ନୂଆଦିଲ୍ଲୀ: ଋଷି ସୁନକ ବ୍ରିଟେନର ପ୍ରଧାନମନ୍ତ୍ରୀ ହେବା ନେଇ ବରିଷ୍ଠ ନେତା ପି ଚିଦାମ୍ବରମ୍ ଏବଂ ଶଶି ଥରୁରଙ୍କ ମନ୍ତବ୍ୟ ଉପରେ କଂଗ୍ରେସ ପ୍ରତିକ୍ରିୟା ରଖିଛି। କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ଏକ ସାମ୍ବାଦିକ ସମ୍ମିଳନୀ କରି ସୁନକଙ୍କ ଉପରେ ଦଳର ଏହି ଦୁଇ ନେତାଙ୍କ ମନ୍ତବ୍ୟରୁ ନିଜକୁ ଦୂରେଇ ରଖିବାକୁ ଚେଷ୍ଟା କରିଛନ୍ତି । ସେ କହିଛନ୍ତି ଯେ, ଭାରତକୁ ଅନ୍ୟ କୌଣସି ଦେଶରୁ ଶିଖିବା ଦରକାର ନାହିଁ। ତାଙ୍କୁ ତାଙ୍କ ଦଳ ବ୍ରିଟେନର ପ୍ରଧାନମନ୍ତ୍ରୀ କରିଛି ଏବଂ ଆମେ ଏହାକୁ ସ୍ୱାଗତ କରୁଛୁ।
ସେ କହିଛନ୍ତି ଯେ ମୁଁ ଭାବୁ ନାହିଁ ଯେ ଆମକୁ ଅନ୍ୟ କୌଣସି ଦେଶରୁ ବିବିଧତା ସମ୍ପର୍କରେ ଶିଖିବାର ଅଛି । କିନ୍ତୁ ଗତ ଆଠ ବର୍ଷ ମଧ୍ୟରେ ଏଭଳି ପରିସ୍ଥିତି ସୃଷ୍ଟି ହୋଇଛି। ଆମ ଦେଶରେ ଅନେକ ବିବିଧତା ଅଛି ଏବଂ ସେଥିରେ ଆମର ଏକତା ଅଛି | ସେ ମଙ୍ଗଳବାର କହିଛନ୍ତି ଯେ ଭାରତର ସଂଖ୍ୟାଲଘୁ ସମ୍ପ୍ରଦାୟରୁ ଅନେକ ଲୋକ ରାଷ୍ଟ୍ରପତି ଏବଂ ମୁଖ୍ୟମନ୍ତ୍ରୀ ହୋଇଛନ୍ତି।
ଏଭଳି ସ୍ଥିତିରେ ଭାରତ କାହାଠାରୁ କିଛି ଶିଖିବାର ଆବଶ୍ୟକତା ନାହିଁ । କାରଣ ଏହି ଦେଶ ବିବିଧତା ମଧ୍ୟରେ ଏକତାର ଏକ ଶ୍ରେଷ୍ଠ ଉଦାହରଣ।
ଭାରତୀୟ ବଂଶୋଦ୍ଭବ ଋଷି ସୁନକଙ୍କୁ ବ୍ରିଟେନର ପ୍ରଧାନମନ୍ତ୍ରୀ କରାଯିବା ନିଷ୍ପତ୍ତିକୁ କଂଗ୍ରେସର ବରିଷ୍ଠ ନେତା ଚିଦାମ୍ବରମ୍ ଏବଂ ଶଶି ଥରୁର ପ୍ରଶଂସା ଓ ସ୍ବାଗତ କରି କହିଥିଲେ ଯେ ସଂଖ୍ୟାଲଘୁ ସମ୍ପ୍ରଦାୟର ବ୍ୟକ୍ତିଙ୍କୁ ଶୀର୍ଷ ପଦବୀ ଦେବାର ଏହି ପରମ୍ପରାକୁ ଭାରତ ମଧ୍ୟ ପାଳନ କରିବା ଉଚିତ।
ଦଳର ଦୁଇ ବରିଷ୍ଠ ନେତାଙ୍କ ଏଭଳି ମନ୍ତବ୍ୟ ପରେ ଜୟରାମ ରମେଶ କହିଛନ୍ତି, ଆମକୁ ଅନ୍ୟ କୌଣସି ଦେଶରୁ ଶିକ୍ଷାଲାଭ କରିବାର ଆବଶ୍ୟକତା ନାହିଁ। ଆମର ଏକତା କେବଳ ବିବିଧତା ଦ୍ୱାରା ମଜବୁତ୍ ହେବ | ଆମକୁ ବିବିଧତାକୁ ସମ୍ମାନ କରିବାକୁ ପଡିବ | ଭାରତ ଯୋଡ ଯାତ୍ରାର ଉଦ୍ଦେଶ୍ୟ ହେଉଛି ଏୟା |
ରମେଶ କହିଛନ୍ତି ଯେ ଆମ ଦେଶରେ ଜାକିର ହୁସେନ୍ ରାଷ୍ଟ୍ରପତି ହୋଇଥିଲେ, ଫଖରୁଦ୍ଦିନ ଅଲି ଅହମ୍ମଦ ରାଷ୍ଟ୍ରପତି ହୋଇଥିଲେ, ଏପିଜେ ଅବଦୁଲ କଲାମ ରାଷ୍ଟ୍ରପତି ହୋଇଥିଲେ। ବାରକତୁଲ୍ଲା ଖାନ ରାଜସ୍ଥାନର ମୁଖ୍ୟମନ୍ତ୍ରୀ ହୋଇଥିଲେ, ଏଆର୍ ଅନ୍ତୁଲେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହୋଇଥିଲେ।