ନୂଆଦିଲ୍ଲୀ: ଏସିଆ କପ୍ ୨୦୨୩ କାର୍ଯ୍ୟସୂଚୀ ଚୂଡାନ୍ତ ହୋଇଛି । ଏସିଆ କପ୍ ପାଇଁ ରୋହିତ ଶର୍ମାଙ୍କ ନେତୃତ୍ୱାଧୀନ ଭାରତୀୟ ଦଳ ପାକିସ୍ତାନ ଗସ୍ତ କରିବ ନାହିଁ। ପୂର୍ବ ନିର୍ଦ୍ଧାରିତ ହାଇବ୍ରିଡ୍ ମଡେଲ ଅନୁଯାୟୀ ଏହି ଟୁର୍ଣ୍ଣାମେଣ୍ଟ ଖେଳାଯିବ । ଭାରତ ଏହାର ସବୁ ମ୍ୟାଚ୍ ଶ୍ରୀଲଙ୍କାରେ ଖେଳିବ ।
ଆଇପିଏଲ୍ ଅଧ୍ୟକ୍ଷ ଅରୁଣ ଧୁମାଲ ବୁଧବାର ଏହା ନିଶ୍ଚିତ କରିଛନ୍ତି। ଆଇସିସି ମୁଖ୍ୟ କାର୍ଯ୍ୟନିର୍ବାହୀ ବୈଠକ(ସିଇସି)ରେ ଯୋଗଦେବା ପାଇଁ ଅରୁଣ ଧୁମଲ ସମ୍ପ୍ରତି ଡର୍ବାନରେ ଅଛନ୍ତି।
ଅରୁଣ ଧୁମାଲ କହିଛନ୍ତି ଯେ ଗୁରୁବାର ଠାରୁ ଆରମ୍ଭ ହେଉଥିବା ଆଇସିସି ବୋର୍ଡ ବୈଠକ ପୂର୍ବରୁ ବିସିସିଆଇ ସମ୍ପାଦକ ଜୟ ଶାହା ଏବଂ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ମୁଖ୍ୟ ଜାକା ଆଶ୍ରାଫ ଭେଟିଛନ୍ତି । ଏସିଆ କପ୍ କାର୍ଯ୍ୟସୂଚୀ ଚୂଡାନ୍ତ ହୋଇଛି । ପୂର୍ବରୁ ଯାହା ଆଲୋଚନା ହୋଇଥିଲା ତଦନୁଯାୟୀ ଟୁର୍ଣ୍ଣାମେଣ୍ଟ ଆୟୋଜନ ହେବ ବୋଲି ଅରୁଣ ଧୁମଲ କହିଛନ୍ତି।
ଅରୁଣ ଧୁମଲ କହିଛନ୍ତି, ‘ଏସିଆ କପ୍ ୨୦୨୩ର କାର୍ଯ୍ୟସୂଚୀ ଅନୁଯାୟୀ ପାକିସ୍ତାନରେ ଲିଗ୍ ପର୍ଯ୍ୟାୟର ୪ଟି ମ୍ୟାଚ୍ ଖେଳାଯିବ। ଏହା ପରେ ଶ୍ରୀଲଙ୍କାରେ ୯ଟି ମ୍ୟାଚ୍ ଅନୁଷ୍ଠିତ ହେବ| ଏଥିରେ ଭାରତ ବନାମ ପାକିସ୍ତାନ ମଧ୍ୟରେ ଦୁଇଟି ମ୍ୟାଚ୍ ସାମିଲ। ଯଦି ଉଭୟ ଦଳ ଫାଇନାଲ ଖେଳନ୍ତି ତେବେ ତୃତୀୟ ମ୍ୟାଚ୍ ମଧ୍ୟ ଶ୍ରୀଲଙ୍କାରେ ଖେଳାଯିବ |
ଏସିଆ କପ୍ ପାଇଁ ଭାରତୀୟ ଦଳ ପାକିସ୍ତାନ ଆସିବ ବୋଲି ପାକ୍ କ୍ରୀଡ଼ା ମନ୍ତ୍ରୀ ଏହସାନ ମଜାରୀ ଦାବି କରିଥିବା ପାକିସ୍ତାନୀ ଗଣମାଧ୍ୟମରେ ଖବର ପ୍ରକାଶ ପାଇଛି । ତେବେ ଅରୁଣ ଧୁମଲ ଏହାକୁ ଖଣ୍ଡନ କରିଛନ୍ତି । ସେ କହିଛନ୍ତି, ସେପରି କୌଣସି ଆଲୋଚନା ହୋଇନାହିଁ। ଭାରତ ନା ପାକିସ୍ତାନ ଗସ୍ତ କରୁଛି ନା ଆମର ସମ୍ପାଦକ ଜୟ ଶାହା ପଡୋଶୀ ଦେଶ ଗସ୍ତ କରିବେ। କେବଳ ଟୁର୍ଣ୍ଣାମେଣ୍ଟ କାର୍ଯ୍ୟକ୍ରମ ଚୂଡାନ୍ତ ହୋଇଛି |
ଭାରତ ଓ ପାକିସ୍ତାନ ମଧ୍ୟରେ ମୁକାବିଲା ଶ୍ରୀଲଙ୍କାର ଡାମ୍ବୁଲାରେ ହୋଇପାରେ । ପାକିସ୍ତାନ ଏହାର ଏକମାତ୍ର ଘରୋଇ ମ୍ୟାଚ୍ ଅପେକ୍ଷାକୃତ ଦୁର୍ବଳ ନେପାଳ ଦଳ ବିପକ୍ଷରେ ହେବ। ଅନ୍ୟ ତିନୋଟି ମ୍ୟାଚ୍ ହେଉଛି ଆଫଗାନିସ୍ତାନ ବନାମ ବାଂଲାଦେଶ, ବାଂଲାଦେଶ ବନାମ ଶ୍ରୀଲଙ୍କା ଏବଂ ଶ୍ରୀଲଙ୍କା ବନାମ ଆଫଗାନିସ୍ତାନ।
ଏସିଆ କପ୍ ୨୦୨୩ ଦିନିକିଆ ଫର୍ମାଟରେ ଖେଳାଯିବ | ଗତ ବର୍ଷ ଏହା ଟି-୨୦ ଫର୍ମାଟରେ ଅନୁଷ୍ଠିତ ହୋଇଥିଲା | ଶେଷ ଥର (୨୦୧୮) ଯେବେ ଏସିଆ କପ୍ ଦିନିକିଆ ଫର୍ମାଟରେ ଖେଳାଯାଇଥିଲା ରୋହିତ ଶର୍ମାଙ୍କ ନେତୃତ୍ୱରେ ଭାରତୀୟ ଦଳ ଚାମ୍ପିୟନ ହୋଇଥିଲା ।