ନୂଆଦିଲ୍ଲୀ: କଂଗ୍ରେସର ପୂର୍ବତନ ନେତା ତଥା ଡେମୋକ୍ରାଟିକ୍ ପ୍ରଗତିଶୀଳ ଆଜାଦ ପାର୍ଟିର ମୁଖ୍ୟ ଗୁଲାମ ନବୀ ଆଜାଦ କଂଗ୍ରେସକୁ ଫେରିବା ନେଇ କଳ୍ପନା ଜଳ୍ପନାର ଜବାବ ଦେଇଛନ୍ତି।
କଂଗ୍ରେସକୁ ଫେରିବାକୁ ତାଙ୍କର କୌଣସି ଯୋଜନା ନାହିଁ ବୋଲି ଆଜାଦ କହିଛନ୍ତି।
୫୨ ବର୍ଷ ଧରି ଜଡ଼ିତ ହେବା ପରେ ଆଜାଦ ଚଳିତ ବର୍ଷ ଅଗଷ୍ଟରେ କଂଗ୍ରେସରୁ ଅଲଗା ହୋଇଥିଲେ। ଏହା ପରେ ସେ ଅକ୍ଟୋବରରେ ଜମ୍ମୁ କାଶ୍ମୀରରେ ନିଜର ଏକ ନୂଆ ଦଳ ଗଠନ କରିଥିଲେ।
କଂଗ୍ରେସଠାରୁ ଅଲଗା ହେବା ପୂର୍ବରୁ ସେ ଦଳର କାର୍ଯ୍ୟକାରିତା ଏବଂ ବରିଷ୍ଠ ନେତାମାନଙ୍କୁ ଉପେକ୍ଷା ନେଇ ପ୍ରଶ୍ନ ଉଠାଇଥିଲେ।
ସେ ଗଣମାଧ୍ୟମକୁ କହିଛନ୍ତି, କଂଗ୍ରେସକୁ ମୋର ଫେରିବା ଗୁଜବ କଂଗ୍ରେସର କିଛି ନେତାଙ୍କ ଦ୍ବାରା ସୃଷ୍ଟି ହୋଇଛି । ଏଥିରେ କୌଣସି ସତ୍ୟତା ନାହିଁ।
ସେ କହିଛନ୍ତି, “ମୁଁ କୌଣସି କଂଗ୍ରେସ ନେତାଙ୍କ ସହ କଥା ହୋଇ ନାହିଁ କିମ୍ବା କେହି ମୋତେ ଡାକିନାହାଁନ୍ତି। ମୁଁ ଭାବୁଛି ଗଣମାଧ୍ୟମରେ ଏପରି ଖବର କାହିଁକି ଦିଆଯାଉଛି?
ଗୁଲାମ ନବୀ ଆଜାଦ କଂଗ୍ରେସ ସହ ଆଲୋଚନା କରୁଛନ୍ତି ଏବଂ ସେ ଦଳକୁ ଫେରିପାରନ୍ତି ବୋଲି ଶୁକ୍ରବାର ଏକ ନିର୍ଦ୍ଦିଷ୍ଟ ଗଣମାଧ୍ୟମରେ ଖବର ପ୍ରକାଶ ପାଇଥିଲା ।
ଏହି ବିଷୟରେ ସେ ଟୁଇଟ୍ କରି କହିଛନ୍ତି ଯେ କଂଗ୍ରେସକୁ ଫେରିବା ବିଷୟରେ ସାମ୍ବାଦିକଙ୍କ କାହାଣୀ ଦେଖି ମୁଁ ଆଶ୍ଚର୍ଯ୍ୟ । ଦୁର୍ଭାଗ୍ୟବଶତଃ କଂଗ୍ରେସର ଦଳେ ନେତା ଜାଣିଶୁଣି ଏଭଳି କାହାଣୀ ଗଣମାଧ୍ୟମରେ ପ୍ରସାର କରୁଛନ୍ତି। ସେମାନେ ମୋ ନେତା ଏବଂ ସମର୍ଥକଙ୍କୁ ହତାଶ କରିବାକୁ ଚାହୁଁଛନ୍ତି।