ପ୍ରାଣ ପ୍ରତିଷ୍ଠା ପୂର୍ବରୁ ବଢ଼ିଲା ‘ରାମଚରିତମାନସ’ର ଡିମାଣ୍ଡ୍, ଭାଙ୍ଗିଲା ୫୦ ବର୍ଷର ରେକର୍ଡ

ନୂଆଦିଲ୍ଲୀ: ଆସନ୍ତା ଜାନୁଆରୀ ୨୨ରେ ଅଯୋଧ୍ୟା ରାମ ମନ୍ଦିରର ପ୍ରାଣ ପ୍ରତିଷ୍ଠା ସମାରୋହ ଅନୁଷ୍ଠିତ ହେବ । ଏହା ପୂର୍ବରୁ ଗୀତା ପ୍ରେସ୍ ଦ୍ବାରା ପ୍ରକାଶିତ ‘ରାମଚରିତମାନସ’ର ଚାହିଦା ହଠାତ୍ ବଢ଼ି ଯାଇଛି । ଚାହୁଁ ଚାହୁଁ ଏହି ପୁସ୍ତକର ଷ୍ଟକ୍ ଶେଷ ହୋଇଯାଇଛି | ସାଧାରଣତଃ ପ୍ରତି ମାସରେ ଗୀତା ପ୍ରେସ୍ ‘ରାମଚରିତମାନସ’ର ପ୍ରାୟ ୭୫,୦୦୦ କପି ଛାପିଥାଏ ଏବଂ ଷ୍ଟକ୍ ସର୍ବଦା ଉପଲବ୍ଧ ରହିଥାଏ | କିନ୍ତୁ ଏଥର ଷ୍ଟକ୍ ଶେଷ ହୋଇଯାଇଛି । ଗୀତା ପ୍ରେସରେ ଗତ ୫୦ ବର୍ଷରେ ପ୍ରଥମ ଥର‌ ପାଇଁ ‘ରାମଚରିତମାନସ’ର ଷ୍ଟକ୍ ଶେଷ ହୋଇଛି ।

ଗୀତା ପ୍ରେସର ମ୍ୟାନେଜର ଲାଲମଣି ତିଓ୍ବାରୀ କହିଛନ୍ତି, “ରାମଲାଲାଙ୍କ ପ୍ରାଣ ପ୍ରତିଷ୍ଠା ତାରିଖ ଘୋଷଣା ହେବା ଦିନଠାରୁ ରାମଚରିତମାନସ, ସୁନ୍ଦରାକାଣ୍ଡ ଏବଂ ହନୁମାନ ଚାଳିଶାର ଚାହିଦା ଯଥେଷ୍ଟ ବୃଦ୍ଧି ପାଇଛି। ପୂର୍ବରୁ ଆମେ ପ୍ରତି ମାସରେ ୭୫,୦୦୦ କପି ଛାପୁଥିଲୁ କିନ୍ତୁ ଏବେ ଆମେ ୧ ଲକ୍ଷ କପି ଛାପୁଛୁ, ତଥାପି ଷ୍ଟକ୍ ରହୁନି।”

ଗୀତା ପ୍ରେସକୁ ପ୍ରତି ମାସରେ ପ୍ରାୟ ୧.୫ ଲକ୍ଷ କପିର ଅର୍ଡର ଆସୁଛି | ଅକ୍ଟୋବର, ନଭେମ୍ବର ଏବଂ ଡିସେମ୍ବରରେ ‘ରାମଚରିତମାନସ’ର ୩ ଲକ୍ଷ ୨୭ ହଜାର କପି ଛପା ଯାଇଥିଲା, ତେବେ ସେଗୁଡ଼ିକ ସବୁ ବିକ୍ରି ହୋଇସାରିଛି | ଏହି ତିନି ମାସରେ ୧୩ ଲକ୍ଷ ୫୦ ହଜାର କପି ହନୁମାନ ଚାଳିଶା ଛପା ହୋଇଥିଲା, କିନ୍ତୁ ବର୍ତ୍ତମାନ ଏହାର ଷ୍ଟକ୍ ମଧ୍ୟ ଶେଷ ହେବାକୁ ଯାଉଛି |

ବିହାର ଏବଂ ରାଜସ୍ଥାନରୁ ମଧ୍ୟ ରାମଚରିତମାନର ଡିମାଣ୍ଡ୍ ଆସୁଛି | ଅଧିକ କପି ଯୋଗାଇବାରେ ଗୀତା ପ୍ରେସ୍ ନିଜର ଅସମର୍ଥତା ପ୍ରକାଶ କରିଛି | ଗୀତା ପ୍ରେସ୍ ପ୍ରଭୁ ରାମଙ୍କ ଉପରେ ଆଧାରିତ ପ୍ରାୟ ୧୩ କୋଟି ପୁସ୍ତକ ଛାପିଛି | ଲାଲମଣି ତିଓ୍ବାରୀ କହିଛନ୍ତି, ଆମେ ପ୍ରାୟ ୭୫ ପ୍ରତିଶତ ପୁସ୍ତକ ଯୋଗାଇ ପାରିବୁ। ଚଳିତ ବର୍ଷ ଏପର୍ଯ୍ୟନ୍ତ ୨୦ କୋଟିରୁ ଅଧିକ ମୂଲ୍ୟର ପୁସ୍ତକ ବିକ୍ରି ହୋଇସାରିଛି ବୋଲି ସେ କହିଛନ୍ତିି ।

ଗୀତା ପ୍ରେସ୍ ୧୯୨୩ରେ ପ୍ରତିଷ୍ଠିତ ହୋଇଥିଲା । ଏହି ପ୍ରେସରେ ୧୯୩୯ରେ ପ୍ରଥମ ଥର ‘ରାମଚରିତମାନସ’ର ପ୍ରକାଶନ ହୋଇଥିଲା | ଏହି ପୁସ୍ତକ ସମୁଦାୟ ୧୦ଟି ଭାଷାରେ ପ୍ରକାଶିତ ହୋଇଛି । ବର୍ତ୍ତମାନ ପର୍ଯ୍ୟନ୍ତ ଏହି ପୁସ୍ତକର ସାଢ଼େ ତିନି କୋଟିରୁ ଅଧିକ କପି ପ୍ରକାଶିତ ହୋଇଛି | ‘ରାମଚରିତମାନସ’ର ୭ଟି କାଣ୍ଡ ରହିଛି ଏବଂ ବଜାରରେ ପ୍ରତି କାଣ୍ଡର ଚାହିଦା ରହିଛି | ତେବେ ‘ସୁନ୍ଦରାକଣ୍ଡ’ର ଚାହିଦା ସବୁଠୁ ଅଧିକ ରହିଛି |