ନୂଆଦିଲ୍ଲୀ: ଉତ୍ତର ପ୍ରଦେଶରେ ସୋମବାର ସପ୍ତମ ତଥା ଶେଷ ପର୍ଯ୍ୟାୟ ଭୋଟ ସହ ଫେବୃଆରୀ ୧୦ରୁ ପାଞ୍ଚ ରାଜ୍ୟ ଉତ୍ତର ପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ଗୋଆ ଓ ମଣିପୁରରେ ଆରମ୍ଭ ହୋଇଥିବା ବିଧାନସଭା ପାଇଁ ମତଦାନ ଶେଷ ହୋଇଛି । ଏବେ ସମସ୍ତଙ୍କ ନଜର ମାର୍ଚ୍ଚ ୧୦ରେ ପ୍ରକାଶ ପାଇବାକୁ ଥିବା ଫଳ ଉପରେ ରହିଛି । ତା’ପୂର୍ବରୁ କେଉଁଠି କେଉଁ ଦଳ ସରକାର ଗଢ଼ିବ ସେନେଇ ବିଭିନ୍ନ ସଂସ୍ଥା ପକ୍ଷରୁ ଏକଜିଟ୍ ପୋଲ୍ କରାଯାଇଛି । ଏକଜିଟ୍ ପୋଲ୍ ଅନୁଯାୟୀ ଉତ୍ତର ପ୍ରଦେଶରେ ବିଜେପି ଏବଂ ପଞ୍ଜାବରେ ଆମ୍ ଆଦମୀ ପାର୍ଟି (ଆପ୍)କୁ ବହୁମତ ମିଳିବା ପୂର୍ବାନୁମାନ କରାଯାଇଥିବା ବେଳେ ଉତ୍ତରାଖଣ୍ଡରେ ଝୁଲା ବିଧାନସଭା ନେଇ ଆକଳନ କରାଯାଇଛି ।
ସିଏନ୍ଏନ୍ ନ୍ୟୁଜ୍ ୧୮, ରିପବ୍ଲିକ୍ ଟିଭିର ଏକଜିଟ୍ ପୋଲ୍ ଅନୁଯାୟୀ ୪୦୩ ସଦସ୍ୟ ବିଶିଷ୍ଟ ଉତ୍ତରପ୍ରଦେଶ ବିଧାନସଭାରେ ବିଜେପି ନେତୃତ୍ଵାଧୀନ ଏନଡିଏ ୨୧୧-୨୭୭ ସିଟ୍ ଏବଂ ସମାଜବାଦୀ ପାର୍ଟି (ଏସପି) ୧୧୯ ରୁ ୧୬୦ଟି ସିଟ୍ ପାଇବ ବୋଲି ଆକଳନ କରାଯାଇଛି |
‘ଏକଜିଟ୍ ପୋଲ୍’ ମଧ୍ୟରୁ ଅଧିକାଂଶ ପଞ୍ଜାବରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ନେତୃତ୍ୱାଧୀନ ଆପ୍ ର ବିଜୟ ନେଇ ପୂର୍ବାନୁମାନ କରିଛନ୍ତି। ଇଣ୍ଡିଆ ଟୁଡେର ଏକଜିଟ୍ ପୋଲ୍ ୧୧୭ ସଦସ୍ୟ ବିଶିଷ୍ଟ ପଞ୍ଜାବ ବିଧାନସଭାରେ ଆପ୍ ୭୬-୯୦ ସିଟ୍ ଜିତିବ ବୋଲି ଆକଳନ କରିଛି।
ଟିଭି୯ ଭାରତବର୍ଷ-ପୋଲଷ୍ଟାର୍ଟ ଏକଜିଟ୍ ପୋଲ୍ ଅନୁଯାୟୀ ପଞ୍ଜାବରେ ଆପ୍ ୫୬-୬୧ ସିଟ୍ ପାଇବ ବୋଲି ପୂର୍ବାନୁମାନ କରିଛି | ଅଧିକାଂଶ ଏକଜିଟ୍ ପୋଲରେ ପଞ୍ଜାବରେ ଦ୍ୱିତୀୟ ସ୍ଥାନ ପାଇବାକୁ ଶାସକ କଂଗ୍ରେସ ଆକଳନ କରିଛି।
ଉତ୍ତରାଖଣ୍ଡରେ ବିଧାନସଭା ନିର୍ବାଚନରେ ଉଭୟ କଂଗ୍ରେସ ଏବଂ ବିଜେପି ପାଇଁ ପୃଥକ ଏକଜିଟ୍ ପୋଲ୍ ପୂର୍ବାନୁମାନ କରାଯାଇଛି। କେତେକ ଏକଜିଟ୍ ପୋଲ୍ ଗୋଆରେ ଏକ ଝୁଲା ବିଧାନସଭା ପୂର୍ବାନୁମାନ କରିଥିବାବେଳେ ମଣିପୁରରେ ବିଜେପି ଏହାର ପ୍ରତିଦ୍ୱନ୍ଦ୍ୱୀମାନଙ୍କଠାରୁ ଅଧିକ ଆସନ ପାଇବ ବୋଲି ଆକଳନ କରାଯାଇଛି।