ନୂଆଦିଲ୍ଲୀ: କରୋନାର ସମ୍ଭାବ୍ୟ ତୃତୀୟ ଲହର ବିପଦ ମଧ୍ୟରେ ଦେଶରେ ସଂକ୍ରମଣ ପୁଣି ଉପରମୁହାଁ ହୋଇଛି। ଲଗାତାର ତୃତୀୟ ଦିନ ୪୦ ହଜାରରୁ ଉର୍ଦ୍ଧ୍ବ ମାମଲା ସାମ୍ନାକୁ ଆସୁଛି। ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ଜାରି ତଥ୍ୟ ଅନୁଯାୟୀ, ଗତ ୨୪ ଘଣ୍ଟାରେ ୪୪,୨୩୦ ନୂଆ ମାମଲା ଆସିଛି ଏବଂ ୫୫୫ ସଂକ୍ରମିତ ଲୋକ ପ୍ରାଣ ହରାଇଛନ୍ତି | କେରଳର ସ୍ଥିତି ଚିନ୍ତା ବଢାଇଛି । ଏହି ରାଜ୍ୟରୁ ସର୍ବାଧିକ ୨୨,୦୬୪ ମାମଲା ରିପୋର୍ଟ ହୋଇଛି। ଅନ୍ୟପକ୍ଷରେ ଗତ ୨୪ ଘଣ୍ଟାରେ ସାରା ଦେଶରେ ୪୨,୩୬୦ ଲୋକ କରୋନାରୁ ଆରୋଗ୍ୟ ଲାଭ କରିଛନ୍ତି, ଅର୍ଥାତ୍ ଗତକାଲି ୧୩୧୫ ସକ୍ରିୟ ମାମଲା ବୃଦ୍ଧି ପାଇଛି।
ମହାମାରୀ ଆରମ୍ଭରୁ ଏଯାବତ ଭାରତରେ ମୋଟ ତିନି କୋଟି ୧୫ ଲକ୍ଷ ୭୨ ହଜାର ଲୋକ ସଂକ୍ରମିତ ହୋଇଛନ୍ତି। ଏଥିମଧ୍ୟରୁ ୪ ଲକ୍ଷ ୨୩ ହଜାର ୨୧୭ ଜଣଙ୍କର ମୃତ୍ୟୁ ହୋଇଛି। ବର୍ତ୍ତମାନ ସୁଦ୍ଧା ୩ କୋଟି ୭ ଲକ୍ଷ ୪୩ ହଜାର ଲୋକ ଆରୋଗ୍ୟ ଲାଭ କରିଛନ୍ତି। ଦେଶରେ କରୋନା ସକ୍ରିୟ ମାମଲା ସଂଖ୍ୟା ଚାରି ଲକ୍ଷରୁ ଅଧିକ ରହିଛି | ଏବେ ସମୁଦାୟ ୪ ଲକ୍ଷ ୫ ହଜାର ୧୫୫ ଲୋକ ଚିକିତ୍ସାଧୀନ ଅଛନ୍ତି ।
ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଜୁଲାଇ ୨୯ ପର୍ଯ୍ୟନ୍ତ ସାରା ଦେଶରେ ୪୫ କୋଟି ୬୦ ଲକ୍ଷ କରୋନା ଟିକା ଦିଆଯାଇଛି। ଗତ ୨୪ ଘଣ୍ଟାରେ ୫୧ ଲକ୍ଷ ୮୩ ହଜାର ଟିକା ଦିଆଯାଇଥିଲା। ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର) ଅନୁଯାୟୀ ଏପର୍ଯ୍ୟନ୍ତ ୪୬ କୋଟି ୪୬ ଲକ୍ଷ କରୋନା ପରୀକ୍ଷା କରାଯାଇଛି। ଗତକାଲି ୧୮.୧୬ ଲକ୍ଷ କରୋନା ନମୁନା ପରୀକ୍ଷା କରାଯାଇଥିଲା, ଯାହାର ପଜିଟିଭିଟି ହାର ୩ ପ୍ରତିଶତରୁ କମ୍ ଅଟେ |