରଫ କରିଥିଲା।