ନୂଆଦିଲ୍ଲୀ: କରୋନାର ତୃତୀୟ ଲହରୀ ଦ୍ୱାରା ପିଲାମାନେ ଅଧିକ ପ୍ରଭାବିତ ହେବାର ଭୟ ମଧ୍ୟରେ ଏକ ଆଶ୍ବସ୍ତିକର ଖବର ଆସିଛି | ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବୀୟ କହିଛନ୍ତି ଯେ ଆସନ୍ତା ମାସରୁ ପିଲାମାନଙ୍କ ପାଇଁ କରୋନା ଟିକା ଉପଲବ୍ଧ ହୋଇପାରେ। ଗଣମାଧ୍ୟମ ରିପୋର୍ଟ ଅନୁଯାୟୀ ମଙ୍ଗଳବାର ଅନୁଷ୍ଠିତ ବିଜେପି ସଂସଦୀୟ ଦଳ ବୈଠକରେ ସ୍ୱାସ୍ଥ୍ୟମନ୍ତ୍ରୀ ଏହି ସୂଚନା ଦେଇଛନ୍ତି। ବର୍ତ୍ତମାନ ସୁଦ୍ଧା ଦେଶରେ ୧୮ ବର୍ଷରୁ ଅଧିକ ବୟସ୍କ ଲୋକଙ୍କ ଟିକାକରଣ ଚାଲିଛି ।
ରିପୋର୍ଟ ଅନୁଯାୟୀ, ସ୍ୱାସ୍ଥ୍ୟମନ୍ତ୍ରୀ ଏହି ବୈଠକରେ କହିଛନ୍ତି ଯେ ସରକାର ସମ୍ଭବତଃ ଆସନ୍ତା ମାସରୁ ପିଲାମାନଙ୍କୁ ଟିକାକରଣ ଆରମ୍ଭ କରିବେ।
କରୋନା ସଂକ୍ରମଣର ଶୃଙ୍ଖଳ ଭାଙ୍ଗିବା ଏବଂ ସ୍କୁଲ୍ ଖୋଲିବା ପାଇଁ ପିଲାମାନଙ୍କ ଟିକାକରଣ ଏକ ବଡ ପଦକ୍ଷେପ ସାବ୍ୟସ୍ତ ହୋଇପାରେ ବୋଲି ପୂର୍ବରୁ ବିଶେଷଜ୍ଞ କହିଛନ୍ତି।
ସେପ୍ଟେମ୍ବର ମାସ ସୁଦ୍ଧା ଦେଶରେ ପିଲାମାନଙ୍କ ପାଇଁ କରୋନା ଟିକା ଆସିବାର ସମ୍ଭାବନା ଥିଲା | ଏଆଇଏମ୍ଏସ୍ ମୁଖ୍ୟ ଡଃ.ରଣଦୀପ ଗୁଲେରିଆ ମଧ୍ୟ ନିକଟରେ କହିଥିଲେ ଯେ ସେପ୍ଟେମ୍ବର ସୁଦ୍ଧା ଦେଶରେ ପିଲାମାନଙ୍କର ଟୀକାକରଣ ଆରମ୍ଭ ହୋଇପାରେ।
ଗୁଲେରିଆ କହିଥିଲେ ଯେ ଜାଇଡସ୍ କାଡିଲା ନିଜ ଟିକା ପରୀକ୍ଷା କରିସାରିଛନ୍ତି ଏବଂ ଜରୁରୀକାଳୀନ ବ୍ୟବହାର ପାଇଁ ମଞ୍ଜୁରିକୁ ଅପେକ୍ଷା କରିଛନ୍ତି। ପିଲାମାନଙ୍କ ଉପରେ ଭାରତ ବାୟୋଟେକ୍ ର କୋଭାକ୍ସିନ୍ ପରୀକ୍ଷା ମଧ୍ୟ ଅଗଷ୍ଟ କିମ୍ବା ସେପ୍ଟେମ୍ବର ସୁଦ୍ଧା ଶେଷ ହୋଇପାରେ | ଏହାଛଡା, ଫାଇଜର ଟିକା ଆମେରିକାର ନିୟାମକଙ୍କଠାରୁ ଜରୁରୀକାଳୀନ ବ୍ୟବହାର ଅନୁମୋଦନ ଲାଭ କରିଛି। ଏଭଳି ସ୍ଥିତିରେ ସେପ୍ଟେମ୍ବର ସୁଦ୍ଧା ଭାରତରେ ପିଲାମାନଙ୍କୁ ଟୀକାକରଣ ଅଭିଯାନ ଆରମ୍ଭ ହେଇପାରେ ବୋଲି ଆଶା କରାଯାଉଛି।