ରାଞ୍ଚି: ଦେଶର ସ୍ୱାଧୀନତା ଉପରେ ବିବାଦୀୟ ମନ୍ତବ୍ୟ ଦେଇଥିବା ବଲିଉଡ୍ ଅଭିନେତ୍ରୀ କଙ୍ଗନା ରଣାୱତ ଏବଂ ନିଜ ନୂଆ ପୁସ୍ତକରେ ହିନ୍ଦୁତ୍ୱକୁ ଆଇଏସ୍ ସହ ତୁଳନା ପାଇଁ
କଂଗ୍ରେସ ନେତା ସଲମାନ ଖୁର୍ସିଦଙ୍କ ବିରୋଧରେ ଝାଡ଼ଖଣ୍ଡର ଧାନବାଦ୍ ଜିଲ୍ଲା କୋର୍ଟରେ ଦୁଇଟି ପୃଥକ୍ ମାମଲା ରୁଜୁ ହୋଇଛି। ଜନସାଧାରଣଙ୍କ ଭାବନାକୁ ଆଘାତ ଦେଇଥିବା ଅଭିଯୋଗ କରି ଉଭୟଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୋର୍ଟଙ୍କୁ ନିବେଦନ କରାଯାଇଛି।
ଧାନବାଦର ପାଣ୍ଡରପାଲାର ବାସିନ୍ଦା ଇଜହର ଅହମ୍ମଦ ଓରଫ୍ ବିହାରୀଙ୍କ ପକ୍ଷରୁ କଙ୍ଗନା ରଣାୱତଙ୍କ ବିରୋଧରେ କୋର୍ଟରେ ଦାଖଲ କରାଯାଇଥିବା ଅଭିଯୋଗରେ କୁହାଯାଇଛି ଯେ ସେ କେବଳ ଶହୀଦ ତଥା ଦେଶର ଲକ୍ଷ ଲକ୍ଷ ସ୍ୱାଧୀନତା ସଂଗ୍ରାମୀଙ୍କ ବଳିଦାନକୁ ଅପମାନିତ କରିନାହାଁନ୍ତି, ତାଙ୍କର ଏହି ମନ୍ତବ୍ୟ ଦେଶର ସମ୍ମାନ ହାନି କରିଛି। ଏହି ବିବୃତ୍ତିରେ ବିଜେପି ନେତା ବରୁଣ ଗାନ୍ଧୀଙ୍କ ସମାଲୋଚନାକୁ ଦର୍ଶାଇ ଏହାକୁ ଦେଶଦ୍ରୋହ ମାମଲା ବୋଲି ବର୍ଣ୍ଣନା କରାଯାଇଛି। ନଭେମ୍ବର ୨୦ରେ କୋର୍ଟ ଏହି ମାମଲାର ଶୁଣାଣି କରିବେ।
ଅନ୍ୟପକ୍ଷରେ, ଜରିଆର ବାସିନ୍ଦା ତଥା ଓକିଲ ଶିବ କୁମାର, କଂଗ୍ରେସ ନେତା ସଲମାନ ଖୁର୍ସିଦଙ୍କ ନାମରେ ଧାନବାଦ କୋର୍ଟରେ ଅଭିଯୋଗ କରିଛନ୍ତି। ସେ କହିଛନ୍ତି ଯେ, ଖୁର୍ସିଦ ତାଙ୍କ ପୁସ୍ତକରେ ହିନ୍ଦୁତ୍ୱକୁ ଇସଲାମିକ ଆତଙ୍କବାଦୀ ସଂଗଠନ ବୋକୋ ହାରାମ ଓ ଆଇଏସ୍ ସହ ତୁଳନା କରି ହିନ୍ଦୁମାନଙ୍କ ଧାର୍ମିକ ଭାବନାକୁ ଆଘାତ କରିଛନ୍ତି | ଅଭିଯୋଗ ମକଦ୍ଦମାରେ କୁହାଯାଇଛି ଯେ ଖୁରସିଦଙ୍କ ପୁସ୍ତକରେ ଲେଖାଯାଇଥିବା ବାକ୍ୟ ଦୁଇ ସମ୍ପ୍ରଦାୟ ମଧ୍ୟରେ ସଦଭାବ ବିଗାଡିବାକୁ ଷଡଯନ୍ତ୍ର କରାଯାଇଛି। ଦୁହେଁ ଖୁରସିଦଙ୍କ ମନ୍ତବ୍ୟକୁ ସମର୍ଥନ କରୁଥିବାରୁ ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମ୍ ଏବଂ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂହଙ୍କୁ ଏହି ମାମଲାରେ ସହଅଭିଯୁକ୍ତ କରିବା ପାଇଁ ମଧ୍ୟ ଦାବି କରାଯାଇଛି। ନଭେମ୍ବର ୧୮ରେ କୋର୍ଟ ଏହି ମାମଲାର ଶୁଣାଣି କରିବେ।