ନୂଆଦିଲ୍ଲୀ: ଭାରତ ପୂର୍ବରୁ ଚୀନ୍ ଏବଂ ପାକିସ୍ତାନ ପଟୁ ଥିବା ସୁରକ୍ଷା ଚ୍ୟାଲେଞ୍ଜ ଉପରେ ସେନା ମୁଖ୍ୟ ଜେନେରାଲ୍ ଏମ୍ ଏମ୍ ନରାବଣେ ବଡ଼ ବୟାନ ଦେଇଛନ୍ତି । ନରାବଣେ କହିଛନ୍ତି ଯେ ଭବିଷ୍ୟତର ସଂଘର୍ଷର କିଛି ଟ୍ରେଲର୍ ଆମେ ଏବେ ଦେଖୁଛୁ । ଆମର ଶତ୍ରୁମାନେ ସେମାନଙ୍କର ରଣନୀତିକ ଲକ୍ଷ୍ୟ ହାସଲ କରିବାକୁ ଚେଷ୍ଟା ଜାରି ରଖିବେ। ସେନା ମୁଖ୍ୟ କହିଛନ୍ତି ଯେ ଉତ୍ତର ସୀମାରେ ନିକଟରେ ଘଟଣାକ୍ରମ ଦୃଷ୍ଟିରୁ ଅତ୍ୟାଧୁନିକ ଅସ୍ତ୍ରଶସ୍ତ୍ର ସହିତ ସଜ୍ଜିତ ଦକ୍ଷ ବାହିନୀର ଆବଶ୍ୟକତାକୁ ଗୁରୁତ୍ୱାରୋପ କରୁଛି । ସେ କହିଛନ୍ତି ଯେ ଆଫଗାନିସ୍ତାନରେ ସାମ୍ପ୍ରତିକ ଘଟଣାକ୍ରମ ଯୋଗୁଁ ପୁଣିଥରେ ପରଦା ପଛର ଏବଂ ଅଣ-ରାଜ୍ୟ ତତ୍ତ୍ଵଙ୍କ ଉପରେ ଧ୍ୟାନ କେନ୍ଦ୍ରିତ କରିଛି। ତେଣୁ ଆମେ ଆମର ସ ସୈନ୍ୟବାହିନୀର ପୁନର୍ଗଠନ, ପୁନଃ ସନ୍ତୁଳନ ଇତ୍ୟାଦି ଉପରେ ଧ୍ୟାନ ଦେଉଛୁ।
ଅନଲାଇନରେ ଏକ ସେମିନାରକୁ ସମ୍ବୋଧିତ କରି ଜେନେରାଲ ନରାବଣେ କହିଛନ୍ତି ଯେ ଭାରତ ଏକ ଭିନ୍ନ ଢଙ୍ଗର ଓ ଜଟିଳ ତଥା ବହୁ ସ୍ତରୀୟ ସୁରକ୍ଷା ଚ୍ୟାଲେଞ୍ଜର ସମ୍ମୁଖୀନ ହେଉଛି । ଉତ୍ତର ସୀମାରେ ଘଟଣାକ୍ରମ ସମ୍ପୂର୍ଣ୍ଣ ରୂପେ ପ୍ରସ୍ତୁତ ତଥା ଦକ୍ଷ ସୈନ୍ୟବାହିନୀର ଆବଶ୍ୟକତାକୁ ଗୁରୁତ୍ୱାରୋପ କରୁଛି । ପାକିସ୍ତାନର ନାମ ନ ନେଇ ସେନା ମୁଖ୍ୟ କହିଛନ୍ତି ଆଣବିକ ସମ୍ପନ୍ନ ପଡୋଶୀ ଦେଶ ତଥା ରାଜ୍ୟ ପ୍ରାୟୋଜିତ ପ୍ରକ୍ସି ଯୁଦ୍ଧ ମଧ୍ୟ ସୁରକ୍ଷା ଉପକରଣ ଏବଂ ସମ୍ବଳ ଆବଶ୍ୟକତା ଦର୍ଶାଉଛି ।
ଭବିଷ୍ୟତର ସଂଘର୍ଷର ଝଲକ ଆମେ ଦେଖୁଛୁ। ସୂଚନା, ନେଟୱାର୍କ ଏବଂ ସାଇବର ସ୍ପେସ୍ କ୍ଷେତ୍ରରେ ମଧ୍ୟ ଆମେ ଏହାର ପ୍ରମାଣ ଦେଖୁଛୁ | ବିବାଦୀୟ ସୀମାରେ ମଧ୍ୟ ଏସବୁ ଦୃଶ୍ୟମାନ ହେଉଛି | ଯଦି ଆପଣ ଚାରିପାଖକୁ ଦେଖନ୍ତି, ତେବେ ଆଜିର ବାସ୍ତବତାକୁ ଅନୁଭବ କରିପାରିବେ |