ନୂଆ ସଂସଦ ଭବନ ନିର୍ମାଣର ପଥ ପରିଷ୍କାର, କେନ୍ଦ୍ରୀୟ ଭିସ୍ତା ପ୍ରକଳ୍ପକୁ ସୁପ୍ରିମକୋର୍ଟଙ୍କ ସବୁଜ ସଙ୍କେତ

ନୂଆଦିଲ୍ଲୀ – କେନ୍ଦ୍ରୀୟ ଭିସ୍ତା ପ୍ରକଳ୍ପକୁ ଆଜି ସୁପ୍ରିମକୋର୍ଟ ସବୁଜ ସଙ୍କେତ ଦେଇଛନ୍ତି । ସୁପ୍ରିମକୋର୍ଟର ତିନିଜଣିଆ ଖଣ୍ଡପୀଠ ୨:୧ ରେ ଏହି ନିଷ୍ପତ୍ତି ଶୁଣାଇଛନ୍ତି । ସୁପ୍ରିମକୋର୍ଟ କହିଛନ୍ତି ଯେ ଡିଡିଏ ଦ୍ୱାରା ଜମିର ବ୍ୟବହାରକୁ ପରିବର୍ତ୍ତନ କରିବା ଠିକ୍। ପରିବେଶ ମଞ୍ଜୁରୀ ପାଇବା ପ୍ରକ୍ରିୟା ମଧ୍ୟ ଠିକ ବୋଲି କୋର୍ଟ କହିଛନ୍ତି | ତେବେ ପ୍ରଦୂଷଣକୁ ରୋକିବା ପାଇଁ ଏହାର ନିର୍ମାଣ ସମୟରେ ସ୍ମଗ୍ ଟାୱାର ସ୍ଥାପନ କରାଯିବା ଉଚିତ ବୋଲି କୋର୍ଟ କହିଛନ୍ତି। ଏହାଛଡା ନିର୍ମାଣ ପୂର୍ବରୁ ହେରିଟେଜ୍ କମିଟିର ଅନୁମୋଦନ ମଧ୍ୟ ନେବାକୁ ପଡିବ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି ।

କେନ୍ଦ୍ର ସରକାରଙ୍କ ଏହି ମହତ୍ତ୍ବାକାଂକ୍ଷୀ ପ୍ରକଳ୍ପକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଏକାଧିକ ପିଟିସନ ଦାୟର କରାଯାଇଥିଲା । ଏହି ପିଟିସନ ଗୁଡିକରେ ଯୁକ୍ତି କରାଯାଇଥିଲା ଯେ ଉପଯୁକ୍ତ ଆଇନ ପ୍ରଣୟନ ନକରି ପ୍ରକଳ୍ପ ଆରମ୍ଭ ହୋଇଛି। ଏଥିପାଇଁ ପରିବେଶ ମଞ୍ଜୁରୀ ପାଇବା ପ୍ରକ୍ରିୟାରେ ତ୍ରୁଟି ରହିଛି । ହଜାରେ କୋଟି ଟଙ୍କାର ଏହି ଯୋଜନା କେବଳ ସରକାରୀ ଅର୍ଥର ଅପଚୟ। ସଂସଦ ଏବଂ ଏହାର ଆଖପାଖ ଐତିହାସିକ କୋଠା ଏହି ପ୍ରକଳ୍ପ ଦ୍ୱାରା ନଷ୍ଟ ହେବାର ଆଶଙ୍କା ରହିଛି।

ନଭେମ୍ବର ୫ରେ, କେନ୍ଦ୍ରୀୟ ଭିସ୍ତା ପ୍ରକଳ୍ପ ଉପରେ ସୁପ୍ରିମକୋର୍ଟ ରାୟ ସଂରକ୍ଷିତ ରଖିଥିଲେ ।

କେନ୍ଦ୍ରୀୟ ଭିସ୍ତା ପ୍ରକଳ୍ପ ଅଧୀନରେ ନୂତନ ସଂସଦ କମ୍ପ୍ଲେକ୍ସ ନିର୍ମାଣ ହେବ। ଲୋକସଭାର ୮୭୬ଟି ସିଟ୍, ରାଜ୍ୟସଭାର ୪୦୦ ଟି ସିଟ୍ ଏବଂ ସେଣ୍ଟ୍ରାଲ ହଲର ୧୨୨୪ ଟି ସିଟ୍ ରହିବ। ଏହା ସଂସଦର ମିଳିତ ବୈଠକରେ ସଦସ୍ୟମାନଙ୍କୁ ପୃଥକ ଭାବେ ବସିବାର ଆବଶ୍ୟକତାକୁ ଦୂର କରିବ। ସେଣ୍ଟ୍ରାଲ ଭିସ୍ତା ପ୍ରକଳ୍ପ ଅଧୀନରେ ୧୦ଟି ପରସ୍ପର ସହ ସଂଯୁକ୍ତ ଅଟ୍ଟାଳିକାରେ ୫୧ ମନ୍ତ୍ରଣାଳୟ ରହିବ । ବର୍ତ୍ତମାନ ଏହି ମନ୍ତ୍ରଣାଳୟଗୁଡ଼ିକ ପରସ୍ପରଠାରୁ ଦୂରରେ ୪୭ଟି ପୃଥକ୍ କୋଠାରେ କାର୍ଯ୍ୟ କରୁଛି | ନିକଟସ୍ଥ ମେଟ୍ରୋ ଷ୍ଟେସନ ସହିତ ମନ୍ତ୍ରଣାଳୟକୁ ସଂଯୋଗ କରିବା ପାଇଁ ଏକ ଭୂତଳ ମାର୍ଗ ମଧ୍ୟ ନିର୍ମାଣ କରାଯିବ । ପ୍ରଧାନମନ୍ତ୍ରୀ ଏବଂ ଉପରାଷ୍ଟ୍ରପତିଙ୍କ ପାଇଁ ଏକ ନୂତନ ନିବାସ ମଧ୍ୟ ରାଷ୍ଟ୍ରପତି ଭବନ ନିକଟରେ ନିର୍ମାଣ ହେବ। ବର୍ତ୍ତମାନ ପ୍ରଧାନମନ୍ତ୍ରୀ ଏବଂ ଉପରାଷ୍ଟ୍ରପତି ନିବାସ ରାଷ୍ଟ୍ରପତି ଭବନଠାରୁ ଦୂରରେ ଅବସ୍ଥିତ ।