ନୂଆଦିଲ୍ଲୀ: ପଞ୍ଜାବରେ ୨୪ ଘଣ୍ଟା ମଧ୍ୟରେ ଧାର୍ମିକ ପୀଠର ଅପମାନ ଅଭିଯୋଗରେ ଆଉ ଏକ ହତ୍ୟା ମାମଲା ସାମ୍ନାକୁ ଆସିଛି। ଅମୃତସର ପରେ ବର୍ତ୍ତମାନ କାପୁରତଲାରେ ଜଣେ ଯୁବକଙ୍କୁ ଶିଖ୍ ଧର୍ମକୁ ଅପମାନିତ କରିବା ଅଭିଯୋଗରେ ପିଟିପିଟି ହତ୍ୟା କରାଯାଇଛି। ଶନିବାର ଅମୃତସରର ସ୍ଵର୍ଣ୍ଣ ମନ୍ଦିରରେ ମଧ୍ୟ ଏଭଳି ଘଟଣା ଘଟିଥିଲା।
ରବିବାର ପୂର୍ବାହ୍ନରେ କାପୁରତଲା ଜିଲ୍ଲାର ନିଜାମପୁର ଗାଁର ଲୋକମାନେ ଗୁରୁଦ୍ୱାର ଭିତରୁ ଜଣେ ଯୁବକଙ୍କୁ ଧରିଥିଲେ । ସେମାନେ ଅଭିଯୋଗ କରିଛନ୍ତି ଯେ ଯୁବକ ଜଣକ ଭୋର୍ ୪ଟାରେ ନିଶାନ ସାହିବ (ଶିଖ ପତାକା) ର ‘ଅପମାନ’ କରୁଥିବା ଦେଖାଯାଇଥିଲା।
ଯଦିଓ ପୋଲିସ୍ ଟିମ୍ ଘଟଣାସ୍ଥଳରେ ପହଞ୍ଚି ଯୁବକମାନଙ୍କୁ ନିଜ ହେପାଜତକୁ ନେଇଥିଲା, ଶିଖ୍ ଗୋଷ୍ଠୀ ତାଙ୍କୁ ସେମାନଙ୍କ ସାମ୍ନାରେ ପଚରାଉଚରା କରିବାକୁ ଚାପ ପକାଇଥିଲେ।
ପୋଲିସ ସହ କଳହ ପରେ ସ୍ଥାନୀୟ ଲୋକ ଯୁବକଙ୍କୁ ପିଟିପିଟି ହତ୍ୟା କରିଥିଲେ। ଏହା ପୂର୍ବରୁ ଶନିବାର ସନ୍ଧ୍ୟାରେ ଅମୃତସରର ପ୍ରସିଦ୍ଧ ସ୍ବର୍ଣ୍ଣ ମନ୍ଦିରରେ ଜଣେ ଯୁବକ ରେଲିଂ ଡେଇଁ ଦରବାର ସାହିବ (ଗର୍ଭଗୃହ) ଭିତରେ ପଶି ସେଠାରେ ଥିବା ଏକ ଖଣ୍ଡା ଉଠାଇବାକୁ ଚେଷ୍ଟା କଲାବେଳେ ଉପସ୍ଥିତ ଲୋକ ତାକୁ କାବୁ କରି ପ୍ରବଳ ମାଡ଼ ମାରିଥିଲେ । ମାଡ଼ରେ ଯୁବକଙ୍କ ମୃତ୍ୟୁ ହୋଇଥିଲା ।