ନୂଆଦିଲ୍ଲୀ: ଆମ୍ ଆଦମୀ ପାର୍ଟି (ଆପ୍) ପ୍ରାର୍ଥୀ ଶେଲି ଓବରୟ ଦିଲ୍ଲୀ ମହାନଗର ନିଗମ (ଏମସିଡି)ର ନୂଆ ମେୟର ଭାବେ ନିର୍ବାଚିତ ହୋଇଛନ୍ତି ।
ଏମସିଡି ମେୟର ପଦ ପାଇଁ ବୁଧବାର ଅନୁଷ୍ଠିତ ନିର୍ବାଚନରେ ଆପ୍ ପ୍ରାର୍ଥୀ ଶେଲି ଓବରୟ ଭାରତୀୟ ଜନତା ପାର୍ଟି ପ୍ରାର୍ଥୀ ରେଖା ଗୁପ୍ତାଙ୍କୁ ୩୪ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଛନ୍ତି।
ଏହି ବିଜୟ ପରେ ଶେଲି ଓବରୟ କହିଛନ୍ତି, “ମୁଁ ସାମ୍ବିଧାନିକ ଉପାୟରେ ଏମସିଡି ଚଳାଇବି। ଆଶା କରୁଛି ସବୁ ସଦସ୍ୟ ଗୃହର ସମ୍ମାନ ରକ୍ଷା କରିବେ ଏବଂ ଏହାର ସୁଗମ କାର୍ଯ୍ୟରେ ସହଯୋଗ କରିବେ।”
ଶେଲି ଓବରୟଙ୍କୁ ଅଭିନନ୍ଦନ ଜଣାଇ ଦିଲ୍ଲୀର ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ କହିଛନ୍ତି, “ଗୁଣ୍ଡାମାନେ ହାରିଛନ୍ତି, ଜନସାଧାରଣ ଜିତିଛନ୍ତି। ଦିଲ୍ଲୀର ମ୍ୟୁନିସିପାଲ୍ କର୍ପୋରେସନରେ ଆମ୍ ଆଦମୀ ପାର୍ଟି ମେୟର ପ୍ରାର୍ଥୀ ବିଜୟୀ ହୋଇଥିବାରୁ ସମସ୍ତ କର୍ମକର୍ତ୍ତା ଓ ଦିଲ୍ଲୀର ଜନତାଙ୍କୁ ଅନେକ ଅଭିନନ୍ଦନ। ”
ଶେଲି ଓବରୟ ପୂର୍ବ ପଟେଲ ନଗରର କର୍ପୋରେଟର ।
ତାଙ୍କ ଟ୍ୱିଟର ପ୍ରୋଫାଇଲ ଅନୁଯାୟୀ ସେ ଦିଲ୍ଲୀ ବିଶ୍ୱବିଦ୍ୟାଳୟ, ଇନ୍ଦ୍ରପ୍ରସ୍ଥ ବିଶ୍ୱବିଦ୍ୟାଳୟ, ଇଗ୍ନୁ ଏବଂ ଏନ୍ଏମ୍ଆଇଏମ୍ଏସ୍ ରେ ସହକାରୀ ପ୍ରଫେସର ଭାବେ କାର୍ଯ୍ୟ କରିଛନ୍ତି। ସେ ନିଜକୁ ଜଣେ ଲେଖକ ଭାବେ ମଧ୍ୟ ପରିଚିତ କରିଛନ୍ତି |
ଡିସେମ୍ବରରେ ଅନୁଷ୍ଠିତ ଦିଲ୍ଲୀ ଏମସିଡି ନିର୍ବାଚନରେ ବିଜେପିର ୧୫ ବର୍ଷ ଶାସନର ଅନ୍ତ ଘଟାଇ ଆମ୍ ଆଦମୀ ପାର୍ଟି ବିଜୟୀ ହୋଇଥିଲା । ଆମ୍ ଆଦମୀ ପାର୍ଟି ୧୩୪ଟି ଆସନ ଜିତିଥିବା ବେଳେ ବିଜେପି ୧୦୪ଟି ସିଟ୍ ପାଇଥିଲା।