ମୁମ୍ବାଇ: ଏୟାର ଇଣ୍ଡିଆ ଶେଷରେ ଏକ ସିଇଓ ପାଇଛି | ଟାଟା ସନ୍ସ ନ୍ୟୁଜିଲ୍ୟାଣ୍ଡର କ୍ୟାମ୍ପବେଲ ୱିଲସନଙ୍କୁ ଏୟାର ଇଣ୍ଡିଆର ସିଇଓ ତଥା ଏମଡି ଭାବରେ ନିଯୁକ୍ତ କରିଛନ୍ତି। ଏୟାର ଇଣ୍ଡିଆ ବୋର୍ଡ ତାଙ୍କ ନିଯୁକ୍ତିକୁ ଅନୁମୋଦନ କରିଛି। ତେବେ ୱିଲସନଙ୍କ ନିଯୁକ୍ତିକୁ ବର୍ତ୍ତମାନ ଡିଜିସିଏ ଅନୁମୋଦନ ଆବଶ୍ୟକ। ବିମାନ ଶିଳ୍ପରେ ୫୦ ବର୍ଷୀୟ ୱିଲସନଙ୍କର ୨୬ ବର୍ଷର ଅଭିଜ୍ଞତା ଅଛି | ସେ ବର୍ତ୍ତମାନ ସିଙ୍ଗାପୁର ଏୟାରଲାଇନ୍ ସ୍କୁଟର ସିଇଓ ଅଛନ୍ତି। ୱିଲସନ ୧୯୯୬ ରେ ନ୍ୟୁଜିଲ୍ୟାଣ୍ଡର ସିଙ୍ଗାପୁର ଏୟାରଲାଇନ୍ସ ସହିତ ମ୍ୟାନେଜମେଣ୍ଟ ଟ୍ରେନି ଭାବରେ କ୍ୟାରିୟର ଆରମ୍ଭ କରିଥିଲେ | ତା’ପରେ ସେ କାନାଡା, ହଂକଂ ଏବଂ ଜାପାନର ସିଙ୍ଗାପୁର ଏୟାରଲାଇନ୍ସରେ କାର୍ଯ୍ୟ କରିଥିଲେ |
ଟାଟା ସନ୍ସ ନିକଟରେ ଏୟାର ଇଣ୍ଡିଆକୁ ଅଧିଗ୍ରହଣ କରିଥିଲା | ଏୟାର ଇଣ୍ଡିଆର ସିଇଓ ଭାବେ ପ୍ରଥମେ ତୁର୍କୀର ଇଲ୍କର ଆଇସିଙ୍କୁ ନିଯୁକ୍ତ କରିଥିଲା ଟାଟା ସନ୍ସ । ତେବେ ଭାରତ ବିରୋଧୀ ମନ୍ତବ୍ୟ ପାଇଁ ପରିଚିତ ତୁର୍କୀ ରାଷ୍ଟ୍ରପତି ରିସେପ୍ ତାଇପ ଏର୍ଡୋଗାନଙ୍କ ସହ ତାଙ୍କର ଘନିଷ୍ଠତା ଯୋଗୁଁ ବିବାଦ ସୃଷ୍ଟି ହୋଇଥିଲା । ଏହି କାରଣରୁ ଆଇସି ଏୟାର ଇଣ୍ଡିଆର ସିଇଓ ଅଫର୍ ପ୍ରତ୍ୟାଖ୍ୟାନ କରିଥିଲେ।