ପାଟନା –ମତଗଣନା ଆରମ୍ଭ ହେବାର ଦୀର୍ଘ ୧୬ ଘଂଟା ପରେ ସ୍ପଷ୍ଟ ହୋଇଛି ବିହାର ବିଧାନସଭା ନିର୍ବାଚନର ଚିତ୍ର । ବିଳମ୍ବିତ ରାତିରେ ମତଗଣନା ଶେଷ ହୋଇଛି । ଏନଡିଏକୁ ମିଳିଛି ସ୍ପଷ୍ଟ ବହୁମତ । ନୀତୀଶ କୁମାର ଓ ବିଜେପି କ୍ଷମତା ବଜାୟ ରଖିଛନ୍ତି । ୨୪୩ ଆସନ ମଧ୍ୟରୁ ଏନଡିଏକୁ ମିଳିଛି ୧୨୫ ଆସନ, ଯାହା କି ମ୍ୟାଜିକ ନମ୍ବର ୧୨୨ଠାରୁ ତିନି ଅଧିକ । ଏନଡିଏର କଡା ମୁକାବିଲା କରିଥିବା ତେଜସ୍ୱୀ ଯାଦବଙ୍କ ନେତୃତ୍ୱାଧୀନ ଆରଜେଡି ମେଂଟ ( ମହାମେଂଟ ) ୧୧୦ ଆସନ ଜିତି କ୍ଷମତାଠାରୁ ଅଳ୍ପ ଦୂରରେ ରହିଯାଇଛି ।
ସମଗ୍ର ନିର୍ବାଚନରେ ଆରଜେଡି ସର୍ବବୃହତ ଦଳ ଭାବେ ଉଭା ହୋଇଛି । ଆରଜେଡିକୁ ସର୍ବାଧିକ ୭୫ଟି ଆସନ ମିଳିଛି । ବିଜେପି ୭୪ ଆସନ ପାଇ ଦ୍ୱିତୀୟ ସ୍ଥାନରେ ରହିଛି । ନୀତୀଶ କୁମାର ଚତୁର୍ଥ ଥର ପାଇଁ ମୁଖ୍ୟମନ୍ତ୍ରୀ ହେବା ସ୍ପଷ୍ଟ ହୋଇଥିଲେ ମଧ୍ୟ ତାଙ୍କର ଜେଡିୟୁ ଏଥର ମାତ୍ର ୪୩ ଆସନ ମିଳିଛି । ୨୦୧୫ରେ ଜେଡିୟୁକୁ ୭୧ ଆସନ ମିଳିଥିଲା । ନୀତୀଶ ମୁଖ୍ୟମନ୍ତ୍ରୀ ହେଲେ ମଧ୍ୟ ଏନଡିଏରେ ଜେଡିୟୁ ପ୍ରଥମ ଥର ପାଇଁ ବିଜେପିର ଜୁନିଅର ପାର୍ଟନର ଭାବେ ରହିବ । ନୀତୀଶଙ୍କୁ ବିରୋଧ କରି ଏନଡିଏରୁ ଓହରି ଯାଇଥିବା ଚିରାଗ ପାଶ୍ୱାନଙ୍କ ଲୋକ ଜନଶକ୍ତି ପାର୍ଟିକୁ ମାତ୍ର ଗୋଟିଏ ଆସନ ମିଳିଥିଲେ ମଧ୍ୟ ଦଳ ଜେଡିୟୁର କ୍ଷତିସାଧନ କରିଛି ।
କଂଗ୍ରେସକୁ ଏଥର ମଧ୍ୟ ନିରାଶ ହେବାକୁ ପଡିଛି । ଦଳ ଏଥର ୭୦ଟି ଆସନରେ ଲଢିଥିଲେ ମଧ୍ୟ ମାତ୍ର ୧୯ଟିରେ ବିଜୟୀ ହୋଇପାରିଛି । କଂଗ୍ରେସର ଖରାପ ପ୍ରଦର୍ଶନ ହିଁ ଆରଜେଡି ପାଇଁ ବୋଝ ହେଲା ବୋଲି କୁହାଯାଉଛି । ଏଆଇଏମଆଇଏମ ୫ଟି ଆସନ ଜିତିଥିଲା ବେଳେ ବାମପନ୍ଥୀମାନେ ଅପେକ୍ଷାକୃତ ଭଲ ପ୍ରଦର୍ଶନ କରି ୧୬ଟି ଆସନ ଜିତିଛନ୍ତି । ଆରଜେଡି ମେଂଟରେ ସାମିଲ ଥିବା ବାମଦଳଗୁଡିକ ଏଥର ୨୯ଟି ଆସନରେ ଲଢିଥିଲେ ।