ନୂଆଦିଲ୍ଲୀ: ସିବିଆଇ ପରେ ଏବେ ଇଡି ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ଗିରଫ କରିଛି । ମଦ ଦୁର୍ନୀତି ସହ ଜଡ଼ିତ ମନି ଲଣ୍ଡରିଂ ମାମଲାରେ ତାଙ୍କୁ ଗିରଫ କରାଯାଇଛି। ଜେଲରେ ଥିବା ସିସୋଦିଆଙ୍କୁ ପ୍ରାୟ ୮ ଘଣ୍ଟା ଜେରା ପରେ ତାଙ୍କୁ ଗିରଫ କରିଛି ଇଡି। ଇଡିର ଏପରି ଆକ୍ସନ୍ ପରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଟ୍ୱିଟ୍ କରି କହିଛନ୍ତି ଯେ ମନୀଷଙ୍କୁ ଯେମିତି ହେଲେ ଜେଲରେ ରଖିବା ହେଉଛି ସେମାନଙ୍କ ଏକମାତ୍ର ଉଦ୍ଦେଶ୍ୟ। ପ୍ରତିଦିନ ନୂଆ ମିଥ୍ୟା ମାମଲା ସୃଷ୍ଟି କରାଯାଉଛି | ଲୋକ ଦେଖୁଛନ୍ତି। ଲୋକେ ଜବାବ ଦେବେ । ”
ମଦ ନୀତିରେ ଅନିୟମିତତା ଅଭିଯୋଗରେ ସିବିଆଇ ଫେବୃଆରୀ ୨୬ରେ ମନୀଷ ସିସୋଦିଆଙ୍କୁ ଗିରଫ କରିଥିଲା। ଦିଲ୍ଲୀର ରାଉଜ୍ ଆଭେନ୍ୟୁ କୋର୍ଟ ସିସୋଦିଆଙ୍କୁ ମାର୍ଚ୍ଚ ୨୦ ପର୍ଯ୍ୟନ୍ତ ବିଚାର ବିଭାଗୀୟ ହାଜତକୁ ପଠାଇଥିଲେ।
ସିବିଆଇ ଗିରଫଦାରୀ ବିରୋଧରେ ଜାମିନ ଆବେଦନ କରିଥିବା ମନୀଷ ସିସୋଦିଆଙ୍କୁ ଏବେ ଇଡି ଗିରଫ କରିବା ପରେ ଆପର ଏହି ବରିଷ୍ଠ ନେତାଙ୍କ ଅଡ଼ୁଆ ବଢ଼ିଛି । ଆସନ୍ତାକାଲି ତାଙ୍କୁ କୋର୍ଟରେ ହାଜର କରାଯିବ। ଆସନ୍ତାକାଲି ସିବିଆଇ ଗିରଫ ମାମଲାରେ ତାଙ୍କ ଜାମିନ ଶୁଣାଣି ହେବା ସମ୍ଭାବନା ମଧ୍ୟ ରହିଛି।
ଇଡି ଦ୍ୱାରା ମନୀଷ ସିସୋଡିଆଙ୍କ ଗିରଫଦାରୀ ସମ୍ପର୍କରେ ଏଏପି ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଟ୍ୱିଟ କରି କହିଛନ୍ତି ଯେ ମନୀଷଙ୍କୁ ପ୍ରଥମେ ସିବିଆଇ ଗିରଫ କରିଥିଲା। ଚଢ଼ାଉରେ ସିବିଆଇକୁ କୌଣସି ପ୍ରମାଣ ମିଳିନଥିଲା, କୌଣସି ଟଙ୍କା ମିଳିନଥିଲା । ଆସନ୍ତାକାଲି ଜାମିନ ଶୁଣାଣି ହେବ। ଆସନ୍ତାକାଲି ମନୀଷ ମୁକ୍ତ ହୋଇଥାନ୍ତେ । ତେଣୁ ଆଜି ଇଡି ତାଙ୍କୁ ଗିରଫ କରିଛି। ସେମାନଙ୍କର କେବଳ ଗୋଟିଏ ଉଦ୍ଦେଶ୍ୟ – ଯେକୌଣସି ମତେ ମନୀଷଙ୍କୁ ଜେଲରେ ରଖିବା | ପ୍ରତିଦିନ ନୂଆ ମିଥ୍ୟା ମାମଲା ସୃଷ୍ଟି କରି | ଜନସାଧାରଣ ଦେଖୁଛନ୍ତି। ଜନସାଧାରଣ ଜବାବ ଦେବେ ।”
ମନୀଷ ସିସୋଦିଆ ଏବଂ ଅନ୍ୟ ଅଭିଯୁକ୍ତଙ୍କ ବିରୋଧରେ କିଛି ମଦ ଡିଲରଙ୍କୁ ଫାଇଦା ହେବା ଭଳି ଅବକାରୀ ନୀତି ପ୍ରସ୍ତୁତ କରିବା ଅଭିଯୋଗ ହୋଇଛି। ତେବେ ଆମ୍ ଆଦମୀ ପାର୍ଟି କୌଣସି ଦୁର୍ନୀତି ହୋଇଥିବା ଅଭିଯୋଗକୁ ଖଣ୍ଡନ କରିଆସିଛି ।