ଜୋହାନ୍ସବର୍ଗ: ଟିମ୍ ଇଣ୍ଡିଆ ସମ୍ପ୍ରତି ଦକ୍ଷିଣ ଆଫ୍ରିକା ଗସ୍ତରେ ଅଛି । ଉଭୟ ଦଳ ମଧ୍ୟରେ ଡିସେମ୍ବର ୨୬ରୁ ତିନି ଟେଷ୍ଟ ବିଶିଷ୍ଟ ସିରିଜ୍ ଆରମ୍ଭ ହେବ | ପ୍ରଥମ ମ୍ୟାଚ୍ ସେଞ୍ଚୁରିଅନରେ ଖେଳାଯିବ, ଯେଉଁଥି ପାଇଁ ଭାରତୀୟ ଦଳ ସେଠାରେ ପହଞ୍ଚି ଅଭ୍ୟାସ ଜାରି ରଖିଛି | କରୋନାର ନୂଆ ଭାରିଆଣ୍ଟ ଓମିକ୍ରନ୍ ର ବିପଦକୁ ଦୃଷ୍ଟିରେ ରଖି ଦକ୍ଷିଣ ଆଫ୍ରିକା କ୍ରିକେଟ୍ ବୋର୍ଡ (ସିଏସ୍ଏ) ମଧ୍ୟ କଡ଼ା ସୁରକ୍ଷା ବ୍ୟବସ୍ଥା କରିଛି | ଏଥିପାଇଁ ଆଫ୍ରିକୀୟ ବୋର୍ଡ ବିସିସିଆଇ ସହିତ ନିରନ୍ତର ଯୋଗାଯୋଗରେ ଅଛି। କିନ୍ତୁ ଏହି ମ୍ୟାଚ୍ ପୂର୍ବରୁ ପ୍ରଶଂସକମାନଙ୍କୁ ଏକ ବଡ଼ ଝଟକା ଲାଗିଛି। ଓମିକ୍ରନ୍ କାରଣରୁ ଦକ୍ଷିଣ ଆଫ୍ରିକା ବୋର୍ଡ ବିନା ଦର୍ଶକରେ ପ୍ରଥମ ଟେଷ୍ଟ ଆୟୋଜନ କରିବାକୁ ନିଷ୍ପତ୍ତି ନେଇଛି |
ଗଣମାଧ୍ୟମ ରିପୋର୍ଟ ଅନୁଯାୟୀ, ଓମିକ୍ରନ୍ ମାମଲା ବୃଦ୍ଧିକୁ ଦୃଷ୍ଟିରେ ରଖି କ୍ରିକେଟ୍ ଦକ୍ଷିଣ ଆଫ୍ରିକା (ସିଏସ୍ଏ) ପ୍ରଥମ ଟେଷ୍ଟ ମ୍ୟାଚ୍ ପାଇଁ ଟିକେଟ ବିକ୍ରୟ ନକରିବାକୁ ନିଷ୍ପତ୍ତି ନେଇଛି। କରୋନା ଗାଇଡଲାଇନ୍ ଅନୁସରଣ କରି ଆଫ୍ରିକା ସରକାର ନିକଟରେ ୨୦୦୦ ଲୋକଙ୍କୁ ଷ୍ଟାଡିୟମକୁ ଯିବାକୁ ଅନୁମତି ଦେଇଥିଲେ। କିନ୍ତୁ ବର୍ତ୍ତମାନ ଖେଳାଳିଙ୍କ ସୁରକ୍ଷାକୁ ଦୃଷ୍ଟିରେ ରଖି ବୋର୍ଡ ପ୍ରଥମ ଟେଷ୍ଟ ବିନା ଦର୍ଶକରେ ଆୟୋଜନ କରିବାକୁ ନିଷ୍ପତ୍ତି ନେଉଛି। ତେବେ ବାକି ଟେଷ୍ଟ ମ୍ୟାଚଗୁଡିକ ବିଷୟରେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇ ନାହିଁ। ସ୍ଥିତିର ଆକଳନ ପରେ ହିଁ ପରବର୍ତ୍ତୀ ନିଷ୍ପତ୍ତି ନିଆଯିବ।
ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ୍ ଡିସେମ୍ବର ୨୬ରୁ ସେଞ୍ଚୁରିଅନରେ ଖେଳାଯିବ | ଦ୍ୱିତୀୟ ମ୍ୟାଚ୍ ଜାନୁଆରୀ ୩ରୁ ଜୋହାନ୍ସବର୍ଗରେ ଏବଂ ତୃତୀୟ ଏବଂ ଶେଷ ଟେଷ୍ଟ ମ୍ୟାଚ୍ ଜାନୁଆରୀ ୧୧ରୁ କେପଟାଉନରେ ଖେଳାଯିବ |