ନୂଆଦିଲ୍ଲୀ: ମିଳିତ ଜାତିସଂଘରେ ଆମେରିକାର ପୂର୍ବତନ ରାଷ୍ଟ୍ରଦୂତ ନିକ୍କି ହେଲି ବୁଧବାର ଫକ୍ସ ନ୍ୟୁଜକୁ କହିଛନ୍ତି ଯେ ତାଲିବାନ ଆଫଗାନିସ୍ତାନକୁ ନିଜ ନିୟନ୍ତ୍ରଣକୁ ନେବା ପରେ ଚୀନ୍ ବଗରାମ ବିମାନ ଘାଟିକୁ କବଜା କରିବାକୁ ଉଦ୍ୟମ କରୁଛି। ଏଥିପାଇଁ ଚୀନ୍ ଉପରେ କଡା ନଜର ରଖିବାର ଆବଶ୍ୟକତା ରହିଛି। ବଗରାମ ବିମାନ ଘାଟି ପ୍ରାୟ ଦୁଇ ଦଶନ୍ଧି ଧରି ଆମେରିକାର ନିୟନ୍ତ୍ରଣରେ ଥିଲା। ହେଲି କହିଛନ୍ତି ଯେ, ଆଫଗାନିସ୍ତାନରେ ଚୀନ୍ ନିଜ ଉପସ୍ଥିତି ମଜବୁତ୍ କରି ପାକିସ୍ତାନକୁ ଭାରତ ବିରୁଦ୍ଧରେ ଢାଲ କରିବାକୁ ଚାହୁଁଛି । ସେ କହିଛନ୍ତି ଯେ ଆମେରିକାର ରାଷ୍ଟ୍ରପତି ଜୋ ବାଇଡେନ ପ୍ରଶାସନ ଭାରତ, ଜାପାନ ଏବଂ ଅଷ୍ଟ୍ରେଲିଆ ଭଳି ପ୍ରମୁଖ ବନ୍ଧୁ ତଥା ସହଯୋଗୀମାନଙ୍କ ନିକଟରେ ପହଞ୍ଚିବାର ସମୟ ଆସିଛି । ସେମାନଙ୍କୁ ଆମେରିକା ସର୍ବଦା ସମର୍ଥନ କରିବ।
ଅନ୍ୟପକ୍ଷେ ହ୍ବାଇଟ୍ ହାଉସ କହିଛି ଯେ ଆମେରିକା କିମ୍ବା ଅନ୍ୟ କୌଣସି ଦେଶ ତାଲିବାନକୁ ମାନ୍ୟତା ଦେବା ପାଇଁ ତତ୍ପର ନୁହଁନ୍ତି, କାରଣ ଏହି ପଦକ୍ଷେପ ବିଶ୍ୱ ସମୁଦାୟର ଆଶାକୁ କେତେ ପୂରଣ କରିବ ତାହା ଉପରେ ସମ୍ପୂର୍ଣ୍ଣ ନିର୍ଭର କରିବ। ହ୍ବାଇଟ୍ ହାଉସର ପ୍ରେସ ସଚିବ ଜେନ ପାସାକି ଏକ ଦୈନିକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଆମେରିକା କିମ୍ବା ଅନ୍ୟ କୌଣସି ଦେଶ ତାଲିବାନକୁ ମାନ୍ୟତା ଦେବା ପାଇଁ ତତ୍ପର ନୁହଁନ୍ତି। ଏହା ତାଲିବାନର ଆଚରଣ ଉପରେ ନିର୍ଭର କରେ |