ନୂଆଦିଲ୍ଲୀ: ମେ ୭ ତାରିଖରେ ୧୨ଟି ରାଜ୍ୟର ୯୪ଟି ଆସନରେ ହେବାକୁ ଥିବା ଲୋକସଭା ନିର୍ବାଚନର ତୃତୀୟ ପର୍ଯ୍ୟାୟ ପାଇଁ ଶୁକ୍ରବାର ଠାରୁ ନାମାଙ୍କନ ପ୍ରକ୍ରିୟା ଆରମ୍ଭ ହୋଇଛି। ରାଷ୍ଟ୍ରପତିଙ୍କ ତରଫରୁ ନିର୍ବାଚନ କମିଶନ ଏନେଇ ବିଜ୍ଞପ୍ତି ଜାରି କରିବା ପରେ ତୃତୀୟ ପର୍ଯ୍ୟାୟ ମତଦାନ ପାଇଁ ନାମାଙ୍କନ ପତ୍ର ଦାଖଲ ଆରମ୍ଭ ହୋଇଛି।
ନାମାଙ୍କନ ପତ୍ର ଦାଖଲ ପାଇଁ ଏପ୍ରିଲ୍ ୧୯ ହେଉଛି ଶେଷ ତାରିଖ | ମଧ୍ୟପ୍ରଦେଶର ବୈତୁଲ ନିର୍ବାଚନମଣ୍ଡଳୀରେ “ସ୍ଥଗିତ” ଥିବା ମତଦାନ ପାଇଁ ଆଉ ଏକ ପୃଥକ ବିଜ୍ଞପ୍ତି ଜାରି କରାଯାଇଛି ବୋଲି ନିର୍ବାଚନ କମିଶନ କହିଛନ୍ତି। ବିଏସପି ପ୍ରାର୍ଥୀଙ୍କ ମୃତ୍ୟୁ ପରେ ବୈତୁଲ ଲୋକସଭା ଆସନ ପାଇଁ ନିର୍ବାଚନ ସ୍ଥଗିତ ରଖାଯାଇଛି। ଯଦି ନିର୍ବାଚନ ପୂର୍ବରୁ କୌଣସି ସ୍ବୀକୃତିପ୍ରାପ୍ତ ଜାତୀୟ କିମ୍ବା ଆଞ୍ଚଳିକ ଦଳର ପ୍ରାର୍ଥୀଙ୍କ ମୃତ୍ୟୁ ହୋଇଯାଏ, ତେବେ ସମ୍ପୃକ୍ତ ଦଳକୁ ନୂଆ ପ୍ରାର୍ଥୀ ଚିହ୍ନଟ କରି ମଇଦାନକୁ ଓହ୍ଲାଇବା ପାଇଁ ଅନୁମତି ଦେବା ଲାଗି ନିର୍ବାଚନକୁ ସ୍ଥଗିତ ରଖାଯାଏ।ଏପ୍ରିଲ ୨୬ରେ ଦ୍ୱିତୀୟ ପର୍ଯ୍ୟାୟରେ ବୈତୁଲ ଆସନରେ ମତଦାନ ହେବାର ଥିଲା |
ଅଷ୍ଟଦଶ ଲୋକସଭା ନିର୍ବାଚନ ପାଇଁ ଏପ୍ରିଲ୍ ୧୯ରୁ ୭ଟି ପର୍ଯ୍ୟାୟରେ ଭୋଟ ଗ୍ରହଣ ପ୍ରକ୍ରିୟା ଆରମ୍ଭ ହୋଇ ଜୁନ୍ ୧ରେ ଶେଷ ହେବ। ଭୋଟ୍ ଗଣନା ସହ ଫଳାଫଳ ଜୁନ୍ ୪ରେ ପ୍ରକାଶ ପାଇବ ।