ମୁମ୍ବାଇ: ବଲିଉଡର କିମ୍ବଦନ୍ତୀ ସଙ୍ଗୀତ ନିର୍ଦ୍ଦେଶକ ତଥା ଗାୟକ ବାପି ଲାହିରିଙ୍କ ୬୯ ବର୍ଷ ବୟସରେ ଦେହାନ୍ତ ହୋଇଛି। ବାପି ଦା ଜଣେ ମହାନ କଳାକାର ଥିଲେ | ସିନେପ୍ରେମୀ ଆଜି ବି ତାଙ୍କ ଦ୍ୱାରା ପ୍ରସ୍ତୁତ ଗୀତରେ ଝୁମିଥାନ୍ତି | ବାପି ଦା କିଛି ବର୍ଷ ତଳେ ଅତିଥି ଭାବରେ ‘କପିଲ ଶର୍ମା ସୋ’ରେ ତାଙ୍କ ଜୀବନର ଅନେକ ମଜାଦାର ଓ ଅଜଣା ତଥ୍ୟ ପ୍ରଶଂସକଙ୍କ ସହ ବାଣ୍ଟିଥିଲେ ।
ବାପି ଦା କହିଥିଲେ ଯେ ସେ ତିନି ବର୍ଷ ବୟସରୁ ତବଲା ଶିଖିବା ଆରମ୍ଭ କରିଥିଲେ | ସେ ୧୧ ବର୍ଷ ବୟସରୁ ଗୀତ କମ୍ପୋଜ୍ କରିବା ଆରମ୍ଭ କରିଥିଲେ ଏବଂ ଫିଲ୍ମ ପ୍ରତି ତାଙ୍କର ଆଗ୍ରହ ଯୋଗୁଁ ୧୯ ବର୍ଷ ବୟସରେ କୋଲକାତା ରୁ ମୁମ୍ବାଇ ପଳିଆସିଥିଲେ | ନିର୍ଦ୍ଦେଶକ ଶୋମୁ ମୁଖାର୍ଜୀ ତାଙ୍କୁ ‘ନନ୍ହା ଶିକାରୀ’ ଫିଲ୍ମରେ ପ୍ରଥମେ ତାଙ୍କୁ ସଂଗୀତକାର ଭାବେ ସୁଯୋଗ ଦେଇଥିଲେ। ଏହା ପରେ ବାପି ଦା ମ୍ୟୁଜିକ୍ ଇଣ୍ଡଷ୍ଟ୍ରିରେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରି ଆଗାମୀ ୪୮ ବର୍ଷ ପର୍ଯ୍ୟନ୍ତ ବଲିଉଡରେ ଜଣେ ଆଗଧାଡିର ସଂଗୀତ ନିର୍ଦ୍ଦେଶକ ଭାବେ ଖ୍ୟାତି ଅର୍ଜନ କରିଥିଲେ ।
ସେ ୫୦୦୦ ରୁ ଅଧିକ ଗୀତ କମ୍ପୋଜ୍ କରିଥିଲେ। ତାଙ୍କ ନାମରେ ଏକ ବିଶ୍ୱ ରେକର୍ଡ ମଧ୍ୟ ରେକର୍ଡ ରହିଛି | ୧୯୮୬ରେ ସେ ୩୩ ଟି ଫିଲ୍ମର ୧୮୦ଟି ଗୀତ ରେକର୍ଡ କରିଥିଲେ । ଏହି କାରଣରୁ ତାଙ୍କ ନାମ ଗିନିଜ ବୁକ୍ ଅଫ୍ ୱାର୍ଲ୍ଡ ରେକର୍ଡରେ ସାମିଲ ହୋଇଥିଲା | ବାପି ଦାଙ୍କ ସୁନା ଆଭୂଷଣ ପିନ୍ଧିବା ସଉକ୍ ଥିଲା । କିନ୍ତୁ ‘କପିଳ ଶର୍ମା ଶୋ’ରେ ସେ ନିଜ ସମ୍ପର୍କରେ ଆଉ ଏକ ରୋଚକ କଥା କହିଥିଲେ । ସେ ଅମୃତସରର ସ୍ଵର୍ଣ୍ଣ ମନ୍ଦିରରୁ ଆଣିଥିବା ଏକ ‘କଡ଼ା’ ବା କଙ୍କଣ ମଧ୍ୟ ପିନ୍ଧୁଥିଲେ | ‘ଜଖମୀ’ ଫିଲ୍ମଟି ହିଟ୍ ହେବାପରେ ଏହି କଡ଼ା ତାଙ୍କ ମାଆ ତାଙ୍କୁ ପିନ୍ଧାଇଥିଲେ | ବଙ୍ଗାଳି ହେବା ସତ୍ତ୍ୱେ ବାପି ଏହି କଡ଼ା ପିନ୍ଧୁଥିଲେ କାରଣ ସେ ଏହାକୁ ପିନ୍ଧିବା ବହୁତ ଭାଗ୍ୟବାନ ମନେ କରୁଥିଲେ । ବାପି ଦା କେବେ ଦେହରୁ ସୁନାର ଆଭୁଷଣ କାଢୁ ନଥିଲେ ।
ବାପି ଦା ଆଉ ଏକ ସ୍ମୃତି ବାଣ୍ଟି କହିଥିଲେ ଯେ ପପ୍ ଆଇକନ୍ ମାଇକେଲ ଜ୍ୟାକସନ ମଧ୍ୟ ତାଙ୍କ ସଙ୍ଗୀତର ପ୍ରଶଂସକ ଥିଲେ | ଥରେ ଯେତେବେଳେ ବାପି ଏକ ଇଭେଣ୍ଟରେ ମାଇକେଲ ଜ୍ୟାକସନଙ୍କୁ ଭେଟିଥିଲେ, ମାଇକେଲ ତାଙ୍କ ବେକରେ ଭଗବାନ ଗଣେଶଙ୍କ ଲକେଟ ଦେଖିବା ପରେ ବାପିଙ୍କୁ ପ୍ରଶଂସା କରିଥିଲେ | ତା’ପରେ ବାପି ତାଙ୍କୁ କହିଥିଲେ ଯେ ସେ ଡିସ୍କୋ ଡ୍ୟାନ୍ସର ଗୀତ କମ୍ପୋଜ୍ କରିଛନ୍ତି । ତା’ପରେ ମାଇକେଲ କହିଥିଲେ ଯେ ସେ ତାଙ୍କର ‘ଜିମି ଜିମି.’ ଗୀତକୁ ବେଶ୍ ପସନ୍ଦ କରିଥିଲେ |