ନୂଆଦିଲ୍ଲୀ, ଲୋକସଭାରେ କଂଗ୍ରେସର ନେତା ଅଧୀର ରଞ୍ଜନ ଚୌଧୁରୀ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଚିଠି ଲେଖି ଅଭିଯୋଗ କରିଛନ୍ତି ଯେ ମୁଖ୍ୟ ସୂଚନା କମିଶନର (ସିଆଇସି)ଙ୍କ ଚୟନ ପ୍ରକ୍ରିୟା ନେଇ ତାଙ୍କୁ ଅନ୍ଧାରରେ ରଖାଯାଇଥିଲା । ଚୌଧୁରୀ ମୁଖ୍ୟ ସୂଚନା କମିଶନର (ସିଆଇସି)ଙ୍କ ନିଯୁକ୍ତି ସମ୍ପର୍କିତ ଚୟନ କମିଟିର ସଦସ୍ୟ ମଧ୍ୟ ଅଛନ୍ତି ।
ସେ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ ସିଆଇସି ନିଯୁକ୍ତିରେ ସମସ୍ତ ଗଣତାନ୍ତ୍ରିକ ମାନଦଣ୍ଡ, ପରମ୍ପରା ଏବଂ ପ୍ରକ୍ରିୟାକୁ ଅଣଦେଖା କରାଯାଇଛି ।
ଏହି ଚିଠିରେ ଚୌଧୁରୀ କହିଛନ୍ତି ଯେ ବିରୋଧୀଙ୍କ ସ୍ୱରକୁ ଅଣଦେଖା କରାଯାଇଛି ଏବଂ ଏହା ଗଣତନ୍ତ୍ର ପାଇଁ ଭଲ ନୁହେଁ।
ପୂର୍ବତନ ଆଇଏଏସ୍ ଅଧିକାରୀ ହିରାଲାଲ ସମରିଆ ସୋମବାର ମୁଖ୍ୟ ସୂଚନା କମିଶନର ଭାବେ ଶପଥ ଗ୍ରହଣ କରିଥିଲେ।
ଚୌଧୁରୀ ଅଭିଯୋଗ କରିଛନ୍ତି, ନଭେମ୍ବର ୩ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଚୟନ କମିଟିର ବୈଠକ ଡାକିବାକୁ ସେ ଅନୁରୋଧ କରିଥିଲେ । କିନ୍ତୁ ପ୍ରଧାନମନ୍ତ୍ରୀଙ୍କ ସୁବିଧା ଅନୁଯାୟୀ ସେଦିନ ସନ୍ଧ୍ୟା ୬ଟାରେ ଏହି ବୈଠକ ଡକାଯାଇଥିଲା।
ସଂସଦର ପବ୍ଲିକ ଆକାଉଣ୍ଟସ କମିଟିର ସଭାପତି କହିଛନ୍ତି ଯେ ଚୟନ କମିଟିର ସଦସ୍ୟ ହୋଇଥିଲେ ମଧ୍ୟ ସିଆଇସି ଏବଂ ସୂଚନା କମିଶନର ଚୟନକୁ ନେଇ ତାଙ୍କୁ ସମ୍ପୂର୍ଣ୍ଣ ଅନ୍ଧାରରେ ରଖାଯାଇଥିଲା ।
ସେ କହିଛନ୍ତି, ନଭେମ୍ବର ୩ରେ ସନ୍ଧ୍ୟା ୬ଟା ସମୟରେ ପ୍ରଧାନମନ୍ତ୍ରୀଙ୍କ ବାସଭବନରେ ଅନୁଷ୍ଠିତ ଉକ୍ତ ବୈଠକରେ କେବଳ ପ୍ରଧାନମନ୍ତ୍ରୀ ଏବଂ ଗୃହମନ୍ତ୍ରୀ ଉପସ୍ଥିତ ଥିଲେ । ବିରୋଧୀଙ୍କ ଚେହେରା ‘ଅର୍ଥାତ୍ ଚୟନ କମିଟିର ଜଣେ ସଦସ୍ୟ ଭାବେ ମୋତେ ସୂଚନା ଦିଆଯାଇନଥିଲା। ବୈଠକର କିଛି ଘଣ୍ଟା ମଧ୍ୟରେ ମନୋନୀତ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିଲା ଓ ଏନେଇ ବିଜ୍ଞପ୍ତି ପ୍ରକାଶ ବି କରାଯାଇଥିଲା। ସମଗ୍ର ଚୟନ ପ୍ରକ୍ରିୟା ପୂର୍ବ ନିର୍ଦ୍ଧାରିତ ଥିଲା ବୋଲି ଚୌଧୁରୀ ଅଭିଯୋଗ କରିଛନ୍ତି ।